એક સમયે દીકરાની સારવાર માટે વેચવી પડી હતી ફૂટબોલ કીટ, હવે જર્મની સાથે રચ્યો ઈતિહાસ: ફિફાના સ્ટારની ફિલ્મી કહાની

ફિફા વર્લ્ડ કપ 2026: ફિફા વર્લ્ડ કપ 2026ની રાઉન્ડ ઓફ 32ની અત્યંત રોમાંચક મેચમાં પરાગ્વેએ મોટો ઉલટફેર કરીને 4 વખતની વર્લ્ડ ચેમ્પિયન જર્મનીને ટૂર્નામેન્ટમાંથી બહાર ફેંકી દીધું છે. પેનલ્ટી શૂટઆઉટ સુધી ખેંચાયેલા આ મહામુકાબલામાં પરાગ્વેએ જર્મનીને 4-3થી પરાજય આપીને રાઉન્ડ ઓફ 16માં જગ્યા બનાવી લીધી છે. પરાગ્વેની આ ઐતિહાસિક જીતનો હીરો 6 ફૂટ 6 ઇંચ લાંબો ગોલકીપર ઓર્લેન્ડો ગિલ રહ્યો હતો, જેણે પેનલ્ટી શૂટઆઉટમાં મજબૂત દીવાલ બનીને જર્મનીના 2 શાનદાર સેવ કર્યા હતા. આ એ જ ઓર્લેન્ડો ગિલ છે, જેને એક સમયે પોતાના પુત્રના ઇલાજ માટે પોતાની ફૂટબોલ કિટ પણ વેચવી પડી હતી.
મેચની વાત કરીએ તો, ફર્સ્ટ હાફમાં 42મી મિનિટે પરાગ્વેના જૂલિયો એનસિસોએ શાનદાર હેડર વડે ગોલ કરીને ટીમને 1-0ની લીડ અપાવી હતી. જોકે, બીજા હાફમાં જર્મનીએ વાપસી કરી અને 52મી મિનિટે કાઈ હેવર્ટ્ઝે ગોલ કરીને સ્કોર 1-1થી બરાબર કરી દીધો હતો. નિર્ધારિત સમય અને એક્સ્ટ્રા ટાઇમ બાદ પણ સ્કોર બરાબરી પર રહેતાં મેચ પેનલ્ટી શૂટઆઉટમાં પહોંચી હતી.
પેનલ્ટી શૂટઆઉટ અને સડન ડેથનો રોમાંચ
પેનલ્ટી શૂટઆઉટ દરમિયાન મેદાન પરનો રોમાંચ ચરમસીમાએ હતો:

• ઓર્લેન્ડોની ચપળતા: જર્મની તરફથી પ્રથમ કિક લેવા આવેલા કાઈ હેવર્ટ્ઝના શૉટને ઓર્લેન્ડોએ ચીતા જેવી સ્ફૂર્તિથી રોકી લીધો હતો.
• બીજો મોટો સેવ: ત્યારબાદ જર્મનીના વોલ્ટેમાડેના શૉટને પણ ઓર્લેન્ડોએ અદભુત રીતે બચાવી લીધો હતો.
• સડન ડેથ બંને ટીમો 5-5 કિક બાદ 3-3થી બરાબરી પર હતી, જેથી મેચ સડન ડેથમાં ગઈ. જર્મનીનો જોનાથન તાહ પ્રેશર ન ઝીલી શક્યો અને બોલ ક્રોસબારની ઉપર મારી બેઠો. અંતમાં પરાગ્વેના જોસ કેનાલેએ કોઈ ભૂલ વગર ગોલ કરીને પોતાની ટીમને યાદગાર જીત અપાવી હતી. ફિફા વર્લ્ડ કપના ઇતિહાસમાં પેનલ્ટી શૂટઆઉટમાં જર્મનીની આ સૌપ્રથમ હાર છે.

જ્યારે પુત્રનો જીવ બચાવવા બધું જ વેચવું પડ્યું
આજે આખી દુનિયા ઓર્લેન્ડો ગિલને સલામ કરી રહી છે અને તે રાતોરાત પોતાના દેશનો નેશનલ હીરો બની ગયો છે. પરંતુ આજથી માત્ર 4 વર્ષ પહેલાં જિંદગીએ તેની આકરી પરીક્ષા લીધી હતી. આ પરાગ્વેન ખેલાડી ભારે આર્થિક સંકટમાંથી પસાર થઈ રહ્યો હતો. તેનો પુત્ર એટલો ગંભીર બીમાર હતો કે તેના ઇલાજ અને જીવ બચાવવા માટે ઓર્લેન્ડોએ પોતાનું સર્વસ્વ દાવ પર લગાવી દીધું હતું. પૈસાની તંગીના કારણે તેણે પોતાની ફૂટબોલ કિટ પણ વેચી દેવી પડી હતી. તેની પત્નીએ આ સંઘર્ષ સોશિયલ મીડિયા પર શેર કર્યો હતો, પરંતુ ઓર્લેન્ડો આ વિપરીત પરિસ્થિતિઓ સામે ઝૂક્યો નહીં અને મહેનત ચાલુ રાખી.
ટૂર્નામેન્ટમાં ઓર્લેન્ડોનું પ્રદર્શન
ફિફા વર્લ્ડ કપ 2026માં ઓર્લેન્ડોની શરૂઆત ખરાબ રહી હતી અને અમેરિકા સામે તેણે 4 ગોલ ખાધા હતા. પરંતુ ત્યારબાદ તેણે શાનદાર કમબેક કર્યું. ઓસ્ટ્રેલિયા અને તુર્કી સામે તેણે 5-5 શાનદાર સેવ કર્યા, જ્યારે જર્મની સામેની આ મેચમાં તેણે કુલ 6 સેવ કર્યા અને પેનલ્ટીમાં 2 ગોલ બચાવીને ઇતિહાસ રચી દીધો. હવે રાઉન્ડ ઓફ 16માં પરાગ્વેનો મુકાબલો ફ્રાન્સ અથવા સ્વીડન સામે 4 જુલાઈએ ફિલાડેલ્ફિયામાં થશે.