સિંઘરોટ નજીક સ્પીડ બ્રેકર નહીં દેખાતા પુત્રની બાઇક પરથી નીચે પડી ગયેલી માતાને ગંભીર ઇજા થતા મોત

શહેર નજીકના સિંઘરોટ નજીક સ્પીડ બ્રેકર પર સફેદ પટ્ટા નહીં લગાવવામાં આવતા બાઇક પર પુત્ર સાથે જતી માતા ઉછળીને પડતા ગંભીર ઇજા થતા મોત થયું છે. જે અંગે તાલુકા પોલીસે કાર્યવાહી હાથ ધરી છ ે.
પોલીસ સૂત્રો દ્વારા મળતી માહિતી મુજબ, સિંઘરોટ શ્રમ મંદિર નજીક રહેતા કૈલાસબેન રાવજીભાઇ મકવાણા તેમના પુત્ર સાથે ગત ૨૫ મી તારીખે હાલોલ તાલુકાના એક ગામમાં બેસણામાં ગયા હતા. ત્યાંથી પરત ઘરે આવતા સમયે ગામ નજીક બનાવેલું સ્પીડ બ્રેકર નહીં દેખાતા બાઇક પર બેઠેલા કૈલાસબેન ઉછળીને નીચે પટકાતા ગંભીર ઇજા થતા સારવાર દરમિયાન તેઓનું મોત થયું છે. ઉલ્લેખનીય છે કે, સ્પીડ બ્રેકર પર સફેદ પટ્ટા નહીં લગાવવામાં આવતા સાંજે અને રાત્રે વાહન ચાલકો અટવાઇ જાય છે. શહેરમાં પણ ઘણા સ્થળે આ રીતે સ્પીડ બ્રેકરના કારણે અકસ્માત થાય છે.