સુરતીઓની પ્રિય ઘારીના વેચાણનો હેતુ કમાણી નહીં, સમાજસેવા

Surat: સુરતીઓ માટે ચંદની પડવા એટલે ઘારીની મીઠાશ માણવાનો અવસર, પરંતુ સુરત અને દક્ષિણ ગુજરાતની કેટલીક સામાજિક સંસ્થાઓ માટે આ તહેવાર સમાજસેવા માટે ભંડોળ એકત્ર કરવાનું માધ્યમ બન્યો છે. વર્ષોથી આ સંસ્થાઓ દ્વારા રાહતદરે ઘારી બનાવી તેનું વેચાણ કરવામાં આવે છે અને તેમાંથી મળતા નફાનો ઉપયોગ સમાજના જરૂરિયાતમંદોની મદદ માટે થાય છે. ક્યાંક વિધવા મહિલાઓ અને વૃદ્ધોને અનાજ-દવાનું વિતરણ થાય છે, તો ક્યાંક તેજસ્વી વિદ્યાર્થીઓને પ્રોત્સાહન અને જરૂરિયાતમંદોને તબીબી સહાય આપવામાં આવે છે. આમ, ઘારીના વેચાણને માત્ર વ્યવસાય પૂરતો સીમિત રાખવાને બદલે સામાજિક જવાબદારી સાથે જોડીને આ સંસ્થાઓએ તહેવારની મીઠાશને સમાજસેવાની પ્રવૃત્તિમાં ફેરવવામાં આવી રહી છે.

સુરતની ઓળખ સાથે વણાઈ ગયેલો ચંદની પડવાનો તહેવાર ઘારી વિના અધૂરો ગણાય છે. આ દિવસે ઘારીની ખરીદી માટે લોકોમાં ભારે ઉત્સાહ જોવા મળે છે અને મીઠાઈના વેપારીઓ માટે પણ આ તહેવાર સૌથી મહત્ત્વના અવસરોમાંનો એક છે. જોકે, આ પરંપરામાં કેટલીક સામાજિક સંસ્થાઓએ સેવાનો ઉમેરો કર્યો છે. સમાજના લોકો માટે વ્યાજબી ભાવે ગુણવત્તાયુક્ત ઘારી ઉપલબ્ધ કરાવવાની સાથે તેના વેચાણમાંથી થતી આવકનો ઉપયોગ સમાજના જરૂરિયાતમંદ વર્ગના ઉત્થાન માટે કરવામાં આવે છે. આ પ્રવૃત્તિમાં સંસ્થાના હોદ્દેદારો અને સભ્યો પોતે જ ઘારી બનાવવાથી લઈને પેકિંગ, ઓર્ડર નોંધવા અને વિતરણ સુધીની કામગીરી સંભાળે છે.સુરતના ક્ષત્રિય સમાજ યુવક મંડળના પ્રમુખ જનક કાચીવાલા જણાવે છે કે સમાજની વિધવા મહિલાઓ અને વૃદ્ધોને અનાજ તથા અન્ય જરૂરી સુવિધાઓ પૂરી પાડવા માટે પૂરતું ભંડોળ ઉપલબ્ધ રહે તે હેતુથી ઘારી બનાવવાનું શરૂ કરવામાં આવ્યું હતું. સમાજના લોકો પાસેથી વારંવાર ફંડ માગવાને બદલે મંડળના સભ્યો સામૂહિક પ્રયાસથી ઘારી બનાવે છે અને તેનું વેચાણ કરે છે. ચંદની પડવા ઉપરાંત શિયાળામાં સાલમપાક બનાવીને પણ વેચવામાં આવે છે. આ પ્રવૃત્તિમાંથી મળતા નફાનો ઉપયોગ સંપૂર્ણપણે સમાજસેવા માટે કરવામાં આવે છે. દર વર્ષે ઘારીના વેચાણમાં વધારો થતો હોવાથી સમાજસેવાના કાર્યો માટે વધુ ભંડોળ એકત્ર થઈ રહ્યું છે.સુરતના યુવા રાણા સંગઠન દ્વારા પણ છેલ્લાં 12 વર્ષથી વધુ સમયથી ચંદની પડવા નિમિત્તે ઘારી બનાવવામાં આવે છે. સંગઠનના આગેવાનોના જણાવ્યા અનુસાર, આ પ્રવૃત્તિનો મુખ્ય હેતુ નફો કમાવવાનો નહીં, પરંતુ સમાજના લોકોને વ્યાજબી ભાવે ઘારી ઉપલબ્ધ કરાવવાની સાથે જરૂરિયાતમંદોને મદદ કરવાનો છે. ઘારીના વેચાણમાંથી મળતા નફાનો ઉપયોગ સમાજની વિધવા મહિલાઓને સહાય આપવા અને તેજસ્વી વિદ્યાર્થીઓને પ્રોત્સાહિત કરવા માટે કરવામાં આવે છે. આ રીતે તહેવારના વેચાણને સમાજના ઉત્થાન સાથે જોડવાનો પ્રયાસ કરવામાં આવી રહ્યો છે.બીજી તરફ, શ્રી નવસારી મોઢ ગાંધી યુવક મંડળ છેલ્લાં 25 વર્ષથી ચંદની પડવા નિમિત્તે ઘારીનું વેચાણ કરે છે. મંડળનો હેતુ જ્ઞાતિજનો અને અન્ય લોકોને વ્યાજબી કિંમતે શુદ્ધ, ગુણવત્તાયુક્ત અને સ્વાદિષ્ટ ઘારી ઉપલબ્ધ કરાવવાનો છે. ઘારીના વેચાણમાંથી મળતી રકમ જરૂરિયાતમંદ બાળકોના શિક્ષણ અને સામાન્ય આર્થિક સ્થિતિ ધરાવતા જ્ઞાતિજનોની તબીબી સહાય પાછળ ખર્ચવામાં આવે છે. મંડળના હોદ્દેદારો અને ટ્રસ્ટીઓ ઘારીનું વજન કરવાથી લઈને પેકિંગ, ઓર્ડર બુકિંગ અને વિતરણ સુધીની કામગીરી જાતે સંભાળે છે. ઘારીની સાથે ફરસાણ તેમજ દિવાળીના તહેવાર દરમિયાન મોહનથાળ, કાજુ કતરી સહિતની મીઠાઈઓનું પણ વેચાણ કરવામાં આવે છે. આ પ્રવૃત્તિમાંથી થતી આવકનો ઉપયોગ પણ સમાજકલ્યાણનાં કાર્યો માટે થાય છે.

