વોશિંગ્ટન સુંદર ઇજાગ્રસ્ત થતાં જ ચમકી આ ખેલાડીની કિસ્મત: BCCI એ રાતોરાત ટીમમાં કર્યો સામેલ!

Harsh Dubey Replaces Injured Washington Sundar for Lords Match : ભારત અને ઇંગ્લેન્ડ વચ્ચે 19 જુલાઈના રોજ લંડનના ઐતિહાસિક લોર્ડ્સ મેદાન પર વનડે સીરીઝનો ત્રીજો અને નિર્ણાયક મુકાબલો રમાવાનો છે. હાલમાં આ સીરીઝ 1-1 ની બરાબરી પર છે. આવી સ્થિતિમાં જે પણ ટીમ આ મેચ જીતશે, તે સીરીઝ પોતાના નામે કરી લેશે. આ મહામુકાબલો ભારતીય સમય અનુસાર બપોરે 3:30 વાગ્યે શરૂ થશે.

સુંદરની જગ્યાએ દુબેની ટીમમાં એન્ટ્રી

પરંતુ, આ નિર્ણાયક મેચ પહેલા ટીમ ઇન્ડિયાને એક મોટો ઝટકો લાગ્યો હતો. સ્ટાર ઓલરાઉન્ડર વોશિંગ્ટન સુંદર ઇજાના કારણે આ મહત્વની મેચમાંથી બહાર થઈ ગયો છે. હવે બીસીસીઆઈ દ્વારા વોશિંગ્ટન સુંદરના રિપ્લેસમેન્ટની સત્તાવાર જાહેરાત કરી દેવામાં આવી છે. ઘરઆંગણાના ક્રિકેટમાં શાનદાર પ્રદર્શન કરનારા સ્પિન બોલિંગ ઓલરાઉન્ડર હર્ષ દુબેને ભારતીય ટીમમાં સામેલ કરવામાં આવ્યા છે. ભારતીય ક્રિકેટ કંટ્રોલ બોર્ડ (BCCI) એ શનિવારે આ બાબતની સત્તાવાર પુષ્ટિ કરી છે.

બીસીસીઆઈના જણાવ્યા અનુસાર, કાર્ડિફના સોફિયા ગાર્ડન્સ ખાતે રમાયેલી બીજી વનડે મેચ દરમિયાન વોશિંગ્ટન સુંદરને જમણી હેમસ્ટ્રિંગમાં ઇજા થઈ હતી. તબીબી તપાસ બાદ તેમને સીરીઝની અંતિમ મેચમાંથી બહાર રાખવાનો નિર્ણય લેવાયો હતો. બોર્ડે માહિતી આપી છે કે સુંદર હવે સ્કેન કરાવશે અને આગળની સારવાર માટે નિષ્ણાત ડૉક્ટરની સલાહ લેશે.