બાબરાના ખંભાળામાં SMCના દરોડા: 8.44 લાખનો વિદેશી દારૂ ઝડપાયો, 2ની ધરપકડ અને 3 ફરાર

Amreli Crime News: અમરેલી જિલ્લાના બાબરા તાલુકાના ખંભાળા ગામે સ્ટેટ મોનિટરિંગ સેલ (SMC)ની ટીમે દરોડો પાડી વિદેશી દારૂનો મોટો જથ્થો ઝડપી પાડ્યો છે. ખંભાળાના ગ્રાસલેન્ડ વિસ્તારમાં આવેલા વોટર સંપ બિલ્ડિંગ ખાતે પાડવામાં આવેલા આ દરોડામાં પોલીસ બે શખસો સહિત કુલ 19,51,700 રૂપિયાનો મુદ્દામાલ જપ્ત કર્યો છે.

વિદેશી દારૂની 3,013 બોટલો મળી આવી

મળતી માહિતી મુજબ, SMCની ટીમે ચોક્કસ બાતમીના આધારે ખંભાળા વોટર સંપ બિલ્ડિંગ પાસે દરોડો પાડ્યો હતો. આ કાર્યવાહી દરમિયાન પોલીસે ભારતીય બનાવટના વિદેશી દારૂની 3,013 બોટલો (કિંમત રૂ. 8,44,507) તથા દારૂની હેરાફેરી માટે ઉપયોગમાં લેવાયેલા 3 વાહનો સહિત કુલ રૂ. 19.51 લાખથી વધુનો મુદ્દામાલ કબજે કર્યો છે.

દરોડા દરમિયાન પોલીસે ઘટનાસ્થળેથી બે આરોપીઓ રવિરાજ ખાચર અને રઘુવીર ખાચરની ધરપકડ કરી કાયદેસરની કાર્યવાહી હાથ ધરી છે. જ્યારે આ પ્રકરણમાં સંડોવાયેલા અન્ય ત્રણ આરોપીઓ લાલા ગરાણિયા, મૌલિક તેરૈયા અને દેશુરભાઈ ગઢવી ફરાર થઈ જતાં પોલીસે તેમને વોન્ટેડ જાહેર કરીને તપાસના ચક્ર ગતિમાન કર્યા છે.