Business

1 કિલો ચાંદી હવે 1.46 લાખમાં, સોનું 10 મહિનામાં 70,000 સસ્તું, કિંમતી ધાતુઓમાં કડાકાનો દોર

By GS Team
20 Nov 20263 mins read
TukuTouch Logo
શુક્રવારે ભારતીય બજારમાં સોના-ચાંદીના ભાવમાં મોટો કડાકો બોલાયો હતો. 24 કેરેટ 10 ગ્રામ સોનું 6,000 રૂપિયા સસ્તું થઈ 1.21 લાખ રૂપિયા પર પહોંચ્યું, જ્યારે ચાંદી 10,000 રૂપિયાથી વધુ ઘટીને 1,46,868 રૂપિયા પ્રતિ કિલો થઈ. વૈશ્વિક સંકેતો, અમેરિકન ફેડના કડક વલણ અને મજબૂત ડૉલરને કારણે આ ઘટાડો જોવા મળ્યો છે. લગ્નની સિઝનમાં ઘરેણાં ખરીદનારાઓને મોટી રાહત મળી છે.

Summarized by AI; it may make mistakes. Check important info

1 કિલો ચાંદી હવે 1.46 લાખમાં, સોનું 10 મહિનામાં 70,000 સસ્તું, કિંમતી ધાતુઓમાં કડાકાનો દોર

Gold Silver Rate Today: 24 કેરેટ 10 ગ્રામ સોનાનો ભાવ ગગડીને 1.21 લાખ રૂપિયા સુધી પહોંચી ગયો છે અને આજે એક જ દિવસમાં સોનું 6 હજાર રૂપિયા પ્રતિ 10 ગ્રામ સસ્તું થયું છે. સોના-ચાંદીના ભાવમાં સતત ઘટાડો નોંધાઈ રહ્યો છે અને શુક્રવારે પણ ભારતીય બજારમાં બંને કિંમતી ધાતુઓના ભાવમાં મોટો કડાકો જોવા મળ્યો છે. જોકે, ભારતમાં લગ્નની સીઝન શરૂ થઈ ચૂકી છે, ત્યારે ઘરેણાં ખરીદવા ઇચ્છતા લોકો માટે આ ભાવઘટાડો મોટી રાહત સમાન છે.

ચાંદીમાં 7 ટકા અને સોનામાં 5 ટકાનો ઘટાડો

શુક્રવારે વૈશ્વિક સંકેતો અને અમેરિકન ફેડરલ રિઝર્વના કડક વલણને કારણે સોના-ચાંદીના ભાવ પર દબાણ વધ્યું છે. ચાંદી 10 હજાર રૂપિયાથી વધુ સસ્તી થઈને 1,46,868 રૂપિયા પ્રતિ કિલો સુધી પહોંચી ગઈ છે, જેમાં 7 ટકાનો મોટો ઘટાડો નોંધાયો છે. થોડા અઠવાડિયા પહેલાં કોઈએ ધાર્યું નહોતું કે ચાંદી 1.50 લાખ રૂપિયાથી નીચે સરકી જશે, જ્યારે જાન્યુઆરીમાં ચાંદી 4.21 લાખ રૂપિયા પ્રતિ કિલો સુધી પહોંચી હતી, જેની સરખામણીમાં તે 2.75 લાખ રૂપિયા કિલો સસ્તી થઈ છે.

બીજી તરફ સોનામાં પણ 5 ટકાનો મોટો ઘટાડો થયો છે. 24 કેરેટ 10 ગ્રામ સોનાનો ભાવ ઘટીને 1.21 લાખ રૂપિયા સુધી આવી ગયો છે અને આજે તેમાં 6 હજાર રૂપિયાનો ઘટાડો નોંધાયો છે. આ જ વર્ષે જાન્યુઆરીમાં સોનાનો ભાવ 1.91 લાખ રૂપિયા પ્રતિ 10 ગ્રામની ઊંચાઈએ પહોંચ્યો હતો, જ્યાંથી તે અંદાજે 70 હજાર રૂપિયા સસ્તું થયું છે.

