ઈમરાન આઉટ નહિ થાય .

પાકિસ્તાનની શાહબાઝ શરીફ સરકારે સંકેત આપ્યા છે કે પૂર્વ વડાપ્રધાન ઈમરાન ખાનની પાર્ટી પર પ્રતિબંધ લાગી શકે છે. ઈમરાન ખાન પહેલેથી જ જેલમાં છે. તેમની પાર્ટી પાકિસ્તાન તહરીક-એ-ઈન્સાફ (પીટીઆઈ) પર પહેલાથી જ ઘણા નિયંત્રણો લાદવામાં આવ્યા છે. આમ છતાં જો પાકિસ્તાન સરકાર આ નવી પહેલની વાત કરી રહી છે તો તેનો સ્પષ્ટ અર્થ છે કે ઈમરાન જેલની અંદરથી પણ પોતાના વિરોધીઓ માટે ખતરો છે. પાકિસ્તાની સેના સાથે વધતા મતભેદો વચ્ચે પોતાનું સ્થાન ગુમાવનાર ઈમરાન ખાનની લોકપ્રિયતા પાકિસ્તાની લોકોમાં છેલ્લી ચૂંટણીઓમાં સારી રીતે સ્થાપિત થઈ ગયું છે. ખુદ ઈમરાનને ચૂંટણી લડવાથી રોકવામાં આવ્યા હોવા છતાં અને પાર્ટીને ઉમેદવાર ઊભા રાખવાની પણ મંજૂરી ન હોવા છતાં, પીટીઆઈના લોકો મોટી સંખ્યામાં જીતીને નેશનલ એસેમ્બલીમાં પહોંચ્યા હતા.

ઈમરાન અને તેમનો પક્ષ કોર્ટની લડાઈ પણ જોરદાર રીતે લડતો જોવા મળ્યો હતો. વિદેશી ફંડિંગ કેસમાં ઈમરાન ખાનની અંગત સંડોવણીના આરોપોને પુરાવાના અભાવે અદાલત દ્વારા ફગાવી દેવાયા હતા, એટલું જ નહીં, કેબલ કેસમાં ઓફિશિયલ સિક્રેટ એક્ટના ઉલ્લંઘનનો આરોપ પણ ઉચ્ચ અદાલતે રદ કર્યો હતો. આટલું જ નહીં, ગયા અઠવાડિયે સુપ્રીમ કોર્ટે પીટીઆઈને નેશનલ એસેમ્બલીમાં ૨૦ થી વધુ આરક્ષિત સીટો માટે લાયક જાહેર કરીને તેને સૌથી મોટી પાર્ટી બનાવી. દરમિયાન, સંયુક્ત રાષ્ટ્રની નિષ્ણાત સમિતિએ પણ આ મહિને તારણ કાઢયું હતું કે ઈમરાન ખાનની ધરપકડ માટે કોઈ નક્કર કાનૂની આધાર નથી અને એવું લાગે છે કે તેની પાછળ કોઈ રાજકીય હેતુ કામ કરી રહ્યો છે જેથી તેને ચૂંટણી લડતા અટકાવવામાં આવે. સમિતિએ તેમની તાત્કાલિક મુક્તિની માંગ પણ કરી છે.

સુપ્રીમ કોર્ટના નિર્ણય બાદ જેલમાં બંધ ખાનની પાર્ટી સૌથી મોટી પાર્ટી બની જશે. ઈમરાન ખાનની પાકિસ્તાન તહરીક-એ-ઈન્સાફ ૧૦૯ બેઠકો સાથે સંસદમાં સૌથી મોટી પાર્ટી તરીકે ઉભરી આવશે. કોર્ટે તાજેતરમાં ચુકાદો આપ્યો હતો કે પક્ષ મહિલાઓ અને લઘુમતીઓ માટે અનામત બેઠકોની ફાળવણી માટે પાત્ર છે. પાકિસ્તાનનું ચૂંટણી પંચ (ECP ) જેલમાં બંધ પૂર્વ વડાપ્રધાન ઈમરાન ખાનની પાર્ટીને અનામત બેઠકો ફાળવવાના સુપ્રીમ કોર્ટના આદેશનો અમલ કરશે. ECP  એ શુક્રવારે પાકિસ્તાની મીડિયા અહેવાલોમાં જણાવ્યું હતું કે, આ એક એવો નિર્ણય છે જે નાટયાત્મક રીતે પાકિસ્તાન તહરીક-એ-ઈન્સાફ (PTI)ને સંસદમાં સૌથી મોટી પાર્ટી બનવાની મંજૂરી આપશે.

ગયા અઠવાડિયે, પાકિસ્તાનની સર્વોચ્ચ અદાલતની ૧૩ સભ્યોની પૂર્ણ બેન્ચે ૮-૫ના સીમાચિહ્નરૂપ નિર્ણયમાં આદેશ આપ્યો હતો કે ૭૧ વર્ષીય ખાનની પીટીઆઈ નેશનલ એસેમ્બલી અને પ્રાંતીય એસેમ્બલીઓમાં મહિલાઓ અને લઘુમતીઓ માટે અનામત બેઠકો માટે પાત્ર છે. પીટીઆઈ નેશનલ એસેમ્બલીમાં સૌથી મોટી પાર્ટી બનશે. કારણ કે મહિલાઓ અને લઘુમતીઓ માટે અનામત ૨૩ બેઠકો મળ્યા બાદ તેની બેઠકો ૮૬થી વધીને ૧૦૯ થઈ જશે. શુક્રવારે જારી કરાયેલા એક નિવેદનમાં, પાકિસ્તાનના ચૂંટણી પંચ (ECP ) એ જણાવ્યું હતું કે આરક્ષિત બેઠકો પરના નિર્ણયો પર વિચારણા કરવા માટે ચૂંટણી મંડળની બે બેઠકો કર્યા પછી ટોચની સમિતિની નિમણૂક કરવામાં આવશે.

રસપ્રદ વાત એ છે કે, પીટીઆઈ પર પ્રતિબંધ મૂકવાની આ નવી ચિનગારીને લઈને શાસક ગઠબંધનમાં તિરાડ દેખાવા લાગી છે. પાકિસ્તાન પીપલ્સ પાર્ટીએ આ નિર્ણયથી પોતાને દૂર રાખ્યા છે અને કહ્યું છે કે આ સંદર્ભમાં તેની સલાહ લેવામાં આવી નથી. આ પછી એ પણ જોવાનું રહેશે કે સરકાર આ નિર્ણયને લઈને કેટલી આગળ વધે છે. પાકિસ્તાની શાસન પ્રણાલી જે રીતે કાયદાકીય દાવપેચ દ્વારા દેશના એક મોટા રાજકીય પક્ષને ચૂંટણીની હરીફાઈમાંથી બહાર રાખવા માટે સતત વ્યસ્ત રહે છે તે તેના લોકશાહીના દાવા સામે ગંભીર પડકાર છે. ઇમરાન ખાનના સંપૂર્ણ પતનની પ્રતિક્ષા કરનારી શાહબાઝ સરકાર માટે ઈમરાનનો કાનૂની રાહે પુનરોદય આઘાતજનક છે. ઈમરાન હજુ રમશે, જલ્દી આઉટ નહિ થાય.