પાર્કિંગના મુદ્દે હુમલો કરી રિક્ષાના કાચ તોડી નાખ્યા

માંજલપુર વિસ્તારમાં મજાક મસ્તી દરમિયાન થયેલા ઝઘડાના પગલે આરોપીએ ડંડાથી રિક્ષાચાલક પર હુમલો કરી રિક્ષાના કાચ તોડી નાખ્યા હતા.
વડસર વુડાના મકાનમાં રહેતા રિક્ષાચાલક રાહુલ મોહનભાઈ માળીએ માંજલપુર પોલીસ સ્ટેશનમાં ફરિયાદ નોંધાવી જણાવ્યું છે કે, હું મારી રિક્ષા લઈને પાલમેરા એપાર્ટમેન્ટની આગળ રોડ પર ઊભા હતા. દરમિયાન સવારે સાડા દશ વાગ્યાના સુમારે મારા ઓળખીતા હરિભાઈ માળી ત્યાં આવ્યા હતા અને રિક્ષા અહીં કેમ ઊભી રાખી છે તેવું કહી મારી સાથે મજાક મસ્તી કરવા લાગ્યા હતા. મેં તેઓને મજાક નહીં કરવા કહ્યું હતું. તેઓએ ગાળો બોલી ઝપાઝપી શરૃ કરી હતી. હું હમણા આવું છું, તેવું કહીને જતા રહેલા હરિભાઇ થોડીવાર પછી પોતાના બે સાથીદારોને બોલાવી લાવ્યા હતા અને મારા પર ડંડાથી હુમલો કરી માથાના પાછળ ઇજા પહોંચાડી હતી. તેમજ મારી રિક્ષાનો કાચ પણ તોડી નાખ્યો હતો.