'લોકો મારી બેટિંગ નહીં, મારો ધર્મ જોવા લાગ્યા...', ઓસ્ટ્રેલિયાના દિગ્ગજ ક્રિકેટર ઉસ્માન ખ્વાજાનું દર્દ છલકાયું

Khawaja beats all odds with a stellar career and bold statements: ઓસ્ટ્રેલિયાના દિગ્ગજ ઓપનિંગ બેટ્સમેન ઉસ્માન ખ્વાજાએ પોતાના જીવન અને કરિયરના એવા કડવા અને ચોંકાવનારા અનુભવો શેર કર્યા છે, જેને સાંભળીને આખું ક્રિકેટ જગત સ્તબ્ધ થઈ ગયું છે. પાકિસ્તાની મૂળના 39 વર્ષીય મુસ્લિમ ક્રિકેટરે ઓસ્ટ્રેલિયન ક્રિકેટમાં વ્યાપેલા વંશીય ભેદભાવ, ડ્રેસિંગ રૂમની એકલતા અને એક સમયે ઇસ્લામિક આતંકવાદના ખોટા કેસમાં જેલ ભેગા કરવાની થયેલી ભયાનક સાઝિશ પરથી પડદો ઉઠાવ્યો છે.

યુનિવર્સિટીના મિત્રે જ ફેક આઈડી બનાવી આતંકી કેસમાં ફસાવ્યો હતો

ઉસ્માન ખ્વાજાએ પોતાના જીવનની સૌથી ભયાનક ક્ષણનો ખુલાસો કરતા જણાવ્યું કે, વર્ષ 2018માં ન્યૂ સાઉથ વેલ્સ યુનિવર્સિટીમાં તેની સાથે ભણતા એક શ્રીલંકાન મૂળના મિત્ર કામરેજ મોહમ્મદ નામના વ્યક્તિએ ખ્વાજાના નામે એક નકલી ફેક નોટબુક બનાવી હતી. આ ડાયરીમાં ખ્વાજાના નામે શ્રીલંકાના પૂર્વ વડાપ્રધાન સહિતના નેતાઓ પર આતંકી હુમલા કરવાની અને ઇસ્લામિક સ્ટેટ સાથે જોડાવાની ખોટી વાતો લખવામાં આવી હતી.

આ કાવતરા પાછળનું કારણ એક યુવતી સાથેની ઈર્ષ્યા હતી. ઓસ્ટ્રેલિયન ફેડરલ પોલીસે આ મામલે ખ્વાજાની કલાકો સુધી આકરી પૂછપરછ કરી હતી. જોકે, તપાસના અંતે સત્ય સામે આવ્યું કે ખ્વાજા નિર્દોષ હતો અને પોલીસે તેના જ મિત્ર કામરેજની ધરપકડ કરી તેને જેલ ભેગો કર્યો હતો. ખ્વાજાએ કહ્યું, "એ સમય મારા અને મારા પરિવાર માટે અત્યંત માનસિક ત્રાસદાયક હતો."

"ન્યૂ સાઉથ વેલ્સ ક્રિકેટમાં માત્ર ગોરાઓ જ ચાલતા"

ખ્વાજાએ પોતાના બાળપણ અને કરિયરની શરૂઆતના દિવસો યાદ કરતા જણાવ્યું કે,

"જ્યારે હું મોટો થઈ રહ્યો હતો, ત્યારે ન્યૂ સાઉથ વેલ્સ ક્રિકેટ એસોસિએશનમાં ભયંકર નસલીય ભેદભાવ હતો. મને હંમેશાં એવું જ લાગતું કે ઓસ્ટ્રેલિયાની પ્રતિષ્ઠિત 'બેગી ગ્રીન' કેપ માત્ર ગોરા ઓસ્ટ્રેલિયન ખેલાડીઓ માટે જ બનેલી છે. સિસ્ટમ એટલી પક્ષપાતી હતી કે શ્વેત સિવાયના અન્ય મૂળના ખેલાડીઓને આગળ વધવા જ દેવામાં આવતા નહોતા."

