લોન નહિ ભરનાર દંપતી મકાનનું સીલ તોડી ઘરમાં ઘૂસી ગયું

ગોત્રી વિસ્તારના એક મકાન પર લોન લીધા બાદ હપ્તા નહિ ભરનાર દંપતીએ મકાનનું સીલ તોડીને અંદર પ્રવેશ કરતાં બંને સામે પોલીસ ફરિયાદ નોંધાઇ છે.
સારાભાઇ કેમ્પસમાં આવેલી બિરલા કેપિટલ લિ.ના કલેક્શન મેનેજર મેહુલ ઠક્કરે પોલીસને કહ્યું છે કે,ગોત્રીના પુષ્પમ ટેનામેન્ટમાં મકાન ધરાવતા રાજુ મશીલકર અને તેની પત્નીના નામે મકાન પર કુલ રૃ.૯૭ લાખની લોન લેવામાં આવી હતી.પરંતુ ત્યારબાદ લોનના હપ્તા નહિ ભરતાં કંપનીએ કોર્ટ કાર્યવાહી કરી મકાનનો કબજો લીધો હતો.
કંપનીએ મકાન પર ગાર્ડ પણ મૂક્યો હતો.જે ગાર્ડ ગઇ તા.૧૦મી જૂને રજા પર જતાં દંપતીએ સીલ અને તાળાં તોડીને અંદર પ્રવેશ કર્યો હતો તેમજ બહાર નીકળવાનો ઇનકાર કરી અરજીઓ કરી છે તેવી દલીલો કરી હતી.જેથી લક્ષ્મીપુરા પોલીસે આ અંગે દંપતી સામે ગુનો નોંધ્યો છે.