પંજાબ માટે IPL રમનારા 36 વર્ષીય ક્રિકેટરનું નિધન, કોહલી-યુવરાજથી લઈને ક્રિકેટ જગત દુઃખી

Former Punjab Cricketer Amanpreet Singh Gill Passes Away at 36 : ભારતીય ડોમેસ્ટિક ક્રિકેટ અને પંજાબ ક્રિકેટ એસોસિયેશન માટે એક અત્યંત દુખદ સમાચાર સામે આવ્યા છે. પંજાબના પૂર્વ ક્રિકેટર અને પંજાબ સીનિયર સિલેક્શન કમિટીના સભ્ય અમનપ્રીત સિંહ ગિલનું 36 વર્ષની નાની વયે બુધવાર, 6 મે 2026 ના રોજ વહેલી સવારે નિધન થયું છે. અમનપ્રીત સિંહ ગિલ એક પ્રતિભાશાળી ફાસ્ટ બોલર હતા અને તેમણે ભારતની અંડર-19 ટીમ તેમજ આઈપીએલમાં કિંગ્સ ઈલેવન પંજાબ (હાલનું પંજાબ કિંગ્સ) નું પ્રતિનિધિત્વ કર્યું હતું.

ક્રિકેટ કારકિર્દી પર એક નજર

16 સપ્ટેમ્બર 1989 ના રોજ ચંદીગઢમાં જન્મેલા અમનપ્રીત સિંહ ગિલ જમણેરી મધ્યમ ગતિના બોલર અને બેટ્સમેન હતા. તેમણે ભારતની અંડર-19 ટીમમાં રવિન્દ્ર જાડેજા અને વિરાટ કોહલી જેવા દિગ્ગજો સાથે ડ્રેસિંગ રૂમ શેર કર્યો હતો. 2009 માં તેઓ કિંગ્સ ઈલેવન પંજાબની ટીમમાં સામેલ થયા હતા, જ્યાં તેમને યુવરાજ સિંહ અને બ્રેટ લી જેવા દિગ્ગજો સાથે રહેવાની તક મળી હતી. ક્રિકેટમાંથી નિવૃત્તિ બાદ તેઓ પંજાબ ક્રિકેટ એસોસિયેશનમાં સિલેક્શન કમિટીના સભ્ય તરીકે કાર્યરત હતા.

દિગ્ગજ ક્રિકેટરોએ પાઠવી શ્રદ્ધાંજલિ

અમનપ્રીત સિંહના નિધનથી ક્રિકેટ જગત સ્તબ્ધ છે. સોશિયલ મીડિયા પર દિગ્ગજ ખેલાડીઓએ ભાવુક પોસ્ટ શેર કરી છે:

વિરાટ કોહલી: ભારતીય ટીમના સ્ટાર બેટ્સમેન વિરાટ કોહલીએ ટ્વિટ કરીને લખ્યું કે, "અમનપ્રીત ગિલના નિધનના સમાચાર સાંભળીને આઘાત અને દુખ થયું છે. તેમના પરિવાર અને પ્રિયજનોને મારી પ્રાર્થના અને શક્તિ. ઓમ શાંતિ."

યુવરાજ સિંહ: પૂર્વ દિગ્ગજ ઓલરાઉન્ડર યુવરાજ સિંહે પણ જૂની યાદો તાજી કરતા લખ્યું, "અમનપ્રીત સિંહ ગિલના નિધનથી ખૂબ જ દુખ થયું. શરૂઆતના દિવસોમાં અમે ડ્રેસિંગ રૂમ શેર કર્યો હતો. તેઓ એક શાંત અને સખત મહેનતુ ક્રિકેટર હતા જેમને રમત પ્રત્યે ખૂબ પ્રેમ હતો. તેમના પરિવાર પ્રત્યે મારી સંવેદના."

PCA એ વ્યક્ત કર્યો શોક

પંજાબ ક્રિકેટ એસોસિયેશન (PCA) એ સત્તાવાર નિવેદન જાહેર કરીને જણાવ્યું છે કે, "PCA પૂર્વ પંજાબ ક્રિકેટર અને સીનિયર સિલેક્શન કમિટીના સભ્ય અમનપ્રીત સિંહ ગિલના દુખદ અવસાન પર ઊંડો શોક વ્યક્ત કરે છે. વાહેગુરુ દિવંગત આત્માને શાંતિ આપે અને પરિવારને આ મુશ્કેલ સમયમાં શક્તિ આપે." 6 મેના રોજ સાંજે 4:00 કલાકે ચંદીગઢના મણીમાજરા સ્મશાનગૃહ ખાતે તેમના અંતિમ સંસ્કાર કરવામાં આવ્યા હતા.