પત્ની-બાળકોની ચિંતા અને ધાર્મિક સવાલો પર આક્રોશ: "કોઈ મુસ્લિમને તેની આસ્થા ન પૂછો"

પોતાના પર્સનલ લાઈફના સંઘર્ષ અંગે વાત કરતા ખ્વાજાએ એક ખૂબ જ મહત્ત્વપૂર્ણ મુદ્દો ઉઠાવ્યો હતો. તેમણે કહ્યું કે તેઓ પોતાની પત્ની રશેલ અને બાળકોની સુરક્ષાને લઈને હંમેશાં ચિંતિત રહે છે, કારણ કે સમાજમાં મુસ્લિમો પ્રત્યે જોવાની દ્રષ્ટિ હજુ પણ સંપૂર્ણ બદલાઈ નથી. ખ્વાજાએ ઓસ્ટ્રેલિયન સમાજ અને મીડિયાને આકરી અપીલ કરતા જણાવ્યું કે,

"કોઈ પણ મુસ્લિમને તેના ધર્મ કે આસ્થા વિશે વારંવાર પ્રશ્નો પૂછીને કઠેડામાં ન ઊભો કરવામાં આવે. અમારે દર વખતે એ સાબિત કરવાની જરૂર નથી કે અમે સારા નાગરિક છીએ. એક વ્યક્તિની આસ્થા તેનો અંગત વિષય છે, અને તેને વારંવાર ધર્મના ચશ્માથી જોવાનું બંધ થવું જોઈએ."

ડ્રેસિંગ રૂમમાં દારૂનું કલ્ચર અને મુસ્લિમ તરીકે એકલતા

વર્ષ 2011માં જ્યારે ખ્વાજાએ ઓસ્ટ્રેલિયા માટે પ્રથમ મુસ્લિમ ક્રિકેટર તરીકે ટેસ્ટ ડેબ્યૂ કર્યું, ત્યારે ટીમનું વાતાવરણ તેના માટે બિલકુલ સાનુકૂળ નહોતું. ઓસ્ટ્રેલિયન ડ્રેસિંગ રૂમમાં મેચ જીત્યા બાદ દારૂની છોળો ઉડાવવી અને મોડી રાત સુધી સેલિબ્રેશન કરવું એ એક સામાન્ય કલ્ચર હતું. ઇસ્લામ ધર્મને ચુસ્તપણે પાળતા ખ્વાજા માટે આ બધું અજાણ્યું અને અસહ્ય હતું. ખ્વાજાએ સ્વીકાર્યું કે,

"હું ક્યારેય દારૂને અડતો નથી, જેના કારણે હું ડ્રેસિંગ રૂમમાં બિલકુલ એકલો પડી જતો હતો. ટીમ મેટ્સ સેલિબ્રેશન કરતા અને હું એક ખૂણામાં બેસી રહેતો. મને ટીમનો હિસ્સો બનવામાં વર્ષો લાગ્યા કારણ કે મારી ધાર્મિક ઓળખ અને તેમની લાઈફસ્ટાઈલ બિલકુલ અલગ હતી."

તમામ ભેદભાવોને મ્હાત આપીને બનાવ્યો શાનદાર કરિયર સ્કોર

આ તમામ સામાજિક અને સિસ્ટમેટિક ભેદભાવો છતાં, ઉસ્માન ખ્વાજાએ ક્રિકેટના મેદાન પર પોતાના બેટથી એવો જડબાતોડ જવાબ આપ્યો કે આખી દુનિયા જોતી રહી ગઈ. ઓસ્ટ્રેલિયા માટે ટેસ્ટ ક્રિકેટમાં તેમનો સ્કોર અને આંકડા અત્યંત પ્રભાવશાળી છે:

• ટેસ્ટ મેચ: 73
• કુલ રન: 5451
• બેટિંગ એવરેજ: 45.80
• શતક: 15
• અર્ધશતક: 25
• સર્વોચ્ચ સ્કોર: 195* (અણનમ)

ભેદભાવોની દિવાલ તોડીને ઓસ્ટ્રેલિયાના સૌથી ભરોસાપાત્ર અને દિગ્ગજ ઓપનર બનેલા ઉસ્માન ખ્વાજાના આ સનસનાટીભર્યા ઇન્ટરવ્યુએ સાબિત કર્યું છે કે ક્રિકેટની ગ્લેમરસ દુનિયા પાછળ ખેલાડીઓએ કેવા ભયાનક પર્સનલ અને સોશિયલ વોર લડવા પડે છે.