બુલેટ ટ્રેન પ્રોજેક્ટ: અમદાવાદમાં અનુપમ ફ્લાયઓવર પર 80 મીટર લાંબો, 1004 ટન વજન ધરાવતો સ્ટીલ બ્રિજ લૉન્ચ કરાયો

Mumbai Ahmedabad Bullet Train Project: મુંબઈ-અમદાવાદ બુલેટ ટ્રેન પ્રોજેક્ટે વધુ એક એન્જિનિયરિંગ સીમાચિહ્ન હાંસલ કર્યું છે. અમદાવાદમાં અનુપમ ફ્લાયઓવર (રેલવે ઓવર બ્રિજ) પર 80 મીટર લાંબા 'મેક ઇન ઇન્ડિયા' સ્ટીલ બ્રિજનું સફળ લોન્ચિંગ થયું છે. પશ્ચિમ રેલવે(સાબરમતી-વટવા વિભાગ)ની અમદાવાદ-મુંબઈ મુખ્ય લાઇન પર બાંધવામાં આવેલ અનુપમ ફ્લાયઓવર(રેલવે ઓવર બ્રિજ), ખોખરા એપેરલ પાર્ક મેટ્રો સ્ટેશન અને કાંકરિયા તળાવને જોડતી એક રોડ લિંક છે. બુલેટ ટ્રેન વાયાડક્ટ આ રેલવે લાઇનની સમાંતર ચાલે છે.

કેમ વધુ લંબાઈવાળા સ્પાનની આવશ્યકતા ઊભી થઈ?

અમદાવાદ જિલ્લામાં, બુલેટ ટ્રેન વાયાડક્ટનું નિર્માણ મુખ્યત્વે સ્પાન-બાય-સ્પાન (SBS) કન્સ્ટ્રક્શન પદ્ધતિનો ઉપયોગ કરીને કરવામાં આવી રહ્યું છે, જેમાં સામાન્ય સ્પાનની લંબાઈ 30થી 50 મીટર સુધીની હોય છે. જો કે, અનુપમ ફ્લાયઓવર ક્રોસિંગ પર, થાંભલાઓને હયાત ફ્લાયઓવરની બંને બાજુએ ગોઠવવા જરૂરી હતા, જેના માટે 80 મીટરની વધુ લંબાઈવાળા સ્પાનની આવશ્યકતા ઊભી થઈ હતી.

મહારાષ્ટ્રના વર્ધામાં નિર્માણ

14 મીટરની ઊંચાઈ અને 14.4 મીટરની પહોળાઈ ધરાવતો 1,004 મેટ્રિક ટન વજનનો આ સ્ટીલ બ્રિજ મહારાષ્ટ્રના વર્ધા(નાગપુર)માં આવેલી ઝેટવર્કની મેન્યુફેક્ચરિંગ ફેસિલિટી ખાતે તૈયાર કરવામાં આવ્યો હતો, અને તેને બાંધકામના સ્થળે પરિવહન કરવામાં આવ્યો હતો. બ્રિજને એસેમ્બલ કરવા અને લોન્ચ કરવા માટે 10.8 મીટર x 140 મીટર માપની અને આશરે 1,110 મેટ્રિક ટન વજન ધરાવતી ખાસ ડિઝાઇન કરાયેલી કામચલાઉ લોન્ચિંગ વ્યવસ્થા ઊભી કરવામાં આવી હતી.

સુરક્ષિત અને ટકાઉ હશે બુલેટ ટ્રેન સ્ટીલ બ્રિજ

આ બ્રિજ જમીન સ્તરથી આશરે 18 મીટર ઉપર કામચલાઉ ટ્રેસ્ટલ્સ પર 18 સ્કીડ એરેન્જમેન્ટ્સ અને 35,602 ટોર્ક-શીયર ટાઇપ હાઇ સ્ટ્રેન્થ(ટીટીએચએસ) બોલ્ટનો ઉપયોગ કરીને એસેમ્બલ કરવામાં આવ્યો હતો, માળખાની લાંબા ગાળાની ટકાઉપણું વધારવા અને કંપન નિયંત્રણ માટે તેને સી 5 પ્રોટેક્ટિવ પેઇન્ટિંગ સિસ્ટમ અને ઇલાસ્ટોમેરિક બેરિંગ્સ પૂરા પાડવામાં આવ્યા છે.

ગુજરાતમાં 15 બુલેટ ટ્રેન સ્ટીલ બ્રિજની કામગીરી પૂર્ણ

એસેમ્બલી પૂર્ણ થયા પછી, હાઇડ્રોલિક જેકનો ઉપયોગ કરીને કામચલાઉ લોન્ચિંગ સ્ટ્રક્ચર પર સમગ્ર બ્રિજને લંબાઈની દિશામાં લોન્ચ કરવામાં આવ્યો હતો. તમામ બાંધકામ અને સલામતી ધોરણોનું કડક પાલન કરીને જાહેર જનતાની સુરક્ષા સુનિશ્ચિત કરવા માટે સ્થાનિક સત્તાવાળાઓ પાસેથી મેળવેલા આયોજિત ટ્રાફિક બ્લોક દરમિયાન આ કામગીરી હાથ ધરવામાં આવી હતી. લંબાઈની દિશામાં લોન્ચિંગ કર્યા પછી, બુલેટ ટ્રેન વાયાડક્ટ સાથે તેનું ચોક્કસ અંતિમ સંરેખણ પ્રાપ્ત કરવા માટે બ્રિજને કાળજીપૂર્વક સાઇડ સ્લ્યુ કરવામાં આવ્યો હતો. આ સિદ્ધિ સાથે, ગુજરાતમાં આયોજિત 17 સ્ટીલ બ્રિજમાંથી 15 બ્રિજની કામગીરી પૂર્ણ થઈ ગઈ છે. મુંબઈ-અમદાવાદ બુલેટ ટ્રેન કોરિડોર માટે એકંદર 28 સ્ટીલ બ્રિજનું આયોજન કરવામાં આવ્યું છે.