MCX પર બજાર ખુલતાની સાથે જ ભારે વેચવાલી

નબળા વિદેશી સંકેતો વચ્ચે શુક્રવારે બજાર ખુલતાની સાથે જ મલ્ટી કોમોડિટી એક્સચેન્જ (MCX) પર સોના-ચાંદીમાં ભારે વેચવાલી જોવા મળી હતી, જેના કારણે રોકાણકારો અને ઝવેરી બજારમાં હલચલ મચી ગઈ હતી. MCX પર ડિસેમ્બર ડિલિવરીવાળી ચાંદીમાં 7 ટકા (આશરે 10,000 રૂપિયા)નો ઘટાડો થયો હતો, જ્યારે ડિસેમ્બર વાયદા સોનું પણ લગભગ 5 ટકા એટલે કે આશરે 6,000 રૂપિયા તૂટીને 1,21,719 રૂપિયા પ્રતિ 10 ગ્રામના નીચલા સ્તરે પહોંચ્યું હતું. વર્ષ 2026ની શરૂઆતમાં રેકોર્ડ ઊંચાઈએ પહોંચ્યા બાદ આટલી ઝડપથી ભાવ નીચે આવશે તેવી કોઈને અપેક્ષા નહોતી.

અમેરિકન ફેડના સંકેત અને ડૉલરની મજબૂતી

અમેરિકામાં ધારણા કરતાં વધુ મોંઘવારીને પગલે ફેડરલ રિઝર્વ વ્યાજદર વધારે તેવા સંકેત છે. ફિલાડેલ્ફિયા ફેડના પ્રમુખ અન્ના પૉલસનના નિવેદન બાદ ડિસેમ્બરમાં 25 બેઝિસ પોઇન્ટ (0.25%) વધારાની લગભગ 97 ટકા શક્યતા છે, જ્યારે કેટલાક નિષ્ણાતો 50 બેઝિસ પોઇન્ટ વધારાનું માને છે.

આ શક્યતાથી અમેરિકન ડૉલર ઇન્ડેક્સ 19 મહિનાની ઊંચી સપાટી નજીક પહોંચ્યો છે. મજબૂત ડૉલરને કારણે અન્ય ચલણ ધરાવતા ખરીદદારો માટે સોનું-ચાંદી મોંઘું થતાં વૈશ્વિક માંગ ઘટી છે. ઉપરાંત, AI શેરોમાં ઘટાડાને કારણે ખોટ સરભર કરવા અને માર્જિન પૂરું કરવા મોટા રોકાણકારોએ સોના-ચાંદીનું વેચાણ કર્યું છે.

ચાંદીની ઔદ્યોગિક માંગ ઘટવાનો ભય

ચાંદી માત્ર ઘરેણાં કે રોકાણ પૂરતી સીમિત નથી, પરંતુ ઇલેક્ટ્રોનિક્સ અને ગ્રીન એનર્જી જેવા ક્ષેત્રોમાં તેનો મોટો ઉપયોગ થાય છે. વૈશ્વિક આર્થિક મંદી અને કડક નાણાકીય નીતિની આશંકાને કારણે ચાંદીની ઔદ્યોગિક માંગ નબળી પડવાનો ભય છે, જેના કારણે સોનાની તુલનામાં ચાંદીમાં વધુ તીવ્ર ઘટાડો જોવા મળ્યો છે.

રોકાણકારો માટે નિષ્ણાતોની સલાહ

બજારના નિષ્ણાતોના મતે, ડિસેમ્બરમાં યોજાનારી અમેરિકન ફેડની બેઠક સુધી સોના-ચાંદીમાં ચઢાવ-ઉતાર ચાલુ રહી શકે છે. જોકે, કેન્દ્રીય બેંકો દ્વારા સતત સોનાની ખરીદી અને ભૌગોલિક-રાજકીય તણાવ નીચલા સ્તરે આ ધાતુઓને થોડો ટેકો આપી શકે છે. આ સ્થિતિમાં રિટેલ રોકાણકારોએ ગભરાઈને વેચવાલી કરવાને બદલે બજાર સ્થિર થાય તેની રાહ જોવી જોઈએ અને લાંબા ગાળા માટે ખરીદી કરવી હોય તો એકસાથે નાણાં રોકવાને બદલે હપ્તાવાર રોકાણ કરવાની વ્યૂહરચના અપનાવવી હિતાવહ રહેશે.