ગુજરાતમાં આજે TAT HS ની મેઈન્સ એક્ઝામ, 52000 જેટલા ઉમેદવારો માટે 280 જેટલા કેન્દ્રની વ્યવસ્થા

રાજ્યની ઉચ્ચતર માધ્યમિક શાળાઓને નવા શિક્ષકો નિમવા માટેની મહત્વપૂર્ણ 'ટાટ-એચએસ' (TAT-HS) મુખ્ય પરીક્ષા માટે સમગ્ર ગુજરાતમાં વહીવટી તંત્ર સજ્જ બન્યું છે. પ્રિલિમ પરીક્ષાના પડકારને પાર કરીને 70થી વધુ માર્ક્સ મેળવનારા 51,971 ઉમેદવારો માટે આ નિર્ણાયક તબક્કો છે. રાજ્ય પરીક્ષા બોર્ડ દ્વારા 279 સેન્ટરો પર ચુસ્ત અને પારદર્શી વાતાવરણમાં કસોટી લેવાની તમામ તૈયારીઓને આખરી ઓપ આપી દેવાયો છે.

અમદાવાદમાં કડક સુરક્ષા મોનિટરિંગ

અમદાવાદ શહેરની વાત કરીએ તો અહીં 11,865 પરીક્ષાર્થીઓ માટે 67 કેન્દ્રો ફાળવવામાં આવ્યા છે. પરીક્ષામાં કોઈપણ પ્રકારની ગેરરીતિ ન થાય તે માટે જિલ્લા શિક્ષણાધિકારી (DEO) કચેરીએ સીસીટીવી કંટ્રોલ રૂમ અને વિશેષ ટીમો તૈનાત કરી છે. સુપરવાઈઝર અને સરકારી પ્રતિનિધિઓને પહેલેથી જ પ્રોટોકોલ અંગેની સ્પષ્ટ સૂચનાઓ આપી દેવામાં આવી છે.

વરસાદી વિઘ્ન બાદ હવે બે શિફ્ટમાં બેટિંગ

અગાઉ ધોધમાર વરસાદના કારણે આ પરીક્ષા બે વખત લંબાવવી પડી હતી. જોકે હવે હવામાન સાનુકૂળ થતાં બોર્ડની માર્ગદર્શિકા મુજબ જ બે અલગ-અલગ સેશનમાં પરીક્ષા યોજાશે:

• પ્રથમ સત્ર: સવારે 10:30 થી બપોરે 1:30 વાગ્યા સુધી

• બીજું સત્ર: બપોરે 3:00 થી સાંજે 6:00 વાગ્યા સુધી

ઉલ્લેખનીય છે કે, શરૂઆતમાં 1.47 લાખથી વધુ ફોર્મ ભરાયા હતા, જેમાંથી માત્ર કટ-ઓફ પાર કરનાર ઉમેદવારો જ આ તબક્કે પહોંચ્યા છે.

21 વિષયો માટે યોજાશે કસોટી

આ કસોટીથી વિજ્ઞાન પ્રવાહ (ગણિત, ભૌતિકવિજ્ઞાન, રસાયણવિજ્ઞાન, જીવવિજ્ઞાન), ભાષાઓ (ગુજરાતી, હિન્દી, અંગ્રેજી, સંસ્કૃત) ઉપરાંત વાણિજ્ય, સામાજિક વિજ્ઞાન, કોમ્પ્યુટર અને શારીરિક શિક્ષણ જેવા 21 વિષયો માટે યોગ્ય ઉમેદવારોની પસંદગી કરવામાં આવશે.