જોકોવિચ વિમ્બલ્ડનમાં ધડામ: સેમિફાઇનલમાં પરાજય બાદ નિવૃત્તિની અટકળો પર તોડ્યું મૌન

Wimbledon Farewell Not Yet Ready: ટેનિસ જગતના દિગ્ગજ ખેલાડી નોવાક જોકોવિચને વિમ્બલ્ડનના પુરુષ સિંગલ્સની બીજી સેમિફાઇનલમાં શુક્રવારે મોટો ઝટકો લાગ્યો છે. દુનિયાના નંબર 1 ખેલાડી જેનિક સિનરે જોકોવિચને સીધા સેટોમાં પરાજય આપીને ટૂર્નામેન્ટમાંથી બહાર કરી દીધા છે. જોકે, આ કારમી હાર બાદ પણ જોકોવિચે પોતાની નિવૃત્તિની તમામ અટકળોને ફગાવી દીધી છે. તેમણે સ્પષ્ટ કર્યું છે કે તેઓ વિમ્બલ્ડનના કોર્ટ પર ઓછામાં ઓછું એક વાર વધુ વાપસી કરવા ઈચ્છે છે.

7 વખતના ચેમ્પિયન જોકોવિચનું 39મી વખત ગ્રાન્ડ સ્લેમ સિંગલ્સ ફાઇનલમાં રમવાનું સપનું આ હાર સાથે તૂટી ગયું છે. તે પોતાના 25મા ગ્રાન્ડ સ્લેમ ટાઇટલને જીતવા માટે સતત પ્રયાસો ચાલુ રાખશે. સર્બિયાના આ સ્ટાર ખેલાડીને જેનિક સિનરે 6-4, 6-4, 6-4થી હરાવીને ફાઇનલમાં જગ્યા બનાવી લીધી છે.

સિસ્ટમેટિક ગેમ સામે જોકોવિચ લાચાર, ફેન્સે આપ્યું સ્ટેન્ડિંગ ઓવેશન

સમગ્ર મેચ દરમિયાન જેનિક સિનરે અદભુત પ્રદર્શન કર્યું હતું અને જોકોવિચને મેચમાં વાપસી કરવાની એક પણ તક આપી ન હતી. મેચ પૂર્ણ થયા બાદ જ્યારે જોકોવિચ સેન્ટર કોર્ટની બહાર નીકળી રહ્યા હતા, ત્યારે ત્યાં હાજર તમામ દર્શકોએ ઊભા થઈને તાળીઓના ગડગડાટ સાથે તેમનું સન્માન કર્યું હતું. આ ભાવુક ક્ષણ બાદ તરત જ મીડિયા અને સોશિયલ મીડિયા પર એવી અટકળો શરૂ થઈ ગઈ હતી કે કદાચ જોકોવિચે વિમ્બલ્ડનમાં પોતાની કરિયરની છેલ્લી મેચ રમી લીધી છે.

જોકે, મેચ પછીની પ્રેસ કોન્ફરન્સમાં 39 વર્ષીય સર્બિયન ખેલાડીએ આ અહેવાલોને નકારી કાઢ્યા હતા. તેમણે જણાવ્યું,

"હું ઓછામાં ઓછું એક વાર વધુ વિમ્બલ્ડનમાં રમવા માંગું છું. ભવિષ્યમાં શું થશે, તે તો સમય જ બતાવશે."

તેમણે સ્વીકાર્યું કે આ હાર અત્યંત નિરાશાજનક છે, પરંતુ તેનાથી તેમનો ઉત્સાહ ઓછો થયો નથી. તેમનો ટાર્ગેટ હજુ પણ વિમ્બલ્ડન જીતવાનો જ છે અને તેના માટે તેઓ સતત મહેનત કરી રહ્યા છે.

ક્વાર્ટર ફાઇનલની જીતથી મળ્યો આત્મવિશ્વાસ, સિનરના કર્યા વખાણ

જોકોવિચે આ ટૂર્નામેન્ટના પોતાના પ્રદર્શનના હકારાત્મક પાસાઓ પર પણ પ્રકાશ પાડ્યો હતો. તેમણે ખાસ કરીને ક્વાર્ટર ફાઇનલમાં ફેલિક્સ ઓગર-અલિયાસિમે સામે મળેલી જીતનો ઉલ્લેખ કર્યો હતો. તેમણે કહ્યું કે,

"મને મારા પ્રદર્શન પર ગર્વ છે. મેં મારી જાતને અને દુનિયાને બતાવી દીધું છે કે હું આજે પણ સૌથી ઉચ્ચ સ્તરે ટેનિસ રમવાની ક્ષમતા ધરાવું છું."

સેમિફાઇનલની હાર અંગે વાત કરતા જોકોવિચે સ્વીકાર્યું કે તેઓ પોતાની અપેક્ષા મુજબનું સર્વશ્રેષ્ઠ પ્રદર્શન કરી શક્યા ન હતા. તેમણે જેનિક સિનરના વખાણ કરતા કહ્યું કે, સિનરે શાનદાર રમત બતાવી અને તે આ જીત માટે પૂરેપૂરો હકદાર હતો. હારનું દુઃખ ચોક્કસ છે, પરંતુ સમગ્ર ટૂર્નામેન્ટ દરમિયાન તેમનો સંઘર્ષ અને સમર્પણ સકારાત્મક રહ્યા છે.

હવે ટાર્ગેટ US ઓપન: માર્ગરેટ કોર્ટનો રેકોર્ડ તોડવા પર નજર

24 વખતના ગ્રાન્ડ સ્લેમ ચેમ્પિયન નોવાક જોકોવિચે પોતાનું છેલ્લું મોટું ટાઇટલ ગયા વર્ષે US ઓપનમાં જીત્યું હતું. હવે તેમની નજર આગામી US ઓપન પર ટકેલી છે, જ્યાં તે ઐતિહાસિક 25મું ગ્રાન્ડ સ્લેમ જીતવાનો પ્રયાસ કરશે. જો તે આ ટાઇટલ જીતી લેશે, તો ટેનિસ ઇતિહાસમાં સૌથી વધુ ગ્રાન્ડ સ્લેમ જીતવાના મામલે ઓસ્ટ્રેલિયાની માર્ગરેટ કોર્ટને પાછળ છોડી દેશે.

જોકોવિચે છેલ્લે ઉમેર્યું કે તેઓ કોઈ પણ પ્રકારના પ્રેશરમાં રમી રહ્યા નથી. તેઓ માત્ર એટલા માટે કોર્ટ પર ઉતરે છે કારણ કે તેમને ટેનિસ પ્રત્યે અનહદ પ્રેમ છે. તેમણે આત્મવિશ્વાસ વ્યક્ત કર્યો કે તેઓ આજે પણ દુનિયાના ટોપ-5 અને ટોપ-10 ખેલાડીઓ સામે ટક્કર લેવા માટે સક્ષમ છે.