- અંતિમ સફરે આવતા જહાજોને નિશાન બનાવી દેશી ચાંચીયા કાળી કમાણી કરી રહ્યા છે
- રાતના અંધારામાં જસપરા-મીઠીવીરડી વચ્ચે તંત્રની મીઠી નજર હેઠળ માલ પગ કરી જાય તે પહેલા જ પોલીસ ત્રાટકી!
જાણવા મળતી વિગતો અનુસાર અલંગ યાર્ડના પ્લોટ નં.૧૧માં ટાવર જહાજ આવી રહ્યું હતું. એ જહાજ માંથી ૧૫૦૦થી ૧૮૦૦ કિલો તાંબાના પાઇપ જહાજમાંથી ઉતારી હોડી દ્વારા લાવી જસપરા માંડવાના સ્મશાનથી આગળ મીઠી વીરડીના દરિયા કિનારેથી આશરે એકાદ કિમિ દૂર પાઇપ લાવવામાં આવ્યા હતા. આ ચોરેલ માલની કિંમત રૂપિયા બાર લાખથી વધુ હોવાનુ જાણવા મળ્યુ હતુ. આસાનીથી જહાજ પરથી દોઢ-પોણા બે ટન જેટલો તાંબાના ેમાલ કાઢવામાં આવ્યો તેની પાછળ શિપ બ્રેકરના જ ફૂટેલા ગદ્દાર માણસોનો હાથ હોવાનુ સામે આવ્યું છે.
સોમવારની રાત્રે જસપરા-મીઠી વીરડી વચ્ચેના દરિયા કિનારે આવેલો માલ કેટલાક ખાખીધારીઓની મીઠી નઝર તળે નીકળી રહ્યો હોવાનુ ચર્ચામાં આવ્યુ છે. ત્યારે ચોરાઉ માલ દરીયા કિનારે લાવવામાં આવ્યો હોવાની બાતમી આધારે માલ હજુ સગેવગે થાય તે પહેલા જ અધીકારી અને સ્ટાફ રાતના અંધારામાં ત્રાટકયા હતા. માલને ગઈકાલે વહેલી સવારે મરીન પોલીસ મથકે લાવવામાં આવ્યો હતો. ચોક્કસ બાતમીદારોના નેટવર્કને લઈ પર્દાફાશ થયો. જો કે આ માલ મરીન પોલિસ મથકની હજુ પાછળ મુકવામાં આવ્યો હોવાનું જાણવા મળ્યુ હતુ અને આ બાબતે ૨૪ કલાક બાદ અલંગ મરીન પોલીસ મથકના પી.એસ.ઓ સુરેશભાઈ બારૈયાને પુચ્છા કરતા બનાવને લઈ હજુ કશુ પોલીસ ચોપડે દર્શાવવામાં આવ્યુ ન હોવાનું જણાવ્યુ હતુ.
શિપ બ્રેકર પણ પોતાનો માલ ચોરાયાથી વાકેફ
રેતીના ધંધા સાથે સંકળાયેલા ઈસમએ કિનારે આવતા જહાજમાંથી માલ કઢાવ્યો હોવાની વાત સામે આવી રહી છે. ચોક્કસ ગેંગ અને હોડી દ્વારા આ માલ દરિયા કિનારે લાવવામાં આવ્યો હતો. આ મામલે શિપ બ્રેકર સમીરભાઈનો સંપર્ક કરતા તેઓએ વાતને સમર્થન આપી જણાવ્યું હતું કે પોતાને અધિકારી દ્વારા મરીન પોલિસનો સંપર્ક કરવા જણાવ્યું હોવાનું ઉમેર્યું હતું.