આમ, ચંદની પડવાના તહેવારે સુરત અને દક્ષિણ ગુજરાતની વિવિધ સામાજિક સંસ્થાઓ ઘારીના વેચાણને સમાજસેવાનું માધ્યમ બનાવી રહી છે. તહેવારની પરંપરાને જાળવી રાખવાની સાથે જરૂરિયાતમંદોને મદદરૂપ થવાના આ પ્રયાસમાં સમાજના લોકોની ભાગીદારી પણ મહત્ત્વની બની રહી છે. ઘારીના વેચાણમાંથી ઊભું થતું ભંડોળ અનેક પરિવારો માટે સહાયરૂપ બને છે અને તહેવારની ઉજવણીને સામાજિક જવાબદારી સાથે જોડે છે.

લોકોને શુદ્ધ ઘારી મળે છે, સમાજસેવા માટે ભંડોળ પણ

શુક્રવાર સુરતના ક્ષત્રિય સમાજ યુવક મંડળ દ્વારા ચંદની પડવા નિમિત્તે ઘારી બનાવવાની પ્રવૃત્તિમાં સ્વાદ અને શુદ્ધતાની સાથે સમાજસેવાને પણ પ્રાધાન્ય આપવામાં આવે છે. મંડળના સભ્ય શૈલેષ જરીવાલા જણાવે છે કે સમાજના સભ્યો પોતે જ ઘારી બનાવવાની કામગીરીમાં જોડાય છે, જેથી ગુણવત્તા અને શુદ્ધતા જળવાઈ રહેવાની સાથે લોકોને વ્યાજબી ભાવે ઘારી મળી શકે. ઘારીના વેચાણમાંથી મળતા નફાથી સમાજસેવાના કાર્યો માટે ભંડોળ પણ એકત્ર થાય છે. આમ, ગ્રાહકોને શુદ્ધ ઘારીનો સ્વાદ માણવાની તક મળે છે અને તેમના સહયોગથી સમાજના જરૂરિયાતમંદોની મદદ માટે હાથ પણ મજબૂત બને છે.