કોણ છે નમન ધીર? 64 બોલમાં 12 સિક્સર સાથે 173 રન ફટકારી ટીમ ઈન્ડિયામાં કરી એન્ટ્રી

Who is Naman Dhir: પંજાબના નાના એવા શહેર ફરીદકોટના આકાશ એ સમયે આતશબાજીઓથી સજી ગયું, જ્યારે સમાચાર આવ્યા કે, 26 વર્ષના નમન ધીરની પ્રથમ વખત ભારતીય ટીમમાં પસંદગી કરવામાં આવી છે. ગઈકાલે રાત્રે વેસ્ટઈન્ડીઝ સામેની ઘરેલુ વન-ડે સીરિઝ માટે ટીમ ઈન્ડિયાનું એલાન કરવામાં આવ્યું, જેમાં આ યુવા ઓલરાઉન્ડરનું નામ પણ સામેલ છે. 31 ડિસેમ્બર 1999ના રોજ જન્મેલા નમન ધીર જમણા હાથથી વિસ્ફોટક બેટિંગ કરવાની સાથે-સાથે ઓફ બ્રેક બોલિંગ પણ કરે છે. લાંબા સમયથી ઈન્ડિયા-A તરફથી રમી રહેલા નમન ધીર IPLમાં મુંબઇ ઈન્ડિયન્સનું મોટું નામ બની ગયું છે, જે 2024ની સીઝનથી સતત પ્લેઈંગ ઈલેવનનું મજબૂત નામ બનીને ઊભરી રહ્યો છે.

64 બોલમાં 173 રનની ઐતિહાસિક ઈનિંગ

તાજેતરમાં ખતમ થયેલા શેર-એ-પંજાબ T-20 ટૂર્નામેન્ટમાં અમૃતસર સૂરમાઝ તરફથી રમતા નમન ધીરે 8 સપ્ટેમ્બર 2026ના રોજ મોહાલી કિંગ્સ સામે માત્ર 64 બોલમાં 173 રનની ઐતિહાસિક ઈનિંગ રમી હતી, જેમાં તેણે 37 બોલમાં પોતાની સદી પૂરી કરી હતી અને 270.31ના સ્ટ્રાઈક રેટથી 16 ચોગ્ગા અને 12 છગ્ગા પણ ફટકાર્યા હતા. ત્રણ દિવસ પહેલા જ તેને મેન ઓફ ધ ટૂર્નામેન્ટથી નવાજવામાં આવ્યો હતો અને હવે સિલેક્ટર્સે તેને એક મોટી ભેટ આપી દીધી છે.

નમન ધીર પંજાબનો એક બેટિંગ ઓલરાઉન્ડર છે, જેણે 2023-24માં પંજાબને BCCIની પ્રતિષ્ઠિત ઘરેલુ T20 ટૂર્નામેન્ટ સૈયદ મુશ્તાક અલી ટ્રોફી જીતાડવામાં મહત્વની ભૂમિકા ભજવી હતી. ત્યારબાદ શેર-એ-પંજાબ T20 લીગમાં તેણે મુંબઈ ઈન્ડિયન્સના સ્કાઉટ્સનું ધ્યાન ખેંચ્યું અને IPL 2024ના ઓક્શનમાં 20 લાખની બેઝ પ્રાઈસમાં ખરીદવામાં આવ્યો. શેર-એ-પંજાબ માટે તે સીઝનમાં તે 193ના ખતરનાક સ્ટ્રાઈક રેટથી 466 રન બનાવીને IPLમાં આવ્યો હતો. આ જ કારણ હતું કે જ્યારે સૂર્યકુમાર યાદવ ઈન્જર્ડ થયો ત્યારે મુંબઈએ તેને ડેબ્યૂની તક આપી અને ત્રીજા નંબરે બેટિંગ કરાવી. નમન ધીરે IPL 2024ની પોતાની ડેબ્યૂ સીઝનમાં કુલ સાત મેચ રમી હતી, પરંતુ તેની સૌથી ખાસ ઈનિંગ છેલ્લી મેચમાં આવી હતી, જ્યારે લખનઉ સુપર જાયન્ટ્સ સામે તેણે માત્ર 28 બોલમાં 62 રનની અણનમ વિસ્ફોટક ઈનિંગ રમી હતી.

IPL 2024માં સામાન્ય પ્રદર્શન બાદ મુંબઈ ઈન્ડિયન્સે નમન ધીરને રિલીઝ કરવાનો નિર્ણય લીધો હતો, પરંતુ ત્યારબાદ 2025ના ઓક્શનમાં તેને 'રાઈટ ટુ મેચ' ઓપ્શનનો ઉપયોગ કરીને 5 કરોડ 25 લાખ રૂપિયાની મોટી રકમ સાથે ફરીથી સાઈન કરી લીધો. 20 લાખથી સવા પાંચ કરોડ રૂપિયા સુધી પહોંચવું એ કોઈપણ યુવા ખેલાડી માટે મોટી વાત છે. 2025માં મુંબઈ ઈન્ડિયન્સે તેને તમામ 16 મેચ રમાડી હતી અને આવું કરનારા તે પોતાની ટીમના પસંદગીના ચાર ખેલાડીઓમાંથી એક હતો. નમન ધીરે પણ મુંબઈ ઈન્ડિયન્સને નિરાશ ન કરી. 182.60ના જબરદસ્ત સ્ટ્રાઈક રેટથી 252 રન બનાવ્યા. તે ટીમ માટે બીજો સૌથી વધુ રન બનાવનારો બેટ્સમેન સાબિત થયો.

ભારતની વન-ડે ટીમ

શુભમન ગિલ (કેપ્ટન), રોહિત શર્મા, વિરાટ કોહલી, ઋતુરાજ ગાયકવાડ, કે.એલ. રાહુલ (વાઈસ કેપ્ટન), ધ્રુવ જુરેલ, નીતિશ કુમાર રેડ્ડી, રવીન્દ્ર જાડેજા, કુલદીપ યાદવ, પ્રસિદ્ધ ક્રિષ્ના, ગુરનૂર બરાર, મોહમ્મદ સિરાજ, આકિબ નબી, યશસ્વી જયસ્વાલ અને નમન ધીર.

ભારતની T20 ટીમ

શ્રેયસ અય્યર (કેપ્ટન), અભિષેક શર્મા, વૈભવ સૂર્યવંશી, ઈશાન કિશન (વિકેટકીપર), સંજુ સેમસન (વિકેટકીપર), તિલક વર્મા (વાઈસ કેપ્ટન), શિવમ દુબે, કુલદીપ યાદવ, અક્ષર પટેલ, વોશિંગ્ટન સુંદર, રવિ બિશ્નોઈ, નીતિશ કુમાર રેડ્ડી, અર્શદીપ સિંહ, પ્રિન્સ યાદવ અને મયંક યાદવ.