કાળાનાળાના બંધ મકાનને તસ્કરોએ નિશાન બનાવી રોકડ ,ઘરેણા ઉઠાવી ગયા

પરિવાર નેપાળ પશુપતિનાથના દર્શને ગયો હતો

સોના-ચાંદીના દાગીના, રોકડ અને મોબાઈલ મળી  રૃ. ૨.૦૬ લાખની ચોરી

ભાવનગર - ભાવનગરમાં એક ચોરીની ચોંકાવનારી ઘટના સામે આવી છે, જેમાં કાળાનાળા વિસ્તારમાં રહેતો પરિવાર નેપાળ સ્થિત પશુપતિનાથના દર્શને ગયા હતા તે દરમિયાન તસ્કરોએ બંધ મકાનને નિશાન બનાવ્યું હતું. ઘરના કબાટના લોક તોડી રોકડ ઘરેણા ચોરી કરી નાસી છૂટયા હતા.

કાળાનાળા વિસ્તારમાં આવેલા દાદા સાહેબ દેરાસર પાસે રહેતા સતુભા ગોહિલ પરિવાર સાથે ગત તા. ૦૮ જુલાઈ ૨૦૨૬ થી ૧૦ જુલાઈ ૨૦૨૬ દરમિયાન પોતાનું ઘર બંધ કરીને નેપાળ સ્થિત પશુપતિનાથના દર્શને ગયા હતા.તે દરમિયાન અજાણ્યા શખ્સે ઘરમાં પ્રવેશ કરી કબાટનું લોક તોડયું હતું. તસ્કરો કબાટમાંથી સોનાની બુટ્ટી, સોનાની લગડી, સોનાનું પેન્ડલ અને સોનાની વીંટીની ચોરી કરી ગયા હતા. આ ઉપરાંત ચાંદીના કડલા, સાંકળ, રુદ્રાક્ષની માળા, છડ્ડા તેમજ તાંબાનો લોટો અને એક રિયલમી કંપનીનો મોબાઈલ પણ ચોરી કરી લીધો હતો.ઘરમાંથી દાગીના અને મોબાઈલ સિવાય આશરે રૃ. ૬૦,૦૦૦ની રોકડ અને પરચુરણ સિક્કા મળી કુલ રૃ. ૨,૦૬,૨૦૦ની મતાની ચોરીની ચોરી કરી નાસી છૂટયા હતા. આ મામલે નીલમબાગ પોલીસ મથકમાં અજાણ્યા શખ્સ સામે ગુનો નોંધી વધુ તપાસ હાથ ધરી છે.