બૅંકો રવિવારે પણ ખુલ્લી રહેશે, 28-30 સપ્ટેમ્બરે હડતાળને ધ્યાનમાં રાખી RBIનો મહત્ત્વપૂર્ણ નિર્ણય

Bank Open on Sunday: આ મહિનાની 28થી 30 સપ્ટેમ્બર દરમિયાન 3 દિવસની સંભવિત હડતાલને ધ્યાનમાં રાખીને રવિવારે પણ બૅંકો ખુલ્લી રાખવાનો મહત્ત્વપૂર્ણ નિર્ણય લેવામાં આવ્યો છે. નાણા મંત્રાલયે જણાવ્યું છે કે સોમવારથી શરૂ થતી બૅંકોની હડતાલ પહેલાં રવિવારે બૅંકોમાં રજા રહેશે નહીં. એસબીઆઈ (SBI), પીએનબી (PNB), યુનિયન બૅંક, ઇન્ડિયન બૅંક, બૅંક ઑફ બરોડા, કેનરા બૅંક સહિત પબ્લિક સેક્ટરની તમામ બૅંકો અને ક્ષેત્રીય ગ્રામીણ બૅંકો પણ ખુલ્લી રહેશે.

સામાન્ય દિવસોની જેમ જ થશે કામકાજ

તમામ બૅંકોમાં સામાન્ય દિવસોની જેમ જ નિયમિત કામકાજ ચાલુ રહેશે. કેન્દ્રીય બૅંક અને બૅંક રેગ્યુલેટર આરબીઆઈ દ્વારા પણ આ નિર્ણયને મંજૂરી આપવામાં આવી છે. રિઝર્વ બૅંકના જણાવ્યા મુજબ, ગ્રાહકોની સુવિધા અને હિતોને ધ્યાનમાં રાખીને આ ખાસ પગલું ભરવામાં આવ્યું છે.

દેશભરમાં 3 દિવસની હડતાલનું એલાન

યુનાઇટેડ ફોરમ ઑફ બૅંક યુનિયન્સ (UFBU) દ્વારા 28થી 30 સપ્ટેમ્બર, 2026 દરમિયાન ત્રણ દિવસની દેશવ્યાપી બૅંક હડતાલનું એલાન કરવામાં આવ્યું છે. આ અગાઉ 26 અને 27 સપ્ટેમ્બરે વીકેન્ડની રજાઓ પણ આવે છે. આવી સ્થિતિમાં સામાન્ય નાગરિકોની બૅંકિંગ જરૂરિયાતો ગંભીર રીતે પ્રભાવિત થઈ શકે છે, જેને ધ્યાનમાં રાખીને સરકારે આ આગોતરી તૈયારી કરી છે.

શાખાઓથી લઈને કરન્સી ચેસ્ટ સુધી બધું જ ચાલુ રહેશે

નાણા મંત્રાલયે સ્પષ્ટ કર્યું છે કે સામાન્ય લોકોની બૅંકિંગ જરૂરિયાતો લાંબા સમય સુધી પ્રભાવિત ન થાય તે માટે તમામ જાહેર ક્ષેત્રની બૅંકો અને પ્રાદેશિક ગ્રામીણ બૅંકો રવિવાર, 27 સપ્ટેમ્બર, 2026ના રોજ સામાન્ય રીતે કાર્યરત રહેશે. રિઝર્વ બૅંક ઑફ ઇન્ડિયાએ તમામ બૅંક શાખાઓ, કાર્યાલયો, એટીએમ-લિંક્ડ શાખાઓ અને કરન્સી ચેસ્ટને 27 સપ્ટેમ્બરે સંપૂર્ણપણે ચાલુ રાખવાની મંજૂરી આપી દીધી છે.

સરકાર અને બૅંક મેનેજમેન્ટની અપીલ

સરકાર અને બૅંક મેનેજમેન્ટે યુનિયનોને પ્રસ્તાવિત હડતાલ પાછી ખેંચી લેવા અથવા ટાળવા માટે અપીલ કરી છે. સાથે જ, ગ્રાહકોને કોઈપણ પ્રકારની અસુવિધા ન પડે અને જરૂરી બૅંકિંગ સેવાઓ નિર્વિઘ્ન ચાલુ રહે તે માટે તમામ આવશ્યક પગલાં લેવામાં આવ્યા છે.