બાંગ્લાદેશ લિંક ધરાવતી આંતરરાજ્ય બોમ્બ ધમકી ઈ-મેઇલ સિન્ડિકેટનો પર્દાફાશ, બે મુખ્ય આરોપીઓની ધરપકડ

Gujarat Cyber Center Of Excellence Bomb Threat Syndicate: ગુજરાત પોલીસના સાઇબર સેન્ટર ઓફ એક્સેલન્સે સરકારી કચેરીઓ, શાળાઓ, કોલેજો અને અદાલતોને બોમ્બથી ઉડાવી દેવાની ધમકી આપતા ઈ-મેઇલ મોકલવામાં કથિત રીતે સંકળાયેલી એક આંતરરાજ્ય સિન્ડિકેટનો પર્દાફાશ કર્યો છે. તપાસકર્તાઓને આ નેટવર્કના તાર બાંગ્લાદેશ સાથે જોડાયેલા હોવાના અને નાણાકીય વ્યવહારો માટે ક્રિપ્ટોકરન્સીનો ઉપયોગ થતો હોવાના પુરાવા મળ્યા છે.

બાંગ્લાદેશ લિંક ધરાવતી આંતરરાજ્ય બોમ્બ ધમકી ઈ-મેઇલ સિન્ડિકેટનો પર્દાફાશ

10 સપ્ટેમ્બરના રોજ બિહાર અને ઝારખંડમાં હાથ ધરાયેલા એક સંયુક્ત ઓપરેશન દરમિયાન આ કેસના બે મુખ્ય આરોપીઓની ધરપકડ કરવામાં આવી હતી. ગુજરાતમાં બોમ્બથી ઉડાવી દેવાની ધમકી મોકલવા બદલ એક આરોપી રોશનકુમાર રાજેન્દ્રકુમાર ભૂમિહાર(રાય)ની બિહારના ભાગલપુરથી અટકાયત કરાઈ હતી. જ્યારે ધમકીભર્યા મેઇલના મુખ્ય સૂત્રધાર અને ઈ-મેઇલ ક્રેડેન્શિયલ્સ પૂરા પાડનાર ગુલશનકુમાર કૌશલ સિંહની ઝારખંડના દેવઘરથી ધરપકડ કરવામાં આવી હતી.

પોલીસના જણાવ્યા અનુસાર, 10 સપ્ટેમ્બરના રોજ સવારે 4:09 વાગ્યે jondmoragn52627@gmail.com નામના ઈ-મેઇલ આઇડી પરથી ધમકીભર્યો મેઇલ મળ્યા બાદ આ તપાસ શરૂ કરવામાં આવી હતી. ગુજરાત સરકારના કાયદા અને સંસદીય બાબતોના વિભાગને મોકલવામાં આવેલા આ ઈ-મેઇલમાં ગુજરાતના મુખ્યમંત્રી કાર્યાલય, ગુજરાત વિધાનસભા ઉપરાંત દેશના વડાપ્રધાન અને કેન્દ્રીય ગૃહમંત્રીને બોમ્બથી ઉડાવી દેવાની ધમકી આપવામાં આવી હતી. આ ઉપરાંત, ચાલુ બ્રિક્સ (BRICS) શિખર સંમેલન દરમિયાન ભારતને સમર્થન આપતા દેશોને પણ ધમકી આપવામાં આવી હતી.

સાઇબર સેન્ટર ઓફ એક્સેલન્સની ટેકનિકલ ટીમે આ ઈ-મેઇલનું પૃથ્થકરણ કરીને તેના ડિજિટલ ટ્રેઇલને બિહારના ભાગલપુર સુધી શોધ્યો હતો. તપાસના આધારે પોલીસે સૌપ્રથમ રોશનકુમાર ભૂમિહારની ધરપકડ કરી હતી.

