બોન્ડ થકી મૂડી એકત્રીકરણ ધીમું પડયું

અમદાવાદ : સ્મોલ ઇન્ડસ્ટ્રીઝ ડેવલપમેન્ટ બેંક ઓફ ઇન્ડિયા (સીડબી), પાવર ફાઇનાન્સ કોર્પોરેશન, એક્સિસ બેંક અને સુંદરમ ફાઇનાન્સે સ્થાનિક સિક્યોરિટીઝ માર્કેટમાંથી આશરે રૂ. ૧૪,૫૦૦ કરોડ એકત્ર કર્યા છે, જ્યારે બોન્ડ જારી કરવાની અપેક્ષા લગભગ રૂ. ૨૫,૦૦૦ કરોડ હતી. પાવર ફાઇનાન્સ અને નેશનલ બેંક ફોર એગ્રીકલ્ચર એન્ડ રૂરલ ડેવલપમેન્ટે (નાબાર્ડ) તેમના ટૂંકા ગાળાના ઇશ્યૂ પાછી ખેંચી લીધા હોવાથી બોન્ડ થકી મૂડી એકત્રીકરણ ધીમું પડયું છે.

નાણાકીય નીતિ સમિતિ આગામી મહિનાની બેઠકમાં રેપો રેટમાં ઘટાડો કરે તેવી અપેક્ષા છે, જેનાથી ટૂંકા ગાળાના બોન્ડ વ્યાજ દરમાં ઘટાડો થઈ શકે છે. તેથી, કંપનીઓ માટે પછીથી મૂડી એકત્ર કરવી વધુ ફાયદાકારક બની શકે છે.

રિઝર્વ બેંકના ગવર્નર સંજય મલ્હોત્રાએ જણાવ્યું હતું કે વધુ દર ઘટાડાનો અવકાશ ઓછો થયો નથી. ગવર્નરના નિવેદન બાદ, ૧૦-વર્ષના બેન્ચમાર્ક સરકારી બોન્ડ પર ઉપજ ઘટી છે. તેમની ટિપ્પણીઓ છ સભ્યોની નાણાકીય નીતિ સમિતિની ૩ ડિસેમ્બરે શરૂ થનારી બેઠકના એક અઠવાડિયા પહેલા આવી હતી. આ નિર્ણય ૫ ડિસેમ્બરે જાહેર કરવામાં આવશે.

જાહેર ક્ષેત્રના ધિરાણકર્તાઓ પાવર ફાઇનાન્સ કોર્પોરેશને રૂ. ૩,૦૦૦ કરોડના બોન્ડ ઇશ્યૂ પાછા ખેંચી લીધા હતા અને નાબાર્ડ એ રૂ. ૭,૦૦૦ કરોડના બોન્ડ ઇશ્યૂ પાછા ખેંચી લીધા હતા. આ ઇશ્યૂ ત્રણ વર્ષથી થોડા વધુ સમય માટે જારી કરવામાં આવી રહ્યા હતા.

જોકે, સીડબી એ ૩૭ મહિનામાં પાકતા બોન્ડ દ્વારા ૬.૭૪%ના વ્યાજ દરે રૂ. ૫,૯૩૫ કરોડ એકત્ર કર્યા હતા. સીડબી એ રૂ. ૬,૦૦૦ કરોડના બોન્ડ જારી કર્યા હતા. બીજી તરફ, PFC એ ૭.૦૮%ના વ્યાજ દરે ૧૦ વર્ષના બોન્ડ દ્વારા રૂ. ૩,૦૦૦ કરોડ એકત્ર કર્યા હતા.

ભારતની ત્રીજી સૌથી મોટી ખાનગી ક્ષેત્રની ધિરાણકર્તા એક્સિસ બેંકે પણ બોન્ડ માર્કેટમાંથી ૭.૨૭%ના દરે ૧૦ વર્ષના ઇન્ફ્રાસ્ટ્રક્ચર બોન્ડ દ્વારા રૂ. ૫,૦૦૦ કરોડ એકત્ર કર્યા હતા. ચાલુ નાણાકીય વર્ષમાં ધિરાણકર્તા દ્વારા જારી કરાયેલ આ પહેલો ઇન્ફ્રાસ્ટ્રક્ચર બોન્ડ છે. સુંદરમ ફાઇનાન્સે પણ રૂ. ૮૦૦ કરોડ એકત્ર કર્યા હતા. કુલ રૂ. ૮૦૦ કરોડમાંથી, રૂ. ૨૪૦ કરોડ એન્કર રોકાણકારો તરફથી આવ્યા હતા.

જાહેર ક્ષેત્રની એક બેંકના એક ડીલરે જણાવ્યું હતું કે, નાબાર્ડે તેનો ઇશ્યૂ પાછો ખેંચી લીધો કારણ કે સીડબીએ લગભગ ૬.૭૪%ના વ્યાજ દરે ઇશ્યૂ જારી કર્યો હતો. નાબાર્ડનો બેઝ ઇન્ટરેસ્ટ રેટ ૬.૭૪% હતો, જ્યારે સમગ્ર ઇશ્યૂ માટેનો વ્યાજ દર ૬.૭૮% હતો. નાબાર્ડને ઓછા વ્યાજ દરની અપેક્ષા હતી, જે પૂર્ણ થઈ ન હતી. દરમિયાન, પાવર ફાઇનાન્સ કોર્પો.ને તેના ૧૦-વર્ષના બોન્ડ માટે ૭.૦૮%નો દર મળ્યો હતો, નાબાર્ડ અને પાવર ફાઇનાન્સ કોર્પો. બંને ૫ ડિસેમ્બર પછી તેમના ઇશ્યૂ લોન્ચ કરી શકે છે.