રાજકોટ: “રાઈટ ટુ એજ્યુકેશન” માટે એકમાત્ર દીકરી હોવાના મહાપાલિકા પ્રમાણપત્ર આપશે

રાજકોટ,તા.23 માર્ચ 2022,બુધવાર

રાજકોટ મહાનગરપાલિકા સ્ટેન્ડિંગ કમિટી ચેરમેન શપુષ્કર પટેલે  જણાવ્યું છે કે, રાજ્ય સરકારશ્રીની યોજના “રાઈટ ટુ એજ્યુકેશન” મુજબ કોઈ પણ પરિવારમાં એકમાત્ર દીકરી હોય તેને શાળામાં પ્રવેશમાં અગ્રીમતા આપવામાં આવશે. આ માટે એક દીકરી હોવા અંગેનું પ્રમાણપત્ર જરૂરી છે. 

આ પ્રમાણપત્ર મેળવવામાં નગરજનોને સરળતા રહે તે માટે પરિવારમાં એકમાત્ર દીકરી હોવા અંગેના પ્રમાણપત્ર રાજકોટ મહાનગરપાલિકાની સેન્ટ્રલ ઝોન કચેરી, અને વેસ્ટ ઝોન કચેરીના સીટી સિવિક સેન્ટર ખાતે આપવામાં આવશે. જે માટેનું નિયત ફોર્મ રાજકોટ મહાનગરપાલિકાની વેબસાઈટ www.rmc.gov.in માં ફોર્મ્સ મેનુમાં જન્મ મરણ(BIRTH & DEATH) માંથી મળી રહેશે અને નિયત નમૂનાનું સોગંદનામું સાથે રજુ કરવાનું રહેશે.

આ સોગંદનામા સહિતનું ફોર્મ ભરી તેની સાથે બાળકનો જન્મનો દાખલો, માતા- પિતાના આધારકાર્ડ અને રાશનકાર્ડ જોડી અરજી આપવાની રહેશે. આ કામગીરી તા.24/03/2022 ગુરુવારથી શરૂ કરવામાં આવશે. વિશેષ માહિતી અર્થે જન્મ મરણ વિભાગના સુપ્રિટેન્ડેન્ટનો સંપર્ક કરવાનો રહેશે.