સુરત: મોંઘવારીમાં પરિવારનું બજેટ ખોરવાયું, ગણેશોત્સવમાં વધારાની આવકની તક

Surat: મોંઘવારીના સતત વધતા દબાણ વચ્ચે પરિવારનું બજેટ જાળવવું અનેક લોકો માટે પડકારરૂપ બની રહ્યું છે. જીવનજરૂરિયાતની ચીજવસ્તુઓથી લઈને શિક્ષણ, ઘરખર્ચ અને રોજિંદા વપરાશની વસ્તુઓના ખર્ચમાં વધારો થતાં માત્ર એક આવક પર પરિવાર ચલાવવો મુશ્કેલ બની રહ્યો છે. આવી સ્થિતિમાં સુરતમાં ચાલી રહેલો ગણેશોત્સવ અનેક નાના પરિવારો માટે વધારાની આવક મેળવવાની હંગામી તક લઈને આવ્યો છે. મોટા ગણેશ મંડપોમાં દર્શન માટે ઉમટી રહેલી ભક્તોની ભીડની સાથે મંડપોની આસપાસ ખાણીપીણી અને નાની વસ્તુઓના વેચાણનો ધંધો પણ તેજ બન્યો છે.સુરતના વિવિધ વિસ્તારોમાં ગણેશોત્સવનો માહોલ જામ્યો છે. સાંજ પડતાં જ મોટા મંડપો તરફ ભક્તોની અવરજવર વધવા લાગે છે અને મોડી રાત સુધી દર્શન માટે લોકોની લાંબી કતારો જોવા મળે છે. ખાસ કરીને કોટ સહિતના વિસ્તારોમાં વિવિધ થીમ અને વિશાળકાય ગણેશ પ્રતિમાઓના દર્શન માટે મોટી સંખ્યામાં લોકો ઉમટી રહ્યા છે. આ ભીડ આસપાસના નાના વેપારીઓ માટે ગ્રાહકોનું મોટું કેન્દ્ર બની રહી છે. મોટા ગણેશ મંડપોની આસપાસ રહેતા કેટલાક પરિવારો પોતાના ઘરના ઓટલા પર જ નાસ્તા, ઠંડા પીણાં અને અન્ય ખાણીપીણીની વસ્તુઓનું વેચાણ કરી રહ્યા છે. કેટલાકે ઘર બહાર ટેબલ કે ખુમચો ગોઠવ્યો છે, તો કેટલાક લોકો લારી મારફતે ધંધો કરી રહ્યા છે. સામાન્ય દિવસોમાં નોકરી કે અન્ય વ્યવસાય કરતા લોકો પણ ગણેશોત્સવના દિવસોમાં સાંજના સમયે પરિવારના સભ્યો સાથે આ હંગામી વ્યવસાયમાં જોડાઈ રહ્યા છે. દિવસે નોકરી અને સાંજે થોડા કલાકનો ધંધો કરીને વધારાની આવક મેળવવાનો પ્રયાસ થઈ રહ્યો છે.ખાસ કરીને મોડી સાંજથી મોડી રાત સુધી ભક્તોની અવરજવર વધુ રહેતી હોવાથી આ સમય નાના વેપારીઓ માટે મહત્વનો બની રહ્યો છે. દર્શન માટે આવતા પરિવારો અને યુવાનો નાસ્તો તથા ઠંડા પીણાં સહિતની વસ્તુઓ ખરીદતા હોવાથી મંડપની બહાર ઉભા કરાયેલા નાના સ્ટોલ પર ગ્રાહકોની સતત અવરજવર જોવા મળે છે.

સુરતીઓના ખાણીપીણીના શોખને કારણે આવા હંગામી ધંધામાં પણ વેચાણની સારી સંભાવના ઊભી થઈ છે. આ તકનો લાભ માત્ર સ્થાનિક લોકો જ લઈ રહ્યા નથી. શહેરના અન્ય વિસ્તારોમાંથી પણ કેટલાક નાના વેપારીઓ ભક્તોની વધુ ભીડ ધરાવતા ગણેશ મંડપો પાસે આવીને થોડા કલાકો માટે ધંધો કરી રહ્યા છે. ગણેશોત્સવના દિવસો પૂરા થયા બાદ આ હંગામી વ્યવસાય પણ બંધ થઈ જશે, પરંતુ ત્યાં સુધીમાં વધારાની કમાણી કરવાની તક મળી રહે છે.આમ, સુરતમાં ગણેશોત્સવ શ્રદ્ધા અને ધાર્મિક ઉજવણીની સાથે નાના વેપારીઓ અને મધ્યમવર્ગીય પરિવારો માટે હંગામી રોજગારીનું માધ્યમ પણ બની રહ્યો છે. વધતા ઘરખર્ચ વચ્ચે થોડા દિવસની વધારાની આવક પણ પરિવારના બજેટમાં રાહતરૂપ બની શકે છે. પરિણામે બાપ્પાના દર્શન માટે ઉમટતી ભીડ અનેક લોકો માટે રોજગારીની તકમાં પરિવર્તિત થઈ રહી છે.