સરદાર એસ્ટેટ ચાર રસ્તા ખાતે ડ્રેનેજ લાઈન શિફ્ટ કરવા રૂ. 61.39 લાખથી વધુનો ખર્ચ
Summarized by AI; it may make mistakes. Check important info
Summarized by AI; it may make mistakes. Check important info
Vadodara Corporation : વડોદરાના આજવા રોડ સરદાર એસ્ટેટ ચાર રસ્તા ખાતે બની રહેલા નવા ફ્લાયઓવર બ્રિજની કામગીરીમાં નડતરરૂપ ડ્રેનેજ લાઈન ખસેડવા માટે મહાનગરપાલિકાએ રૂ.61,39,875નો ખર્ચ કર્યો છે. જીએસટી અલગથી ચૂકવવાનો રહેશે. આ કામગીરી જીપીએમસી એક્ટની કલમ 67(3)(સી) હેઠળ માનસી કોર્પોરેશન પાસેથી કરાવવામાં આવી હતી. થયેલા ખર્ચને જાણવા લેવા માટે સ્થાયી સમિતિમાં દરખાસ્ત રજૂ કરવામાં આવી છે.
સરદાર એસ્ટેટ ચાર રસ્તા ખાતે ડ્રેનેજ લાઈનનું મશીન હોલ આવેલું હતું. ફ્લાયઓવર બ્રિજના પિયર પાઈલની કામગીરીમાં આ મશીન હોલ નડતરરૂપ હોવાથી તેને ખસેડવાની જરૂરિયાત ઊભી થઈ હતી. આ માટે માનસી કોર્પોરેશનને તા.20 જાન્યુઆરી, 2026થી વર્ક ઓર્ડર આપવામાં આવ્યો હતો.
ડ્રેનેજ લાઈન ખસેડવાની કામગીરી મેન્યુઅલ પુશિંગ પદ્ધતિથી કરવામાં આવી હતી. આ કામગીરીનો અંદાજિત ખર્ચ રૂ.52,47,756 હતો, જ્યારે કોન્ટ્રાક્ટરે અંદાજ કરતાં 17 ટકા વધુ એટલે કે રૂ.61,39,875માં કામગીરી કરવા સંમતિ દર્શાવી હતી. આમ, અંદાજિત રકમ કરતાં રૂ.8,92,119 વધુ ખર્ચ થયો છે.
