2030 સુધીમાં ભારત પાસે વિશ્વનો સૌથી મોટો ડેવલપર સમુદાય હોઈ શકે છે: માઇક્રોસોફ્ટ સીઈઓ સત્ય નડેલાનું મોટું નિવેદન

India To Host Largest Developers 2030: માઇક્રોસોફ્ટના સીઈઓ સત્ય નડેલાએ જણાવ્યું છે કે ભારતનું ઝડપથી વિસ્તરી રહેલું ટેકનોલોજી વર્કફોર્સ 2030 સુધીમાં દેશને વિશ્વનો સૌથી મોટો ડેવલપર સમુદાય બનાવવામાં મદદ કરી શકે છે. સિએટલમાં યોજાયેલી એક વિશેષ બેઠક દરમિયાન તેમણે આ નિવેદન આપ્યું હતું, જ્યાં ભારતીય-અમેરિકન ટેક લીડર્સે આર્ટિફિશિયલ ઇન્ટેલિજન્સ (AI), સેમિકન્ડક્ટર્સ, ક્વોન્ટમ કમ્પ્યુટિંગ, એરોસ્પેસ અને એડવાન્સ્ડ મેન્યુફેક્ચરિંગ જેવા મહત્ત્વપૂર્ણ ક્ષેત્રોમાં ભારત અને અમેરિકા વચ્ચેના સંબંધોને વધુ મજબૂત કરવા પર ઊંડાણપૂર્વક ચર્ચા કરી હતી. સત્ય નડેલાએ ભારતના માનવ સંસાધનોની કુશાગ્ર બુદ્ધિ પ્રતિભા અને નવીનતાની ભરપૂર પ્રશંસા કરી હતી.

ભારતમાં 17.5 અબજ ડૉલરનું જંગી રોકાણ કરશે માઇક્રોસોફ્ટ

ભારત જ્યારે ઝડપથી AI-કેન્દ્રિત અર્થતંત્રનું નિર્માણ કરી રહ્યું છે ત્યારે માઇક્રોસોફ્ટ ઇન્ફ્રાસ્ટ્રક્ચર, સ્કીલ ડેવલપમેન્ટ અને સાર્વભૌમ તકનીકી ક્ષમતાઓમાં રોકાણ કરવાની યોજના બનાવી રહ્યું છે. માઇક્રોસોફ્ટે 2026થી 2029 વચ્ચે ભારતમાં 17.5 અબજ ડૉલરના જંગી રોકાણની જાહેરાત કરી છે. એશિયામાં કંપનીનું આ સૌથી મોટું રોકાણ હશે, જેનો મુખ્ય ઉદ્દેશ્ય ક્લાઉડ અને AI ઇન્ફ્રાસ્ટ્રક્ચરનો વિસ્તાર કરવાનો તેમજ દેશમાં ઓપરેશન્સ અને સ્કીલિંગને મોટો વેગ આપવાનો છે.

સિએટલમાં ‘IDEAS 4 INDIA' ફોરમનું આયોજન

સિએટલ સ્થિત ભારતીય કોન્સ્યુલેટ જનરલ દ્વારા ‘IDEAS 4 INDIA: ઇન્ડિયન અમેરિકન ટેક સીઈઓ ફોરમ | અનલોકિંગ ધ ટેક ડિવિડન્ડ' શીર્ષક હેઠળ આ વિશેષ કાર્યક્રમનું આયોજન કરવામાં આવ્યું હતું. આ મંચ પર માઇક્રોસોફ્ટ, એમેઝોન, બોઇંગ, OpenAI, ઇન્ટેલ, એન્થ્રોપિક અને વીમ સોફ્ટવેર જેવી વૈશ્વિક જાયન્ટ કંપનીઓના 40થી વધુ ભારતીય મૂળના સીઈઓ અને વરિષ્ઠ એક્ઝિક્યુટિવ્સ ઉપસ્થિત રહ્યા હતા. આ બેઠકમાં ડેટા સેન્ટર્સ, AI ઇન્ફ્રાસ્ટ્રક્ચર તેમજ ચિપ ડિઝાઇન અને મેન્યુફેક્ચરિંગ ક્ષેત્રે સહયોગ વધારવા અંગે સાર્થક ચર્ચાઓ થઈ હતી.

એમેઝોન અને કોસ્ટકો દ્વારા પણ ભારતમાં મોટા રોકાણની જાહેરાત

અમેરિકામાં ભારતના રાજદૂત વિનય ક્વાત્રાએ જણાવ્યું કે આ બેઠકમાં સામેલ અગ્રણીઓએ બંને દેશો વચ્ચેના તકનીકી સંબંધોને નવી ઊંચાઈએ લઈ જવામાં ઊંડો રસ દાખવ્યો છે. તેમણે સ્પષ્ટ કર્યું કે ભારતનું AI મિશન સર્વસમાવેશી, ઓપન, સાર્વભૌમ, સુરક્ષિત અને વિશ્વાસપાત્ર માળખા પર આધારિત છે. આ ચર્ચાઓ એવા સમયે થઈ રહી છે જ્યારે એમેઝોને પણ 2026થી 2030 દરમિયાન ભારતમાં 48 અબજ ડૉલરના રોકાણની જાહેરાત કરી છે અને રિટેલ જાયન્ટ કોસ્ટકો હૈદરાબાદમાં પોતાનું સૌપ્રથમ ગ્લોબલ કેપેબિલિટી સેન્ટર સ્થાપવા જઈ રહી છે. કાર્યક્રમ દરમિયાન સિએટલ સાથે જોડાયેલા અને તાજેતરમાં અવસાન પામેલા ભારતીય મૂળના બે દિગ્ગજ ટેક લીડર્સ—આઇસર્ટિસના સહ-સ્થાપક અને સીઈઓ સમીર બોડાસ તેમજ મેડ્રોના વેન્ચર ગ્રૂપના મેનેજિંગ ડિરેક્ટર અને માઇક્રોસોફ્ટના પૂર્વ કોર્પોરેટ વાઇસ પ્રેસિડેન્ટ એસ. સોમાસેગરને ભાવભરી શ્રદ્ધાંજલિ પણ અર્પણ કરવામાં આવી હતી.