જી.એસ.એફ.સી. બ્રિજ પર ઊભેલી ટ્રકમાં બાઇક ઘુસી જતા પતિનું મોત, પત્ની ઘાયલ

વહેલી સવારે સવા સાત વાગ્યે જી.એસ.એફ.સી. બ્રિજ પર ઊભેલા ટ્રકમાં પાછળથી બાઇક ઘુસી જતા દંપતી પૈકી પતિનું મોત થયું છે.જ્યારે પત્ની હજી સારવાર હેઠળ છે.
પોલીસ સૂત્રો દ્વારા મળતી માહિતી મુજબ, આણંદ તાલુકાના ખંભોળેજ ગામ ઇન્દિરાનગરમાં રહેતા કિરણભાઇ દિનેશભાઇ પઢિયાર (ઉં.વ.૨૬) આજે સવારે બાઇક લઇને સંબંધીના ઘરે સીમંત પ્રસંગે જવા નીકળ્યા હતા. વાસદથી સુરત તરફ જતા હાઇવે જી.એસ.એફ.સી.બ્રિજ પર ઊભેલા ટેન્કરમાં પાછળથી તેઓની બાઇક ઘુસી જતા કિરણભાઇ તથા તેમના પત્નીને ગંભીર ઇજા થઇ હતી. તેઓને સારવાર માટે સયાજી હોસ્પિટલમાં લઇ જવામાં આવતા ડોક્ટરે કિરણભાઇનું મોત થયું હોવાનું જણાવ્યું હતું. જ્યારે તેમના પત્ની સારવાર હેઠળ છે. છાણી પોલીસે આ અંગે ગુનો દાખલ કરી કાયદેસરની કાર્યવાહી હાથ ધરી છે.