ઈતિહાસમાં પહેલીવાર! FIFA વર્લ્ડ કપ જીતનારી ટીમને ટ્રોફી-મેડલ સિવાય મળશે આ અતિ કિંમતી ખાસ ભેટ

FIFA World Champion Rings For Winners: FIFA વર્લ્ડ કપ 2026ની ફાઈનલના વિજેતાઓને પ્રખ્યાત ટ્રોફી અને ગોલ્ડ મેડલ ઉપરાંત ખાસ રીતે ડિઝાઈન કરેલી ચેમ્પિયનશિપ રિંગ પણ મળશે. FIFA ટુર્નામેન્ટમાં આ પ્રકારનું સન્માન પ્રથમ વખત આપવામાં આવશે. FIFAની વેબસાઈટ પ્રમાણે અમેરિકાની એક જૂની ખેલ પરંપરાથી પ્રેરિત થઈને આ કસ્ટમાઈઝ્ડ રિંગ્સ ટુર્નામેન્ટના ચેમ્પિયનને આપવામાં આવશે. સ્પેન અને આર્જેન્ટિના વચ્ચે રવિવારે 19 જુલાઈ (સ્થાનિક સમય)ના રોજ ન્યૂયોર્ક-ન્યૂ જર્સી સ્ટેડિયમમાં રમાનારી ફાઈનલ બાદ આ સન્માન આપવામાં આવશે. ટુર્નામેન્ટની યાદમાં કુલ 2,026 રિંગ્સ બનાવવામાં આવશે, જેના પર અલગ-અલગ નંબરો હશે. તેમાંથી 30 રિંગ્સ વિજેતા ટીમના સભ્યો માટે રાખવામાં આવશે, જ્યારે બાકીની 1,996 રિંગ્સ વિશ્વભરના ચાહકો માટે ઓફિશિયલ લાઈસન્સ પ્રોડક્ટ તરીકે ઉપલબ્ધ રહેશે.

રિંગની મુખ્ય વિશેષતાઓ અને ડિઝાઈન

દરેક રિંગની એક બાજુ FIFA વર્લ્ડ કપ ટ્રોફીની ડિઝાઈન હશે, જ્યારે બીજી બાજુ વિજેતા ટીમની ઓળખ પ્રમાણે ખાસ કસ્ટમાઈઝેશન કરવામાં આવશે. દરેક રિંગ પર અલગ-અલગ નંબરો હશે. તેને ખાસ રીતે ફિટ કરવામાં આવશે અને તેની સાથે તે અસલી હોવાનું સર્ટિફિકેટ પણ આપવામાં આવશે. ફાઈનલ મેચ સમાપ્ત થયા બાદ તરત જશ્ન દરમિયાન વિજેતા ટીમના કેપ્ટન અને હેડ કોચને ટેમ્પરરી ચેમ્પિયનશિપ રિંગ આપવામાં આવશે. ત્યારબાદ વિજેતા ટીમના તમામ 30 સભ્યો માટે વિશેષ રૂપે ફાઈનલ રિંગ તૈયાર કરવામાં આવશે અને ઓફિશિયલ રીતે આપવામાં આવશે, જેથી તે બરાબર ફિટ થઈ શકે અને તેમની આ ઐતિહાસિક વર્લ્ડ કપ જીતની યાદગાર નિશાની બની શકે.

વર્તમાન ચેમ્પિયન આર્જેન્ટિનાએ સેમિફાઈનલમાં ઈંગ્લેન્ડ સામે 2-1થી રોમાંચક વિજય હાંસલ કર્યો હતો. તેઓ પ્રથમ હાફમાં પાછળ પડ્યા પછી વાપસી કરી. એન્ઝો ફર્નાન્ડિઝે બરાબરીનો ગોલ કર્યો અને પછી લૌટારો માર્ટિનેઝે સ્ટોપેજ-ટાઈમમાં વિનિંગ ગોલ કરીને વર્તમાન ચેમ્પિયનને સ્પેન સામે ટાઈટલ મેચમાં પહોંચાડી દીધી.

આર્જેન્ટિના વર્લ્ડ કપ 2026ની ફાઈનલમાં પહોંચી

ઈંગ્લેન્ડ સામેની આ જીત સાથે આર્જેન્ટિના વર્લ્ડ કપ 2026ની ફાઈનલમાં પહોંચી ગઈ છે, જ્યારે 1966 પછી પહેલીવાર વર્લ્ડ કપ ફાઈનલમાં પહોંચવાની ઈંગ્લેન્ડની આશા દુ:ખદ રીતે સમાપ્ત થઈ ગઈ છે. બીજી તરફ સ્પેને શાનદાર પ્રદર્શન કરીને ફ્રાન્સને 2-0થી હરાવ્યું અને 2010ની જીત બાદ પ્રથમ વખત ફિફા વર્લ્ડ કપની ફાઈનલમાં પહોંચ્યું. આ જીતમાં લામીન યામલે મહત્વની ભૂમિકા ભજવી હતી. તેણે લુકાસ ડિગ્ને પાસેથી બોલ છીનવી લીધો અને પેનલ્ટી હાંસલ કરી, જેને 22મી મિનિટે મિકેલ ઓયારઝાબાલે ગોલમાં ફેરવી સ્પેનને લીડ અપાવી.

બ્રેક બાદ પેડ્રો પોરોએ ડેની ઓલ્મો સાથે શાનદાર તાલમેલ દેખાડતા સ્પેનની લીડ બમણી કરી, જ્યારે ફ્રાન્સને ગોલ કરવાની સ્પષ્ટ તકો બનાવવા માટે સંઘર્ષ કરવો પડ્યો. યામલનો એક ગોલ ઑફસાઈડના કારણે રદ કરી દેવામાં આવ્યો, અને છેલ્લી ઘડીના કાયલિયન એમ્બાપ્પે અને ઓરેલિયન ચૌમેનીના પ્રયત્નો છતાં સ્પેનના ડિફેન્સ મક્કમ હતા અને ટૂર્નામેન્ટની સાત મેચોમાં પોતાની છઠ્ઠી ક્લીન શીટ હાંસલ કરી.