Instagram પર પોસ્ટ કરતાં પહેલા આ નવો નિયમ જાણી લેજો! આ લેબલ નહીં લગાવો તો ઘટી જશે રીચ

Instagram Mandates AI-Generated Profile Labels: સોશિયલ મીડિયા પ્લેટફોર્મ Instagram હવે યૂઝર્સને એ ઓળખવામાં મદદ કરશે કે કોઈ પ્રોફાઇલ વાસ્તવિક વ્યક્તિની છે કે આર્ટિફિશિયલ ઇન્ટેલિજન્સ (AI) દ્વારા બનાવવામાં આવેલી છે. પ્લેટફોર્મે AI-જનરેટેડ વ્યક્તિ દર્શાવતી પ્રોફાઇલ્સ માટેના નિયમોમાં મોટો ફેરફાર કર્યો છે. જો કોઈ ક્રિએટર પોતાની પ્રોફાઇલ કે કન્ટેન્ટમાં AI દ્વારા બનાવેલી વ્યક્તિ દર્શાવે છે અને તેની યોગ્ય જાણકારી આપતું નથી, તો ઇન્સ્ટાગ્રામ તેના કન્ટેન્ટની રીચ અટકાવી શકે છે અને તેનું રિકમન્ડેશન બંધ કરી શકે છે.

AI પ્રોફાઇલ્સ માટે નવું લેબલ: 'AI-Generated Profile'

• જૂના લેબલનું નામ બદલાયું: ઇન્સ્ટાગ્રામ પોતાના સત્તાવાર બ્લોગ પોસ્ટમાં જણાવ્યું છે કે તે હાલના 'AI Creator' લેબલનું નામ બદલીને 'AI-Generated Profile' કરી રહ્યું છે.
• ટેસ્ટિંગ અને કન્ફર્મેશન: પ્લેટફોર્મે આ વર્ષની શરૂઆતમાં જ આ લેબલનું પરીક્ષણ શરૂ કર્યું હતું. જે ક્રિએટર્સે અગાઉ જૂના લેબલનો ઉપયોગ કર્યો છે, તેઓ નવા લેબલને જોઈને તેને કન્ફર્મ કરી શકે છે અથવા જો હવે તે લાગુ ન પડતું હોય તો હટાવી શકે છે.
• નવા લેબલનો ઉપયોગ: આ નવું લેબલ એવી તમામ પ્રોફાઇલ્સ માટે ફરજિયાત હશે જેમાં AI દ્વારા બનાવેલી વ્યક્તિ કે કેરેક્ટર દર્શાવવામાં આવ્યા હોય.

લેબલ નહીં લગાવવા પર રિકમન્ડેશન અને રીચ પર થશે મોટી અસર

રિકમન્ડેશન પર રોક: જો કોઈ પ્રોફાઇલમાં AI-નિર્મિત વ્યક્તિ દેખાતી હોય અને જરૂરી AI લેબલ ન લગાવ્યું હોય, તો તે એકાઉન્ટ ઇન્સ્ટાગ્રામના અલ્ગોરિધમિક રિકમન્ડેશન માટે અયોગ્ય ઠરશે.

એકાઉન્ટ સ્ટેટસમાં જાણકારી: જે ક્રિએટર્સની રીચ પર અસર થશે તેમને પ્લેટફોર્મ તરફથી નોટિફિકેશન મળશે. તેઓ પોતાના Account Status સેક્શનમાં જઈને ચકાસી શકશે કે તેમની પ્રોફાઇલ પર કોઈ રીચ પ્રતિબંધ મૂકવામાં આવ્યો છે કે નહીં.

પ્રતિબંધ હટાવવાની રીત: જો પ્રોફાઇલની રિકમન્ડેશન યોગ્યતા ગુમાવી દીધી હોય, તો ક્રિએટર 'AI-Generated Profile' લેબલ ઉમેરીને પોતાની પ્રોફાઇલને ફરીથી રિકમન્ડેશન માટે પાત્ર બનાવી શકે છે.

સાચું લેબલ લગાવનાર ક્રિએટર્સને રીચમાં કોઈ નુકસાન નહીં

ઇન્સ્ટાગ્રામે સ્પષ્ટતા કરી છે કે AI-જનરેટેડ પ્રોફાઇલ અંગે પારદર્શકતા રાખીને યોગ્ય લેબલ લગાવનાર ક્રિએટર્સને કોઈ રીચ પેનલ્ટી આપવામાં આવશે નહીં. જો કોઈ ક્રિએટરને લાગે કે તેની પ્રોફાઇલ પર ભૂલથી પ્રતિબંધ મૂકાયો છે, તો તે એકાઉન્ટ સ્ટેટસ દ્વારા અપીલ કરી શકે છે. અપીલ મંજૂર થતાં જ પ્રોફાઇલ અને તેનું કન્ટેન્ટ ફરીથી સામાન્ય રીતે રિકમન્ડ થવા લાગશે. સામાન્ય કન્ટેન્ટ માટે ફોટો/વીડિયો એડિટિંગમાં AI ટૂલ્સનો ઉપયોગ કરવા માત્રથી પ્રોફાઇલ-લેવલનું AI લેબલ લગાવવું ફરજિયાત રહેશે નહીં.

યુઝર્સના ફીડબેક અને ફરિયાદો બાદ લેવાયો મોટો નિર્ણય

આ ફેરફાર એવા યુઝર્સના સતત પ્રતિભાવો બાદ કરવામાં આવ્યો છે જેમને એવી પ્રોફાઇલ્સ જોવા મળતી હતી જે પ્રથમ નજરે વાસ્તવિક માનવી જેવી લાગતી હતી, પરંતુ વાસ્તવમાં તેમાં દર્શાવવામાં આવેલી વ્યક્તિ AI દ્વારા તૈયાર કરવામાં આવેલી હતી. પ્લેટફોર્મનું માનવું છે કે આ નવી લેબલિંગ સિસ્ટમથી યુઝર્સને એ સ્પષ્ટ સમજવામાં મદદ મળશે કે સ્ક્રીન પર દેખાતી પ્રોફાઇલ પાછળ વાસ્તવિક વ્યક્તિ છે કે આર્ટિફિશિયલ ઇન્ટેલિજન્સ.