ગોલ્ડ બિલિંગ ગાઈડ: ધનતેરસે સોનું ખરીદતાં પહેલાં આ 5 ચાર્જ ખાસ તપાસો, નહીં તો થશે નુકસાન

Dhanteras Gold Shopping: ધનતેરસ પર સોનું, ચાંદી, વાસણો અને અન્ય કિંમતી વસ્તુઓની ખરીદી કરવી ખૂબ જ શુભ માનવામાં આવે છે. આ વર્ષે 6 નવેમ્બરે ધનતેરસ ઉજવવામાં આવશે, જ્યારે લોકો સમૃદ્ધિ અને સુખ-શાંતિ માટે સોના-ચાંદીની ખરીદી સાથે પૂજા-અર્ચના કરે છે. જોકે, ઉત્સવની ખુશીઓમાં સોનાના દાગીના ખરીદતી વખતે બિલ ચૂકવતા પહેલા અમુક મહત્ત્વના ચાર્જિસ ચકાસી લેવા ખૂબ જરૂરી છે, જેથી વધારાના ખર્ચથી બચી શકાય.

ગ્રામ દીઠ સોનાનો ભાવ

સોનાના ઘરેણાંના બિલમાં સૌથી મોટો હિસ્સો સોનાના ભાવનો હોય છે. અલગ-અલગ જ્વેલર્સની નીતિઓ અને ખરીદીના સમય અનુસાર સોનાના રેટ્સમાં તફાવત હોઈ શકે છે. તેથી બિલમાં દર્શાવેલ ગ્રામ દીઠ ભાવ તપાસવો અને તમે ખરીદી રહ્યા છો તે સોનાની શુદ્ધતા (જેમ કે 22 કેરેટ કે 18 કેરેટ) સાથે તે મેળ ખાય છે કે નહીં તેની ખાતરી કરવી જોઈએ.

ઘડામણ ચાર્જ

ઘડામણ ચાર્જ એટલે દાગીનાની ડિઝાઈન અને બનાવટનો ખર્ચ. જ્વેલર્સ આ ચાર્જ સોનાના મૂલ્યના ટકાવારી તરીકે અથવા પ્રતિ ગ્રામ નિશ્ચિત રકમ તરીકે વસૂલે છે. દાગીનાની ડિઝાઈન અને કારીગરીના આધારે આ ખર્ચ અલગ-અલગ હોઈ શકે છે. ખરીદી ફાઈનલ કરતા પહેલા ઘડામણ ચાર્જ ફિક્સ છે કે તેમાં કોઈ ઘટાડો થઈ શકે તેમ છે તે વિશે પૂછપરછ કરી લેવી.

વેસ્ટેજ ચાર્જ

ઘરેણાં બનાવવાની પ્રક્રિયા દરમિયાન વપરાતા અને વેડફાતા સોનાની ભરપાઈ માટે કેટલાક જ્વેલર્સ વેસ્ટેજ ચાર્જ વસૂલે છે. આ ચાર્જ અલગથી ગણવામાં આવે છે અથવા ઘડામણ ચાર્જમાં જ સામેલ કરી દેવાય છે. તમારા બિલમાં આ ચાર્જ કઈ રીતે લાગુ કરવામાં આવ્યો છે તે જાણી લેવું જોઈએ, જેથી એક જ વસ્તુ માટે બે વાર ચાર્જ ન ચૂકવવો પડે.

હોલમાર્કિંગ ચાર્જ

હોલમાર્કિંગ સોનાની શુદ્ધતાની ખાતરી આપે છે. ગ્રાહકોએ BIS હોલમાર્ક ચકાસવો જોઈએ અને 6-અંકનો HUID (Hallmark Unique Identification) નંબર વેરીફાઈ કરવો જોઈએ. જો બિલમાં હોલમાર્કિંગ ચાર્જ અલગથી દર્શાવવામાં આવ્યો હોય, તો તેનો સ્પષ્ટ હિસાબ માગવો જોઈએ.

ગુડ્સ એન્ડ સર્વિસ ટેક્સ

ભારતમાં સોનાના દાગીનાની ખરીદી પર કુલ ટ્રાન્ઝેક્શન મૂલ્ય (જેમાં ઘડામણ ચાર્જ પણ સામેલ છે) પર સામાન્ય રીતે 3% જીએસટી લાગે છે. બિલમાં ટેક્સની ગણતરી સાચી રીતે થઈ છે કે નહીં અને ઈનવોઈસમાં લાગુ પડતો ટેક્સ સ્પષ્ટપણે દર્શાવ્યો છે કે નહીં તેની ખાતરી કરી લીધા પછી જ ચુકવણી કરવી.