Team India Prize Money T20 World Cup 2026 | અમદાવાદના નરેન્દ્ર મોદી સ્ટેડિયમમાં રમાયેલી હાઈ-વોલ્ટેજ ફાઈનલમાં ન્યૂઝીલેન્ડને હરાવીને ભારતીય ટીમે ત્રીજી વખત T20 વર્લ્ડ કપના ખિતાબ પર કબજો જમાવ્યો છે. આ ઐતિહાસિક જીત બાદ વિશ્વ વિજેતા ટીમ ઇન્ડિયા પર કરોડો રૂપિયાના ઇનામોનો વરસાદ થયો છે.
ભારત ત્રીજીવાર બન્યું વિશ્વ વિજેતા
ભારતીય ટીમે ફાઈનલ મુકાબલામાં ન્યુઝીલેન્ડને 96 રનથી હરાવીને જોરદાર જીત મેળવી છે. રવિવારે રમાયેલી આ મેચમાં ભારતે આપેલા 256 રનના વિશાળ ટાર્ગેટ સામે કીવી ટીમ માત્ર 159 રનમાં ઓલઆઉટ થઈ ગઈ હતી. ભારતની આ જીતમાં સંજુ સેમસનની 89 રનની આક્રમક ઇનિંગ અને જસપ્રીત બુમરાહની 4 વિકેટ મહત્વની સાબિત થઈ હતી. ભારત સતત બીજીવાર (2024 અને 2026) ચેમ્પિયન બન્યું છે.
વિજેતા અને ઉપ-વિજેતા પર ઇનામોનો વરસાદ
T20 વર્લ્ડ કપ 2026 જીતનારી ભારતીય ટીમને ICC તરફથી 3 મિલિયન ડોલર (અંદાજે ₹27.50 કરોડ) ની ઈનામી રકમ મળી છે. બીજી તરફ, ફાઈનલમાં હારનાર ન્યુઝીલેન્ડની ટીમને રનર-અપ તરીકે 1.6 મિલિયન ડોલર (અંદાજે ₹14.67 કરોડ) આપવામાં આવ્યા છે. કીવી ટીમનું પ્રથમ વખત વર્લ્ડ કપ જીતવાનું સપનું ફરી એકવાર અધૂરું રહ્યું છે.
અન્ય ટીમોને કેટલા મળ્યા?
સેમિ ફાઈનલમાં હારનારી ટીમો (ઈંગ્લેન્ડ અને દક્ષિણ આફ્રિકા) ને પણ ખાલી હાથે ઘરે જવું પડ્યું નથી, તેમને 0.79 મિલિયન ડોલર (અંદાજે ₹7.24 કરોડ) મળ્યા છે. આ સિવાય 5 થી 12માં ક્રમે રહેલી ટીમોને ₹3.48 કરોડ અને 13 થી 20માં ક્રમની ટીમોને ₹2.29 કરોડની પ્રાઈઝ મની મળી છે.
ICC એ તોડ્યા રેકોર્ડ: પ્રાઈઝ પૂલમાં 20% નો વધારો
આ વખતે ઇન્ટરનેશનલ ક્રિકેટ કાઉન્સિલ (ICC) એ કુલ 13.5 મિલિયન ડોલર (અંદાજે ₹123.77 કરોડ) નું રેકોર્ડબ્રેક પ્રાઈઝ પૂલ રાખ્યું હતું. જે 2024 ના વર્લ્ડ કપ કરતા 20% વધુ છે. 2024 માં કુલ 11.25 મિલિયન ડોલર વહેંચવામાં આવ્યા હતા. આ વધારો દર્શાવે છે કે T20 ક્રિકેટની લોકપ્રિયતા અને તેની વ્યાવસાયિક કિંમત સતત વધી રહી છે.
T20 વર્લ્ડ કપ 2026: પ્રાઈઝ મનીની વિગતો
ભારત (વિજેતા): અંદાજે ₹27.50 કરોડ
ન્યુઝીલેન્ડ (ઉપ-વિજેતા): અંદાજે ₹14.67 કરોડ
સેમિ ફાઈનલમાં હારનાર ટીમો: અંદાજે ₹7.24 કરોડ
5 થી 12માં સ્થાનવાળી ટીમો: અંદાજે ₹3.48 કરોડ
13 થી 20માં સ્થાનવાળી ટીમો: અંદાજે ₹2.29 કરોડ
