બોટાદના ધારપીપળા ગામે ઢોર તગડવા મામલે પાડોશીઓનો આધેડ પર હુમલો

રાણપુર પોલીસ મથકે ગુનો નોંધાયો

રેઢીયાર ઢોરને ભગાડવા બાબતે બોલાચાલી બાદ દંપતી સહિત ચાર શખ્સોએ હુમલો કરી જાનથી મારી નાખવાની ધમકી આપી

ભાવનગર -  બોટાદ જિલ્લાના રાણપુર તાલુકાના ધારપીપળા ગામે વાડીના ઝાપા પાસે રેઢીયાર ઢોર ભગાડવા બાબતે પાડોશીઓ વચ્ચે બોલાચાલી થઈ જતા આધેડને ગંભીર માર મારી ઈજા પહોચાડી હતી.

મળતી વિગતો મુજબ, ધારપીપળા ગામે રહેતા વલ્લભભાઈ અરજણભાઈ જીડીયા (ઉં.વ. ૪૫) ગઈકાલે બપોરે પોતાના પરિવાર સાથે વાડીએ જમતા હતા. તે સમયે વાડીના ઝાપે રેઢીયાર ઢોર આવતા તેમના પત્નિ સજ્જનબેન ઢોર તગડવા ગયા હતા. આ દરમિયાન વાડી પાડોશી રામાભાઈ માધાભાઈ જીડીયા અને તેમના પત્નિ લીલાબેન બાઇક પર આવી અચાનક ગાળો આપવા લાગ્યા હતા. વલ્લભભાઈએ ગાળો બોલવાની ના પાડતા ઉશ્કેરાયેલા રામાભાઈએ લાકડી વડે વલ્લભભાઈના માથામાં અને કોણી પર હુમલો કરી ગંભીર ઈજા પહોંચાડી હતી. ત્યારબાદ રામાભાઈનો પુત્ર અજય હાથમાં ગુપ્તી અને તેની પત્નિ લોખંડનું ધારીયું લઈ આવી જાનથી મારી નાખવાની ધમકી આપી હતી. ઇજાગ્રસ્ત વલ્લભભાઈને પ્રાથમિક સારવાર રાણપુર અને બાદમાં વધુ સારવાર માટે બોટાદની સબીહા હોસ્પિટલમાં ખસેડવામાં આવ્યા છે. આ મામલે રાણપુર પોલીસે ચારેય આરોપીઓ સામે બી.એન.એસ. તથા જી.પી. એક્ટ હેઠળ ગુનો નોંધી વધુ તપાસ હાથ ધરી છે.