સાયબર ભેજાબાજોની નવી તરકીબ : વાહન બચાવ અને ઈ-ચલણના નામે નકલી એપ્લિકેશનથી છેતરપિંડી

Vadodara Cyber Fraud : ડિજિટલ યુગમાં સાયબર ગુનેગારો લોકો સાથે છેતરપિંડી કરવા માટે રોજ નવી-નવી તરકીબો અપનાવી રહ્યા છે. હાલમાં સોશિયલ મીડિયા અને વોટ્સએપ પર "વાહન બચાવ" અથવા ટ્રાફિક પોલીસના નામે નકલી સંદેશા મોકલી નાગરિકોને છેતરવાના બનાવોમાં વધારો થયો છે.
સાયબર ગઠીયાઓ સૌથી પહેલા વાહન નંબરના આધારે નકલી ઈ-ચલાણનો સંદેશ મોકલે છે. તેમાં ટ્રાફિક નિયમનો ભંગ થયો હોવાનું જણાવી તાત્કાલિક દંડ ભરવા માટે એક લિંક મોકલવામાં આવે છે. આ લિંક સરકારી વેબસાઇટ જેવી દેખાતી હોવા છતાં નકલી હોય છે. તેના પર ક્લિક કરતાં બેંક ખાતાની વિગતો અથવા યુનિફાઇડ પેમેન્ટ્સ ઇન્ટરફેસનો ગુપ્ત નંબર મેળવી નાણાંની છેતરપિંડી કરવામાં આવે છે.
બીજી પદ્ધતિમાં વોટ્સએપ દ્વારા નકલી એન્ડ્રોઇડ એપ્લિકેશન ફાઇલ મોકલી ચલાણની વિગતો જોવા માટે તેને ડાઉનલોડ કરવા કહેવામાં આવે છે. આ એપ્લિકેશનમાં ઘાતક વાયરસ રહેલો હોય છે, જે મોબાઇલમાં પ્રવેશ્યા બાદ ટૂંકા સંદેશા, ફોન કૉલ સહિતની પરવાનગીઓ મેળવી લે છે. પરિણામે ગુનેગારો એક વખતનો પાસવર્ડ વાંચી બેંક ખાતું, સોશિયલ મીડિયા એકાઉન્ટ અને અન્ય વ્યક્તિગત માહિતી પર કબજો મેળવી શકે છે.
સાયબર નિષ્ણાતે સલાહ આપી છે કે વોટ્સએપ અથવા ટૂંકા સંદેશા દ્વારા મળેલી અજાણી લિંક પર ક્લિક ન કરવું. કોઈપણ એપ્લિકેશન માત્ર સત્તાવાર એપ્લિકેશન સ્ટોર પરથી જ ડાઉનલોડ કરવી. શંકાસ્પદ એપ્લિકેશનને સંદેશા અથવા ફોનની પરવાનગી આપવી નહીં તેમજ આવા સંદેશા કે ફાઇલ ગ્રૂપમાં આવે તો સંબંધિત વ્યક્તિને બ્લોક કરી ગ્રૂપમાંથી દૂર કરવાની કાર્યવાહી કરવી.
જો કોઈ વ્યક્તિ આવા સાયબર ફ્રોડનો ભોગ બને તો વિલંબ કર્યા વિના રાષ્ટ્રીય સાયબર હેલ્પલાઈન નંબર 1930 પર સંપર્ક કરવો અથવા સત્તાવાર સાયબર ગુના પોર્ટલ પર ફરિયાદ નોંધાવવાની અપીલ કરવામાં આવી છે.