બધા એથ્લેટ્સ સરખા, ક્રિકેટર્સને 5-સ્ટાર સુવિધા નહીં મળે: એશિયન ગેમ્સ અંગે IOAનો BCCIને સ્પષ્ટ જવાબ

Asian Games 2026: IOA Declines Special Hotel Treatment for BCCI | એશિયન ગેમ્સ 2026 પહેલાં ભારતીય ઓલિમ્પિક સંઘ અને ભારતીય ક્રિકેટ કંટ્રોલ બોર્ડ વચ્ચે ખેલાડીઓના રોકાણ અને સુવિધાઓને લઈને મહત્વનો વળાંક આવ્યો છે. જાપાન ખાતે યોજાનારી એશિયન ગેમ્સમાં ભારતીય ક્રિકેટ ટીમો માટે કોઈપણ પ્રકારની વિશેષ આવાસ વ્યવસ્થા કરવાનો IOAએ સ્પષ્ટ ઇનકાર કરી દીધો છે. સંઘે સ્પષ્ટતા કરી છે કે રમતોત્સવમાં ભાગ લઈ રહેલા તમામ 36 રમતોના ખેલાડીઓ સમાન છે અને ક્રિકેટર્સ માટે કોઈ અલગથી વિશેષ વ્યવસ્થા કરવામાં આવશે નહીં. હવે BCCIએ નિર્ણય લેવાનો રહેશે.

IOAની સ્પષ્ટતા: તમામ 36 રમતોના રમતવીરો સાથે સમાન વ્યવહાર

IOAના CEO રઘુરામ અય્યરે કહ્યું કે, જો આયોજકો દ્વારા આપવામાં આવેલી ગેમ્સ હોટેલ્સ BCCIની જરૂરિયાતોને અનુરૂપ ન હોય, તો બોર્ડ પોતાની સ્વતંત્ર વ્યવસ્થા કરવા માટે મુક્ત છે.

BCCIના CEOએ અમારો સંપર્ક કર્યો હતો અને બંને પક્ષો વચ્ચે સાર્થક ચર્ચા થઈ છે. તેઓ સુવિધાઓની સમીક્ષા કરવા માટે જાપાનમાં એક એડવાન્સ ટીમ મોકલવાનું વિચારી રહ્યા છે. IOAને તેમાં કોઈ વાંધો નથી. તેમની સમીક્ષાના આધારે તેઓ નક્કી કરી શકે છે કે આયોજકોની સુવિધાઓ વાપરવી કે પોતાની વ્યવસ્થા કરવી. BCCI અને આયોજકોએ શ્રેષ્ઠ ઉકેલ શોધવાનો છે. IOA તમામ રમતો, એથ્લેટ્સ, કોચ અને સમગ્ર ડેલિગેશનને સમાન દૃષ્ટિથી જુએ છે. — રઘુરામ અય્યર, CEO - ભારતીય ઓલિમ્પિક સંઘ

ભારતીય ટીમોને ફાળવાયેલી હોટેલ્સ અને BCCIની ચિંતા

સામાન્ય રીતે ભારતીય ક્રિકેટર્સ દેશ કે વિદેશ પ્રવાસ દરમિયાન 5-સ્ટાર લક્ઝરી હોટેલ્સમાં રહેવા ટેવાયેલા હોય છે. પરંતુ આ વખતે ભારતીય મેન્સ ટીમને થ્રી સ્ટાર અને વિમેન્સ ટીમને ફોર સ્ટાર હોટલ ફાળવવામાં આવી છે. આટલું જ નહીં ખેલાડીઓને પોતાનો અલગ રૂમ પણ મળે, એક રૂમમાં એકથી વધુ ખેલાડીએ રહેવું પડશે.

પોતાના ખર્ચે અલગ રહેવું હોય તો BCCIની સંપૂર્ણ જવાબદારી

જો BCCI આયોજકોની હોટેલને બદલે ખેલાડીઓ માટે અલગ લક્ઝરી હોટેલ રાખવાનો નિર્ણય લેશે, તો તેની સમગ્ર લોજિસ્ટિક્સ વ્યવસ્થા બોર્ડે જાતે જ સંભાળવી પડશે.

• ખેલાડીઓના રૂમ તેમજ તેમના ખાસ ડાયેટ અને ભોજનની સ્વતંત્ર વ્યવસ્થા.
• ખેલાડીઓને મેચ વેન્યૂ સુધી લઈ જવા અને સમયસર મેદાન પર પહોંચાડવાની સંપૂર્ણ જવાબદારી.
• અલગ રહેવા છતાં BCCIએ આ નિર્ણય IOA મારફતે જ આયોજકો સુધી પહોંચાડવો પડશે.

એન્ટિ-ડોપિંગ ટેસ્ટિંગ અને કડક નિયમો

અલગ હોટેલમાં રોકાણ કરવાથી એન્ટિ-ડોપિંગ પ્રક્રિયાઓ પર પણ અસર પડશે. ખેલાડીઓએ રમત નિયમોનું ચુસ્ત પાલન કરવું પડશે. વર્લ્ડ એન્ટિ-ડોપિંગ એજન્સી અને ઇન્ટરનેશનલ ટેસ્ટિંગ એજન્સીના અધિકારીઓને ખેલાડીઓના નવા રોકાણના લોકેશનની સચોટ માહિતી આપવી પડશે, જેથી ગમે ત્યારે રેન્ડમ ડોપિંગ ટેસ્ટ થઈ શકે.

સુરક્ષા અને એક્રેડિટેશન સંબંધિત તમામ નિયમો યથાવત રહેશે અને બિન-અધિકૃત વ્યક્તિઓને પ્રવેશ મળશે નહીં.

બંને વર્ગોમાં ડિફેન્ડિંગ ચેમ્પિયન તરીકે ઉતરશે ભારત

હાંગઝોઉ 2022 એશિયન ગેમ્સમાં ભારતે મેન્સ અને વિમેન્સ બંને ટી20 ક્રિકેટ સ્પર્ધાઓમાં ગોલ્ડ મેડલ જીત્યો હતો. આ વખતે ભારત ડિફેન્ડિંગ ચેમ્પિયન તરીકે પોતાના ટાઇટલનું રક્ષણ કરવા મેદાનમાં ઉતરશે.