૨૫ દિવસ અગાઉ અકસ્માતમાં ઘાયલ યુવકનું મોત

માણેજામાં કારની ટક્કરે ઘાયલ ૨૨ વર્ષના યુવકનું સારવાર દરમિયાન મોત થયું છે. જે અંગે મકરપુરા પોલીસે ગુનો દાખલ કરી કારના નંબરના આધારે ચાલકની શોધખોળ હાથ ધરી છે.
માણેજા વુડાના મકાનમાં રહેતો ૨૨ વર્ષનો યશ વિષ્ણુભાઇ ઠાકોર ગત ૨૦ મી જુલાઇએ રાત્રે ૧૦ વાગ્યે બનેવી વિજયભાઇ પાટણવાડિયાની બાઇક લઇને કેલનપુર ખાતે રહેતા સંબંધીના ઘરે જતો હતો. તે દરમિયાન માણેજા વિસ્તારમાં જ એક કારચાલકે તેને અડફેટે લેતા તે રોડ પર ફંગોળાઇને પડતા માથામાં ગંભીર ઇજા થઇ હતી. તેને સારવાર માટે નજીકની ખાનગી હોસ્પિટલમાં લઇ જવામાં આવ્યો હતો. ત્યારબાદ ઇજાગ્રસ્તને વધુ સારવાર માટે સયાજી હોસ્પિટલમાં દાખલ કરવામાં આવ્યો હતો. જ્યાં સારવાર દરમિયાન તેનું મોત થયું હતું.