ક્રિસ ગેલનો 13 વર્ષ જૂનો વર્લ્ડ રેકોર્ડ તૂટ્યો: 20 વર્ષના યુવાને 79 બોલમાં 188 રન ફટકારી રચ્યો ઈતિહાસ!
Summarized by AI; it may make mistakes. Check important info
Summarized by AI; it may make mistakes. Check important info
Lhuan Dre Pretorius Breaks Chris Gayle Record: સાઉથ આફ્રિકાના લુહાન ડી પ્રિટોરિયસે T20 ફોર્મેટમાં સૌથી વધુ રનના વ્યક્તિગત સ્કોરનો નવો રેકોર્ડ સ્થાપિત કર્યો છે. 20 વર્ષના ડાબોડી બેટ્સમેને CSA T20 ચેલેન્જમાં માત્ર 79 બોલમાં અણનમ 188 રનની વિસ્ફોટક ઈનિંગ રમી હતી. તેણે પોતાની ઈનિંગ દરમિયાન 13 છગ્ગા અને 15 ચોગ્ગા ફટકાર્યા હતા.
લુહાન ડી પ્રિટોરિયસે આ સાથે જ ક્રિસ ગેલના 175* રનનો રેકોર્ડ તોડી નાખ્યો છે. ગેલે IPL 2013માં રોયલ ચેલેન્જર્સ બેંગલુરુ માટે પુણે વોરિયર્સ વિરુદ્ધ રેકોર્ડ ઈનિંગ રમી હતી. ત્યારે તેમણે 66 બોલમાં 13 ચોગ્ગા અને 17 છગ્ગાની મદદથી અણનમ 175 રન બનાવ્યા હતા. પ્રિટોરિયસ માત્ર 12 રનથી પોતાની પ્રથમ T20 બેવડી સદી ફટકારવાથી ચૂકી ગયો હતો.
T20માં ટોપ-5 સર્વશ્રેષ્ઠ વ્યક્તિગત સ્કોર
188 (79 બોલ)* - લુહાન ડી પ્રિટોરિયસ (સાઉથ આફ્રિકા)
175 (66 બોલ)* - ક્રિસ ગેલ (વેસ્ટ ઇન્ડિઝ)
172 (76 બોલ) - એરોન ફિંચ (ઓસ્ટ્રેલિયા)
164 (65 બોલ)* - હમઝા ખાન (રવાંડા)
164 (57 બોલ) - કરનવીર સિંહ (ઓસ્ટ્રિયા)
58 બોલમાં 150 રન બનાવ્યા
તમને જણાવી દઈએ કે બ્લોમફોન્ટીનમાં રમાયેલા મુકાબલામાં ટાઈટન્સે પહેલા બેટિંગ કરવાનો નિર્ણય લીધો હતો. પ્રિટોરિયસે તોફાની શરૂઆત કરી અને માત્ર 24 બોલમાં પોતાની અડધી સદી પૂરી કરી લીધી. ત્યારબાદ આગામી 16 બોલમાં પ્રિટોરિયસે પોતાની સદી પૂરી કરી. તેણે 58 બોલમાં 150 રનનો આંકડો પાર કર્યો. પ્રિટોરિયસ સામે નાઈટ્સના બોલરો લાચાર નજરે પડ્યા.
ટાઈટન્સનો બીજો સર્વશ્રેષ્ઠ ટીમ સ્કોર
ડાબોડી બેટ્સમેન પ્રિટોરિયસે પોતાની તોફાની ઈનિંગ દરમિયાન 13 છગ્ગા અને 15 ચોગ્ગા ફટકાર્યા. તેની ઈનિંગના દમ પર ટાઈટન્સે 20 ઓવરમાં 267/3નો સ્કોર બનાવ્યો. આ CSA T20 ચેલેન્જમાં બીજો સર્વશ્રેષ્ઠ ટીમ સ્કોર રહ્યો.
આ પહેલા 2022માં ટાઈટન્સે નાઈટ્સ વિરુદ્ધ જ 20 ઓવરમાં 271/3નો સ્કોર બનાવ્યો હતો, જે રેકોર્ડ આજે પણ અકબંધ છે. ટાઈટન્સ હવે CSA T20 ચેલેન્જના ઇતિહાસમાં પાંચ સર્વશ્રેષ્ઠ સ્કોર બનાવનારી ટીમ બની ચૂકી છે.
નાની કારકિર્દીમાં મોટી સિદ્ધિઓ
પ્રિટોરિયસની 2026-27 સીઝનમાં આ પ્રથમ મેચ હતી. તે છેલ્લા કેટલાક સમયથી શાનદાર ફોર્મમાં છે. તેણે છેલ્લી બે મેચોમાં ઝિમ્બાબ્વે અને નામીબિયા વિરુદ્ધ ટ્રાઈ-સિરીઝમાં અનુક્રમે 94 અને 101 રનની ઈનિંગ રમી હતી. તેણે ક્રિકેટના ત્રણેય ફોર્મેટમાં કુલ મળીને 22 આંતરરાષ્ટ્રીય મેચ રમી છે. જોકે, T20માં પ્રિટોરિયસની આ 91મી મેચ હતી, જ્યાં તેનો સ્ટ્રાઈક રેટ 150થી વધુનો છે.
