'એ ભારતીય એજન્ટ છે...' પાકિસ્તાની કોચ પર રાશિદ લતીફનો ગંભીર આક્ષેપ, IPL કનેક્શનને જવાબદાર ઠેરવ્યું

Rashid Latif Calls Pakistan Coach Mike Hesson Indian Agent: પાકિસ્તાન ક્રિકેટમાં મેદાન પરના ખરાબ પ્રદર્શન કરતાં આંતરિક વિવાદો વધુ ચર્ચામાં રહે છે. ઇંગ્લેન્ડ પ્રવાસમાં ટેસ્ટ શ્રેણીમાં સતત પરાજય બાદ પાકિસ્તાન ક્રિકેટ બોર્ડ (PCB)એ ટીમમાં મોટા ફેરફારો કર્યા છે, ત્યારે હવે ટીમના વચગાળાના રેડ-બૉલ કોચ માઇક હેસન પણ એક મોટા વિવાદમાં ઘેરાયા છે. પાકિસ્તાનના પૂર્વ કેપ્ટન અને વિકેટકીપર બેટ્સમેન રાશિદ લતીફે માઇક હેસન પર ગંભીર સવાલો ઉઠાવતાં ઈશારાઓમાં તેમને 'ભારતીય એજન્ટ' ગણાવી દીધા છે, જેનાથી ક્રિકેટ જગતમાં ભારે હોબાળો મચી ગયો છે.

IPL કનેક્શન અને ભારતમાં વિતાવેલા સમયનો આપ્યો હવાલો

એક સ્પોર્ટ્સ બ્રોડકાસ્ટર સાથેની વાતચીત દરમિયાન રાશિદ લતીફે માઇક હેસનના ભારત અને ઇન્ડિયન પ્રીમિયર લીગ (IPL) સાથેના જોડાણનો ઉલ્લેખ કર્યો હતો:

• લતીફે દાવો કર્યો કે હેસન લાંબા સમય સુધી IPLમાં (રોયલ ચેલેન્જર્સ બેંગલુરુ સાથે) સક્રિય રહ્યા છે અને તેમણે ભારતમાં ઘણો સમય વિતાવ્યો છે.
• આ ભૂતકાળને આગળ ધરીને લતીફે એવી શંકા વ્યક્ત કરી કે સંભવ છે કે હેસનને કોઈ ખાસ હેતુ કે મકસદ સાથે પાકિસ્તાન ક્રિકેટમાં મોકલવામાં આવ્યા હોય અથવા તેમને 'પ્લાન્ટ' કરવામાં આવ્યા હોય.
• તેમણે પરોક્ષ રીતે એવો પણ આરોપ મૂક્યો કે ભારત સાથે જોડાયેલા લોકો વિદેશી કોચ મારફતે પાકિસ્તાન ક્રિકેટને નુકસાન પહોંચાડી શકે છે.

'કોઈ પુરાવો નથી, માત્ર વિચાર વ્યક્ત કરી રહ્યા છીએ'

સૌથી મહત્ત્વની બાબત એ છે કે રાશિદ લતીફના આ દાવા પાછળ કોઈ નક્કર પુરાવો રજૂ કરવામાં આવ્યો નથી. વીડિયો ચર્ચા દરમિયાન ખુદ લતીફ અને બ્રોડકાસ્ટરે સ્વીકાર્યું હતું કે તેમની પાસે આવા કોઈ પ્રમાણ કે સાબિતી નથી. તેમણે આ વાતચીતને માત્ર 'થિંકિંગ આઉટ લાઉડ' એટલે કે ખુલ્લા મંચ પર વિચાર રજૂ કરવા પૂરતી સીમિત ગણાવી હતી. જોકે, 'ઇન્ડિયન એજન્ટ' અને પાકિસ્તાન ક્રિકેટને બરબાદ કરવા જેવા ઉશ્કેરણીજનક શબ્દોના પ્રયોગના કારણે આ નિવેદને મોટો વિવાદ ઊભો કર્યો છે.

વિવાદો વચ્ચે હેસનની ટેસ્ટ ટીમમાં એન્ટ્રી

માઇક હેસન પહેલેથી જ પાકિસ્તાનની વ્હાઇટ-બૉલ ટીમના હેડ કોચ તરીકે કાર્યરત છે. ઇંગ્લેન્ડ સામેની ટેસ્ટ સીરિઝમાં 0-2થી પછાડાયા બાદ PCB એ તાકીદે હેડ કોચ સરફરાઝ અહેમદને હટાવીને બર્મિંગહામ ટેસ્ટ માટે માઇક હેસનને રેડ-બૉલના વચગાળાના મુખ્ય કોચ તરીકે નિયુક્ત કર્યા હતા.

પાકિસ્તાન ક્રિકેટમાં સિલેક્શન અને કોચિંગ મુદ્દે ચાલતી જૂથબંધી વચ્ચે પૂર્વ ખેલાડી દ્વારા પોતાના જ મુખ્ય કોચ પર 'ભારતીય એજન્ટ' હોવાના બેબુનિયાદ આરોપો મૂકવા એ માત્ર અટકળો અને કલ્પના આધારિત નિવેદનબાજી ગણાઈ રહી છે.