ભારતમાલા હાઇવે પર ટ્રક મૂકી ચાલક ફરાર, ૭૦ લાખનો દારૃ મળ્યો

સાવલી તાલુકામાં દોડકા ગામની સીમમાંથી પસાર થતા ભારતમાલા એક્સપ્રેસ-વે પર એક ટ્રકમાંથી ૫૫૬૯૨ નંગ દારૃની બોટલો મળી કુલ રૃ.૮૪.૧૯ લાખનો મુદ્દામાલ જિલ્લા પોલીસે ઝડપી પાડયો છે જ્યારે પોલીસને જોઇ ટ્રક મૂકી ફરાર થઇ ગયેલા ચાલક સહિત અન્યને ઝડપી પાડવાના ચક્રો ગતિમાન કરાયા છે.
સાવલીના દોડકા ગામની સીમમાથી પસાર થતા ભારતમાલા એક્સપ્રેસ હાઈવે પર ગઇ સાંજે જિલ્લા એલસીબી સ્ટાફ પેટ્રોલિંગમાં હતો ત્યારે બાતમી મળેલ કે વડોદરા-ગોધરા ટ્રેક પર એક ટ્રક દારૃનો જથ્થો લઈને પસાર થઈ રહી છે. આ માહિતીના આધારે દોડકા ગામની સીમમાં એક્સપ્રેસ-વે પર વોચ ગોઠવી હતી. દરમિયાન રાજસ્થાન પાસિંગની ટાટા આઈશર ટ્રક દેખાતા તેને રોકવાનો પ્રયાસ કરવામાં આવ્યો હતો.
જો કે ચાલક પોલીસને જોઇ દોડકા ટોલનાકા પહેલાં ટ્રક રસ્તાની બાજુમાં મૂકી ફરાર થઈ ગયો હતો. ત્યારબાદ પોલીસે ટ્રકમાં તપાસ કરતાં દારૃની ૧૧૫૨ નંગ પેટીઓ મળી હતી. જેની ગણતરી દરમિયાન રૃા.૬૯.૧૨ લાખ કિંમતની ૫૫,૨૯૬ નંગ બોટલો જણાઇ હતી. પોલીસે ટ્રક, જીપીએસ ટ્રેકર, તાડપત્રી અને દોરડા સહિત કુલ રૃ.૮૪.૧૯ લાખનો મુદ્દામાલ કબ્જે કર્યો છે.
ફરાર ટ્રક ચાલક તેમજ દારૃ સપ્લાય કરનાર અને મંગાવનાર શખ્સો સામે ભાદરવા પોલીસ સ્ટેશનમાં ગુનો નોંધી પોલીસે વધુ તપાસ હાથ ધરી છે.