ધમકી મોકલવા માટે ઉપયોગમાં લેવાયેલું ઈ-મેઇલ આઇડી ઝારખંડના રહેવાસીનું

પૂછપરછ દરમિયાન પોલીસને જાણવા મળ્યું હતું કે ધમકી મોકલવા માટે ઉપયોગમાં લેવાયેલું ઈ-મેઇલ આઇડી ઝારખંડના દેવઘરના રહેવાસી ગુલશનકુમાર કૌશલ સિંહે આપ્યું હતું. ત્યારબાદ ટેકનિકલ સર્વેલન્સ અને ફિલ્ડ ટીમોનું સંયુક્ત ઓપરેશન હાથ ધરીને ગુલશન સિંહની પણ દેવઘરથી ધરપકડ કરવામાં આવી હતી. મુખ્ય આરોપી પાસેથી 5 લાખ યુનિક ઈ-મેઇલ આઇડી અને તેના પાસવર્ડ્સ ધરાવતી યાદી મળી આવ્યા બાદ આ તપાસે વધુ ગંભીર વળાંક લીધો છે.

તપાસકર્તાઓના જણાવ્યા અનુસાર, ઓથેન્ટિકેશન મિકેનિઝમને બાયપાસ કરવા માટે અત્યાધુનિક પદ્ધતિઓનો ઉપયોગ કરીને આ ક્રેડેન્શિયલ્સ બનાવવામાં આવ્યા હતા. આ ઈ-મેઇલ આઇડીનો ઉપયોગ સરકારી સંસ્થાઓ, શાળાઓ, કોલેજો અને અદાલતોને ધમકીભર્યા સંદેશાઓ મોકલવા ઉપરાંત અન્ય સાઇબર ગુનાઓ અને ગેરકાયદેસર પ્રવૃત્તિઓ માટે કરવાનો હતો.

પોલીસે વધુમાં દાવો કર્યો છે કે આરોપીઓએ આ ક્રેડેન્શિયલ્સ અન્ય દેશવિરોધી તત્ત્વોને પૂરા પાડ્યા હતા અને આ નેટવર્કને બાંગ્લાદેશમાં બેઠેલા સહયોગીઓ પાસેથી નાણાકીય સહાય અને માર્ગદર્શન મળી રહ્યું હતું. નાણાકીય વ્યવહારો માટે ક્રિપ્ટોકરન્સી વોલેટનો ઉપયોગ થતો હોવાનું પણ સામે આવ્યું છે.

પોલીસે જણાવ્યું કે આ ઈ-મેઇલ આઇડીની યાદી બાંગ્લાદેશના સહયોગીઓ સાથે પણ શેર કરવામાં આવી હતી. આ 5,13,847 એકાઉન્ટ્સ કેવી રીતે બનાવવામાં આવ્યા હતા, તેનો એક્સેસ કોની પાસે હતો અને તેનો ઉપયોગ અન્ય બોમ્બ ધમકી કે સાઇબર ક્રાઇમના કેસોમાં થયો છે કે કેમ તે જાણવા માટે ઊંડાણપૂર્વકની ટેકનિકલ તપાસ ચાલી રહી છે.

ત્રણ રાજ્યોમાં ઓપરેશન

ગુજરાતમાં સરકારી કચેરીઓ, શૈક્ષણિક સંસ્થાઓ અને અદાલતોને સતત મળી રહેલા ધમકીભર્યા ઈ-મેઇલ્સના સિલસિલા વચ્ચે આ મોટી કામગીરી કરવામાં આવી છે. આ ઓપરેશન ત્રણ રાજ્યોમાં એક સાથે હાથ ધરવામાં આવ્યું હતું, જેમાં સાઇબર સેન્ટર ઓફ એક્સેલન્સને ગાંધીનગર પોલીસ(ગુજરાત), ભાગલપુર પોલીસ(બિહાર) અને દેવઘર પોલીસ(ઝારખંડ) તરફથી મદદ મળી હતી.

પોલીસની જાહેર જનતાને અપીલ

• બોમ્બની ધમકી આપતા ઈ-મેઇલ મળવા પર નાગરિકોએ ગભરાવું નહીં.
• આવા મેઇલ મળતાં જ તાત્કાલિક સ્થાનિક પોલીસ અથવા સાઇબર ક્રાઇમ હેલ્પલાઇન નંબર 1930 પર જાણ કરવી.
• ધમકીભર્યા ઈ-મેઇલ, સ્ક્રીનશોટ કે અપ્રમાણિત માહિતીને સોશિયલ મીડિયા પર ડિલીટ, ફોરવર્ડ કે શેર ન કરવી અને મોકલનાર સાથે કોઈ પણ પ્રકારનો સંપર્ક કરવો નહીં.