શહેરની વોરાબજાર પોસ્ટ ઓફિસ બંધ કરી દેવાઇ

- ૧૫ પોસ્ટમેનની જગ્યા ખાલી : પોસ્ટની ડિલિવરી સમયસર થાય તેવો પ્રબંધ કરવા રજૂઆત

ભાવનગર, બુધવાર તા. 03 જાન્યુઆરી 2018

શહેરની વોરાબજાર પોસ્ટ ઓફિસ બંધ કરી દેવામાં આવેલ છે. જે અંગે સુપ્રિ. ઓફ પોસ્ટ તથા સમગ્ર પોસ્ટ ખાતુ નિંભર તંત્રની જેમ કામગીરી કરે છે તેવી ટીકા ભાવનગર ડિસ્ટ્રીક્ટ ચેમ્બર ઓફ ઇન્ડસ્ટ્રીઝે કરી છે.

પોસ્ટ સેવાની કથળેલી હાલત અંગે સુપ્રિ. ઓફ પોસ્ટ-ભાવનગર ડિવિઝન અને પોસ્ટ માસ્ટર, ભાવનગર પોસ્ટ ઓફિસને કરવામાં આવેલી અલગ-અલગ રજૂઆતમાં જણાવાયું છે કે, હેડ પોસ્ટ ઓફીસની પોસ્ટની ડીલીવરીની કામગીરીમાં કોઇપણ પ્રકારનો સુધારો થયેલ નથી. શહેરના મોટા ભાગના વિસ્તારોમાં હજુ પણ દૈનિક રેગ્યુલર ડીલીવરી થતી નથી. રૃપાણી, ઘોઘાસર્કલ, તળાજા રોડ વગેરે એરીયામાં ગયા આખા અઠવાડીયા દરમિયાન ડીલીવરી કરવામાં આવેલ નથી. તેમ છતાં સુપ્રિ. તરફથી કે હેડ પોસ્ટ ઓફીસના પોસ્ટ માસ્તર દ્વારા કોઇપણ જાતની કાર્યવાહી કરવામાં આવી નથી. સમગ્ર ભાવનગર જિલ્લાના વડા તરીકે સુપ્રિ.ને લખવામાં આવેલ પત્રના અનુસંધાને કોઇ કાર્યવાહી ન કરવામાં આવે અને જવાબ આપવાની પણ જો દરકાર કરવામાં ન આવે તો ભાવનગર જિલ્લાના પોસ્ટ તંત્ર કેવી નબળી કામગીરી કરે છે તેનો પુરાવો છે.

રજૂઆતના સંદર્ભમાં જે કાર્યવાહી કરવાની હોય તે કરી અને ૧૫ પોસ્ટમેનની જે જગ્યા ખાલી છે તે ગ્રામ ડાક સેવક મારફતે અગર અન્ય કોઇપણ રીતે વ્યવસ્થા કરી ટપાલની ડીલીવરી દૈનિક અને સમય પર થાય તેવી કાર્યવાહી કરવા માગ કરેલ છે.

જ્યારે સાંસદને કરેલી રજૂઆતમાં જણાવાયું હતું કે, શહેરની વોરાબજાર પોસ્ટ ઓફીસ આઘાતજનક રીતે બંધ કરી દેવામાં આવી છે. જે અંગે સુપ્રિટેન્ડેન્ટ ઓફ પોસ્ટ તથા સમગ્ર પોસ્ટ ખાતુ નિંભર તંત્રની જેમ કામગીરી કરે છે અને પ્રત્યુતર આપવાની કે પ્રજાજનોની હાડમારી સમજવાની તેમના તરફથી કોઇપણ પ્રકારનો પ્રયાસ કરવામાં આવતો નથી.