પુરપાટ જતી થાર ગાડીએ ટક્કર મારતા યુવાનનું મોત

કપુરાઇ બ્રિજ પાસે પૂરપાટઝડપે જતી મહારાષ્ટ્ર પાસિંગની એક થાર ગાડીએ રોડ ક્રોસ કરતા યુવાનને અડફેટમાં લેતા તેનું સ્થળ પર જ કમકમાટીભર્યું મોત નિપજ્યું છે.
પ્રાપ્ત માહિતી મુજબ ભાવેશ સુખરામ રાઠવા (ઉ.વ.૩૧) વડોદરામાં રહીને ડ્રાઇવિંગનું કામ કરતો હતો. તા.૧૧ના રોજ તે છોટાઉદેપુર જિલ્લાના કવાંટ તાલુકાના મુસર ગામમાં પોતાના વતનમાં મોટાભાઇ સહિતના પરિવારના સભ્યોને મળવા ગયો હતો અને બીજા દિવસે તા.૧૨ના રોજ તે વડોદરા પરત આવ્યો હતો. દરમિયાન કપુરાઇ બ્રિજ પાસે તે ચાલતા રોડ ક્રોસ કરતો હતો ત્યારે પૂરપાટઝડપે આવતી એક થાર ગાડીએ ભાવેશને જોરદાર ટક્કર મારતા તે રોડ પર ફંગોળાયો હતો. તેને સારવાર મળે તે પહેલાં જ તેનું મોત નિપજ્યું હતું. આ અંગે કપુરાઇ પોલીસે થારના ચાલક સામે ગુનો નોંધી વધુ તપાસ હાથ ધરી છે.
અકસ્માતના અન્ય બનાવમાં દિલ્હી-મુંબઇ એક્સપ્રેસ હાઇવે પર વડોદરા નજીક ભાયલી પાસે આજે સવારે એક ટ્રેલરની પ્રેશર પાઇપ ખરાબ થતા ચાલક ખુમાનસિંહ છોગસિંહ રાવતે ટ્રેલર સાઇટ પર પાર્કિંગમાં ઊભું રાખ્યું હતું. બાદમાં ક્લિનર સુરજકુમાર નારાયણલાલ ભાટ (રહે.શેખાવાસ ગામ, તા.ભીમ, જિલ્લો રાજસમલ, રાજસ્થાન) ટ્રેલરમાંથી નીચે ઉતરી પ્રેશર પાઇપ ચેક કરતો હતો ત્યારે પાછળથી પૂરપાટઝડપે આવતા પંજાબ પાસિંગના એક કન્ટેનરે સુરજકુમારને અડફેટમાં લેતા તેનું કરૃણ મોત નિપજ્યું હતું. તાલુકા પોલીસે આ અંગે કાયદેસરની કાર્યવાહી હાથ ધરી છે.