- 30 દિવસમાં ભાવનગરમાં કોરોનાના 56 કેસ નોંધાયા
- ચાર દર્દીની બોમ્બે, બિહાર, અમદાવાદ અને મહુવાની ટ્રાવેલ હિસ્ટ્રી
ભાવનગર : શહેરમાં ૨૬ દિવસ બાદ કોરોનાનો ફરી વિસ્ફોટ થયો છે. એક જ પરિવારના ચાર સભ્ય મળી ૧૦ વ્યક્તિ કોરોનાના સકંજામાં સપડાતા આરોગ્ય વિભાગ દોડતું થયું છે. શહેરમાં ધીમી ગતિએ પણ કોરોનાના કેસ વધવા માંડયા છે. જે લોકો માટે પણ ચિંતાનો વિષય બન્યો છે. પાછલા ૩૦ દિવસમાં જ ભાવનગરમાં કોરોનાના કેસ ૫૬ નોંધાઈ ચુક્યા છે. જે બીજી લહેર બાદ સૌથી વધુ છે.
ભાવનગરમાં કોરોનાના કેસમાં આજે રોકેટગતિનો ઉછાળો આવ્યો છે. છ મહિલા અને ચાર પુરૂષ મળી કુલ ૧૦ વ્યક્તિ કોરોના પોઝિટિવ આવતા તેમને સારવાર અર્થે ખસેડવામાં આવ્યા છે. આજે કોરોનાના ૧૦ કેસ નોંધાયા છે. તે શહેરના હિલડ્રાઈવ, ઈસ્કોન, ગીતાચોક અને દેવરાજનગર વિસ્તારના દર્દીનો સમાવેશ થાય છે. ગીતાચોકમાં રહેતા એક જ પરિવારના ચાર સભ્યની ટ્રાવેલ હિસ્ટ્રી પણ ન હોવા છતાં કોરોના સંક્રમિત થયા હતા. જ્યારે અન્ય ચાર દર્દીની બોમ્બે, બિહાર, અમદાવાદ અને મહુવાની ટ્રાવેલ હિસ્ટ્રી બહાર આવી છે. ઉલ્લેખનિય છે કે, ગત ૪ ડિસેમ્બરના રોજ ૧૧ કેસ નોંધાયા બાદ કોરોનાના દર્દીનો આંકડો આજે ડબલ ફિગરમાં પહોંચ્યો છે. વધુમાં નવા ૧૦ દર્દી સાથે શહેરમાં કોરોનાના એક્ટીવ કેસની સંખ્યા ૨૧ થઈ છે. જિલ્લામાં આજે નવો એક પણ કેસ નોંધાયો નથી. હાલ બે દર્દી સારવાર હેઠળ છે.
મહિલાઓમાં કોરોના સંક્રમણનું પ્રમાણ વધ્યું
ભાવનગર શહેરમાં અગાઉ પુરૂષોમાં કોરોનાના કેસ વધુ જોવા મળતા હતા. પરંતુ ડિસેમ્બર માસમાં મહિલાઓમાં પણ કોરોનાનું ચિંતાજનક રીતે સંક્રમણ વધ્યું છે. શહેરમાં ૧લી ડિસેમ્બરથી ૩૦મી ડિસેમ્બર સુધીમાં ૫૬ કેસ નોંધાઈ ચુક્યા છે. તેમાં ૩૩ કેસ પુરૂષ અને ૨૩ કેસ સ્ત્રીમાં સામે આવ્યા છે. આજે પણ પુરૂષોની તુલનામાં કોરોના પોઝિટિવ થયેલા દર્દીમાં સ્ત્રીની સંખ્યા વધુ રહી હતી.
