VIDEO : ગાંજો ફૂંકતા દર્શકને કારણે મેચ અટકી, નંબર-1 ખેલાડીએ અમ્પાયરને કરી ફરિયાદ

Weed Smell Halts US Open Match: અમેરિકન ઓપન 2026માં શુક્રવારે એક અત્યંત વિચિત્ર અને આશ્ચર્યજનક ઘટના સામે આવી, જ્યાં કોઈ ખેલાડીની ઈજા કે ટેકનિકલ ખામીના કારણે નહીં, પરંતુ પ્રેક્ષક ગેલેરીમાંથી આવી રહેલી ગાંજાની તીવ્ર દુર્ગંધને કારણે લાઈવ મેચ થોડા સમય માટે રોકવી પડી હતી. લુઈસ આર્મસ્ટ્રોંગ સ્ટેડિયમ ખાતે વિશ્વની નંબર-1 મહિલા ટેનિસ ખેલાડી આર્યના સબાલેન્કા અને કામિલા રાખિમોવા વચ્ચે ત્રીજા રાઉન્ડનો મુકાબલો રમાઈ રહ્યો હતો. મેચના ત્રીજા ગેમ દરમિયાન સબાલેન્કાને સ્ટેન્ડ્સમાંથી મેરિજુઆના (ગાંજા)ની અતિશય વાસ આવવા લાગી હતી.

સ્કોર 30-0 હતો ત્યારે સબાલેન્કાએ અમ્પાયર તરફ ઈશારો કર્યો

આ અજીબોગરીબ ઘટના ત્યારે બની જ્યારે સબાલેન્કા સર્વિસ કરી રહી હતી અને સ્કોર 30-0 હતો. કોર્ટના દક્ષિણી છેડેથી સર્વિસ કરતી વખતે વર્લ્ડ નંબર-1 ખેલાડી અચાનક ચેર અમ્પાયર તરફ વળી અને સ્ટેન્ડ્સ તરફ આંગળી ચીંધીને ફરિયાદ કરી હતી કે કોઈ ગાંજો પી રહ્યું છે ("Someone is smoking weed"). વાસ એટલી તીવ્ર હતી કે તેને નજરઅંદાજ કરીને રમતમાં ધ્યાન કેન્દ્રિત કરવું મુશ્કેલ બની રહ્યું હતું.

અમ્પાયર સમક્ષ તાત્કાલિક હસ્તક્ષેપ કરવાની માંગ કરતાં સબાલેન્કાએ કહ્યું હતું કે ”શું તમે આ બાબતે કંઈક કરશો? કારણ કે આની ગંધ અત્યંત તીવ્ર છે."

સબાલેન્કાની આ ફરિયાદ બાદ અમ્પાયરે તરત જ સ્ટેડિયમ સ્ટાફની મદદ માંગી હતી. US Openના સિક્યોરિટી અને સ્ટેડિયમ સ્ટાફના કર્મચારીઓ તાબડતોબ સ્ટેન્ડ્સમાં પહોંચ્યા હતા અને ગાંજાનો ધુમાડો ક્યાંથી આવી રહ્યો છે તે શોધવાની કવાયત હાથ ધરી હતી. આ હોબાળાના કારણે મેચ થોડીવાર માટે ખોરવાઈ ગઈ હતી, પરંતુ પરિસ્થિતિ નિયંત્રણમાં આવ્યા બાદ રમત ફરી શરૂ કરવામાં આવી હતી.

અગાઉ એડ્રિયન મન્નારીનો પણ કરી ચૂક્યા છે ફરિયાદ, સબાલેન્કા ચોથા રાઉન્ડમાં

નોંધનીય છે કે આ અગાઉ ફ્રેન્ચ ખેલાડી એડ્રિયન મન્નારીનો પણ આ જ ટુર્નામેન્ટ દરમિયાન મેરિજુઆનાની ગંધને લઈને જાહેરમાં પોતાની નારાજગી વ્યક્ત કરી ચૂક્યા છે. જોકે, આ સમગ્ર ડ્રામા અને ખલેલની સબાલેન્કાના પ્રદર્શન પર કોઈ નકારાત્મક અસર પડી નહોતી. બેલારુસની આ સ્ટાર ખેલાડીએ આક્રમક રમતનું પ્રદર્શન ચાલુ રાખતાં કામિલા રાખિમોવાને સીધા સેટોમાં હરાવીને ટૂર્નામેન્ટના ચોથા રાઉન્ડમાં સત્તાવાર પ્રવેશ કરી લીધો છે અને પોતાના US Open ટાઇટલને ડિફેન્ડ કરવાનું અભિયાન મજબૂત રાખ્યું છે.