ટેન્સાઇલ સ્ટીલ કંપની વિવાદમાં એફઆઈઆર નોંધવા કોર્ટનો હુકમ

અત્રેની અદાલતે ટેન્સાઇલ સ્ટીલ લિમિટેડના ડિરેક્ટરશિપ વિવાદમાં ક્રાઈમ બ્રાન્ચને એફઆઈઆર નોંધવાનો આદેશ કર્યો છે.

ફરિયાદી કિશોર જગજીવનદાસ સુરતવાલાએ સંજયકુમાર પટેલ, ધર્મેશકુમાર અમીન અને પીન્કેશ રાય સામે અરજી કરી હતી. ફરિયાદ મુજબ તેઓ વર્ષ ૨૦૧૮થી કંપનીમાં ડિરેક્ટર હતા અને રાજીનામું આપ્યા વગર જ તેમને પદ પરથી દૂર કરી દેવાયા હતા. આરોપીઓએ કરોડોની કિંમતની કંપનીની જમીન કબજે કરવા માટે બનાવટી દસ્તાવેજો તૈયાર કરી કાવતરું રચ્યું હોવાનો આક્ષેપ કરાયો છે.

કોર્ટમાં રજૂ થયેલા ડીસીબીના રિપોર્ટમાં ફરિયાદી સામે નોંધાયેલા ગુના અને હાલની ફરિયાદ બંનેની તપાસ એક જ પોલીસ અધિકારી કરી રહ્યા હોવાનું જણાવાયું છે. કોર્ટે નોંધ્યું કે પ્રથમ દ્રષ્ટિએ કોગ્નિઝેબલ ગુનો બનતો હોવા છતાં ફરિયાદ નોંધવામાં આવી નથી અને તે અંગે કોઈ સંતોષકારક કારણ પણ આપવામાં આવ્યું નથી.

આથી અદાલતે ફરિયાદીની અરજી મંજૂર કરી ક્રાઈમ બ્રાન્ચને આરોપીઓ સામે પ્રથમ દર્શનીય ગુનો નોંધવાનો હુકમ કર્યો છે.