બાળતસ્કરીના નેટવર્કમાં મુંબઇમાં વેચેલા ત્રણ બાળકો અને એજન્ટોનો કોઇ પત્તો નથી

બાળ તસ્કરી ગેંગના નેટવર્કને ભેદવું વડોદરા પોલીસ માટે મોટો પડકાર સાબિત થઇ રહ્યો છે.એક બાળકનો સોદો અટકાવનાર પોલીસ માટે અગાઉ વેચી દેવાયેલા ત્રણ બાળકોને શોધવાનું મુશ્કેલ બન્યું છે.
સિધ્ધપુરના મનોજ રાવળ અને તેની પત્ની વીણા આઠ દિવસના બાળકને મુંબઇ વેચવા જતા હતા ત્યારે વડોદરા ક્રાઇમ બ્રાન્ચના પીએસઆઇ આર એન બારૈયાએ તેમને ઝડપી પાડતાં બાળ તસ્કરીના મોટા રેકેટનો પર્દાફાશ થયો હતો.
આ બનાવની તપાસ પોલીસ કમિશનરે એન્ટિ હ્યુમન ટ્રાફિકિંગ યુનિટના પીઆઇ કે જી લિમ્બાચિયાને સોંપતા તેમણે બાળકનો કબજો જેને સોંપવાનો હતો તે થાણેના ડોક્ટર સચિનદેવ લોખંડે તેમજ વચેટિયા તૌફિક મોમીન અને રિક્ષા ચાલક સોહિલ ઉર્ફે ડોક્ટર મોમીનને ઝડપી પાડયા હતા.
બાળકને સોંપવા મુંબઇ જઇ રહેલો મનોજ રાવળનો સિધ્ધપુરમાં રહેતો સાળો સુનિલ રાવળ માસ્ટર માઇન્ડ હોવાનું ખૂલતાં તેની ધરપકડ કરીને રિમાન્ડ પર લેવાયો છે.જે દરમિયાન તેણે બીજા ત્રણ બાળકોનો પણ મુંબઇમાં સોદો કર્યો હોવાની વિગતો બહાર આવતાં પોલીસ માટે વચેટિયાની ભૂમિકા ભજવનાર રૃપા જૈન,કવિતા,શીતલ અને પ્રવીણની તપાસ મહત્ત્વની બની છે.આ એજન્ટોનો હજી કોઇ પત્તો લાગ્યો નથી.જેથી પોલીસે મોબાઇલ સર્વેલન્સને આધારે તપાસ કરવા ફોરેન્સિક નિષ્ણાતોની મદદ લીધી છે.