ChatGPT બનાવતી કંપનીના AI એજન્ટે સરકારી સિસ્ટમ કરી હેક: ઓસ્ટ્રેલિયામાં વિશ્વનો પ્રથમ કિસ્સો

OpenAI Agent Infiltrates Australian Government Medicare Database: ઓસ્ટ્રેલિયામાં ChatGPT બનાવતી અગ્રણી કંપની OpenAIના એક AI એજન્ટ દ્વારા સરકારી સિસ્ટમમાં અનધિકૃત રીતે ઘૂસણખોરી કરવાનો સનસનાટીભર્યો મામલો સામે આવ્યો છે. ઓસ્ટ્રેલિયાના વડાપ્રધાન એન્થની અલ્બનીઝે જણાવ્યું છે કે કોઈપણ સરકારી નેટવર્કમાં AI એજન્ટ દ્વારા કરવામાં આવેલી હેકિંગનો આ પ્રથમ જાણીતો કિસ્સો માનવામાં આવી રહ્યો છે. આ AI એજન્ટે દેશના 'મેડિકેર સ્ટેટિસ્ટિક્સ ડેટાબેઝ'ની પબ્લિક તેમજ નોન-પબ્લિક ફાઇલો સુધી પહોંચ બનાવી હતી અને તેમાં નવી ફાઇલો પણ લખી હતી. વડાપ્રધાન અલ્બનીઝે ન્યૂયોર્કમાં સંયુક્ત રાષ્ટ્ર મહાસભા દરમિયાન OpenAIના CEO સેમ ઓલ્ટમેન સાથે સીધી વાતચીત કરીને આ ગંભીર બાબત અંગે ઓસ્ટ્રેલિયાની ચિંતા વ્યક્ત કરી હતી.

AI એજન્ટે સિસ્ટમમાં કેવી રીતે કરી ઘૂસણખોરી?

અલ્બનીઝના જણાવ્યા મુજબ, આ AI એજન્ટ આરોગ્ય ખર્ચ સંબંધિત સંશોધન કરી રહ્યો હતો. જવાબો અને માહિતી શોધતી વખતે તેણે તે ડિજિટલ બ્લોકને ઓળંગી લીધો હતો જેને સુરક્ષાના હેતુથી અમુક ભાગો સુધીની પહોંચ રોકવા માટે લગાવવામાં આવ્યો હતો. OpenAIના પ્રવક્તા ડુ પુસાટેરીએ જણાવ્યું હતું કે આ ઘટના જૂન 2026માં બની હતી, પરંતુ કંપનીને તેની જાણ ઓગસ્ટ મહિનામાં પોતાના AI મૉડલ્સની વ્યાપક ચકાસણી દરમિયાન થઈ હતી.

અન્ય 3 સરકારી વિભાગો પ્રભાવિત થવાની આશંકા

ઓસ્ટ્રેલિયન સિગ્નલ્સ ડિરેક્ટોરેટની મદદથી આ સમગ્ર મામલાની ફોરેન્સિક તપાસ ચાલી રહી છે. તપાસ અધિકારીઓને આશંકા છે કે અન્ય ત્રણ મહત્ત્વપૂર્ણ સરકારી વિભાગો પણ આનાથી પ્રભાવિત થયા હોઈ શકે છે:

• ઓસ્ટ્રેલિયન ઇન્સ્ટિટ્યૂટ ઓફ હેલ્થ એન્ડ વેલફેર.
• ન્યૂ સાઉથ વેલ્સ બ્યુરો ઓફ ક્રાઈમ સ્ટેટિસ્ટિક્સ એન્ડ રિસર્ચ.
• વિક્ટોરિયન ડિપાર્ટમેન્ટ ઓફ હેલ્થ.

OpenAIએ સ્પષ્ટતા કરી છે કે દર્દીઓના અંગત મેડિકલ રેકોર્ડ્સ સુધી પહોંચ બનાવવામાં આવી હોય તેવા કોઈ પુરાવા મળ્યા નથી. કંપનીના જણાવ્યા અનુસાર, માત્ર એકત્રિત આરોગ્ય આંકડાઓ અને આંતરિક ફાઇલ નામો જ સામે આવ્યા હતા.

સરકારને માહિતી આપવામાં વિલંબ થતાં નારાજગી

OpenAIએ આ ઘટના અંગે 10 સપ્ટેમ્બરના રોજ ઓસ્ટ્રેલિયન સરકારને જાણ કરી હતી. વડાપ્રધાન અલ્બનીઝે જણાવ્યું હતું કે કંપની દ્વારા આ માહિતી એક જાહેર મેઇલબોક્સ પર મોકલવામાં આવી હતી, જેના કારણે સંબંધિત મંત્રી સુધી માહિતી પહોંચવામાં પાંચ દિવસનો વિલંબ થયો હતો. તેમણે ભારપૂર્વક કહ્યું કે ટેક કંપનીઓએ પોતાના રિપોર્ટિંગ પ્રોટોકોલ વધુ મજબૂત અને બહેતર બનાવવાની જરૂર છે.

તપાસ માટે વિશેષ ટાસ્કફોર્સની રચના

ઓસ્ટ્રેલિયાના સંરક્ષણ મંત્રી રિચાર્ડ માર્લ્સે આ મામલાની ઊંડાણપૂર્વક તપાસ કરવા માટે એક વિશેષ ટાસ્કફોર્સની રચના કરવાની જાહેરાત કરી છે. તેમણે આ ઘટનાને અસ્વીકાર્ય ગણાવી હતી, જોકે રાહતની વાત એ છે કે કોઈ નાગરિકનો અંગત મેડિકલ ડેટા એક્સેસ થયો નથી. આ ઘટના સામે આવ્યા બાદ વૈશ્વિક સ્તરે સરકારી સિસ્ટમ્સની સાયબર સુરક્ષા અને AI એજન્ટ્સની સ્વાયત્તતાના નિયમન અંગે નવી ચર્ચા છેડાઈ છે.