આરટીઓમાં ટેકનિકલ ખામીથી ડ્રાઈવિંગ ટેસ્ટના અરજદારો અટવાયા

અત્રેના દરજીપુરા આરટીઓ ખાતે એઆઈ આધારિત ડ્રાઇવિંગ ટેસ્ટ ટ્રેક પર આજે સવારે ટેકનિકલ ખામી સર્જાતા ડ્રાઇવિંગ ટેસ્ટ આપવા પહોંચેલા અરજદારો મુશ્કેલીમાં મુકાયા હતા.

વડોદરા જિલ્લામાં દરજીપુરા આરટીઓ ખાતે એકમાત્ર એ.આઈ. આધારિત ડ્રાઈવિંગ ટેસ્ટ ટ્રેક હોવાથી આસપાસના ગામોમાંથી અરજદારો લાંબુ અંતર કાપીને અહીં પહોંચતા હોય છે. આજે ડ્રાઈવિંગ ટેસ્ટ પ્રક્રિયા ચાલી રહી હતી ત્યારે ટેકનિકલ સમસ્યાથી કામગીરી અટકી પડતા અરજદારોને હાલાકી વેઠવાનો વારો આવ્યો હતો.

 ટુ-વ્હીલર ડ્રાઇવિંગ ટેસ્ટ દરમિયાન અરજદાર ટ્રેક પાસે પહોંચે ત્યારે સ્વસંચાલિત કેમેરા દ્વારા તેનો ફોટો લેવામાં આવે છે. જોકે સર્વરમાં ખામી સર્જાતા ફોટો લેવાની પ્રક્રિયા અટકી પડી હતી. પરિણામે લગભગ ૩૫ જેટલા અરજદારોના ડ્રાઇવિંગ ટેસ્ટમાં વિલંબ થયો હતો. લાંબા સમય સુધી રાહ જોવી પડતાં અરજદારોમાં નારાજગી જોવા મળી હતી. જોકે બપોર બાદ સમસ્યાનો ઉકેલ આવતા ડ્રાઇવિંગ ટેસ્ટની પ્રક્રિયા ફરી રાબેતા મુજબ શરૃ થતાં અરજદારોને રાહત થઈ હતી.