સંગમ ચાર રસ્તા પાસે વાહન ચાલક અને ટોઇંગ ક્રેનના સ્ટાફ વચ્ચે ઝપાઝપી

સંગમ ચાર રસ્તા પાસે ટુ વ્હીલર ટોઇંગ કરતા વાહન ચાલક અને ટોઇંગ ક્રેનના કર્મચારી વચ્ચે ઉગ્ર બોલાચાલી થયા પછી મામલો ઝપાઝપી સુધી પહોંચી ગયો હતો. જોકે, સ્થળ પર હાજર લોકોએ મધ્યસ્થી કરતા મામલો શાંત પડયો હતો.
મળતી માહિતી મુજબ, આજે બપોરે સંગમ ચાર રસ્તા પાસે એક ટુ વ્હીલરને ટ્રાફિક પોલીસની ટોઇંગ ક્રેન દ્વારા ટોઇંગ કરવામાં આવ્યું હતું. તે દરમિયાન વાહન ચાલક દોડી આવ્યો હતો. તેની દલીલ હતી કે, મારૃં ટુ વ્હીલર સફેદ પટ્ટાની અંદર જ પાર્ક હતું. જ્યારે ટ્રાફિક પોલીસની દલીલ હતી કે,તમારૃં વાહન સફેદ પટ્ટાની બહાર હતું. આ બાબતે ઉગ્ર બોલાચાલી પછી ક્રેન પર કામ કરતા યુવક સાથે વાહન ચાલકને ઝપાઝપી પણ થઇ હતી. આ અંગે વારસિયા પોલીસને જાણ થતા સ્ટાફ ઘટના સ્થળે દોડી આવ્યો હતો. જોકે, બંને પક્ષ વચ્ચે સમાધાનની વાતચીત ચાલી રહી છે. હજી સુધી કોઇ ગુનો દાખલ થયો નથી. ઉલ્લેખનીય છે કે, વાહન ટોઇંગ કરતા પહેલા વીડિયોગ્રાફી અને ફોટા પાડવામાં આવે છે. જેના કારણે આવી તકરાર ના થાય, આ કિસ્સામાં વાહન ટોઇંગ કરતા પૂર્વેે ફોટા લીધા નહીં હોવાનું જાણવા મળ્યું છે.