યશપાલ શર્માનો રેવન્યૂ ક્લાર્ક ભાઈ રાજેશ 3000ની લાંચ લેતા પકડાયો

• રાજેશ હરિયાણાના પાણી પૂરવઠા વિભાગમાં કાર્યરત
• રાજેશે સિંચાઈનું પાણી આપવાના બદલામાં ખેડૂત પાસે રૂપિયા માંગ્યા હતા : એલસીબીએ ઝડપી લીધો

ચંડીગઢ : એક્ટર યશપાલ શર્માના આસિસ્ટન્ટ રેવેન્યૂ કલર્કની નોકરી કરતાં ભાઈ રાજેશ કુમાર શર્માને એલસીબીએ ૩૦૦૦ રૂપિયાની લાંચ લેતા ઝડપી લીધો હતો. હરિયાણા સરકારના પાણી પુરવઠા વિભાગમાં નોકરી કરતાં રાજેશ કુમાર સામે ફરિયાદ દાખલ થઈ છે.
આસિસ્ટન્ટ રેવેન્યૂ ક્લર્ક રાજેશ કુમાર શર્મા હરિયાણા સરકારના પાણી પુરવઠામાં ખેતીની જમીન માટે સિંચાઈનો લાભ આપવાની યોજના વિભાગ સંભાળતો હતો. રાકેશ કુમાર નામના એક ખેડૂતે એલસીબીમાં ફરિયાદ કરી હતી કે રાજગઢ-ચંડીગઢ હાઈવે પાસે આવેલી જમીનમાં કે જ્યાં એક કોલોની બની છે. તેમાં સિંચાઈનું પાણી આપવા માટે સર્ટિફિકેટ આપવાના બદલામાં રાજેશ કુમાર શર્માએ ૩૦૦૦ રૂપિયાની ડિમાન્ડ કરી હતી.
એલસીબીએ ફરિયાદના આધારે છટકું ગોઠવ્યું હતું. એલસીબી અધિકારીના કહેવા પ્રમાણે આર્યનગરમાં રહેતા રાજેશ કુમાર શર્માએ જ્યારે ૩૦૦૦ રૂપિયા લીધા ત્યારે એલસીબીએ તેને પકડી લીધો હતો. તેની સામે પ્રિવેન્શન ઓફ કરપ્શન એક્ટ-૧૯૮૮ હેઠળ ફરિયાદ દાખલ થઈ છે. રાજેશ કુમાર એ હરિયાણવી અને હિન્દી ફિલ્મોના જાણીતા એક્ટર યશપાલ શર્માનો ભાઈ થાય છે.
લગાન, ગંગાજલ, અબ તક છપ્પન, અપહરણ સહિતની ઘણી ફિલ્મોમાં યશપાલ શર્માએ મહત્ત્વનો રોલ કર્યો હતો. દાદા લક્ષ્મી નામના પ્રોડક્શન સાથે પણ યશપાલ જોડાયેલા છે.