નખની સારસંભાળ

સૌંદર્યની સાથે જોડાયેલો એક શબ્દ છે નખશિખ. નખનું મહત્ત્વ એટલે જ છે. સુંદરતાની શરૂઆત નખથી થાય છે. નાના નાજુક નખની માવજતથી જ શરૂ થાય છે સૌંદર્યની સજાવટ. સ્ત્રીઓ નખને લાડ લડાવે છે. તેઓ નખને સજાવે છે. નખને રંગે છે. સુંદર નખ સ્ત્રીઓના રૂપમાં વધારો કરે છે અને આથી જ નખની સારસંભાળ લેવી જરૂરી છે. આવો જાણીએ નખને સુંદર રાખવાના કેટલાક નુસખા.

1. નવશેકા ગરમ પાણીમાં શેમ્પૂ ભેળવીને તેમાં આંગળીઓ ડુબાડી રાખો. થોડા સમય પછી નખ નરમ પડી જાય ત્યાર બાદ નેઈલ ફલેરથી નખને સરખા કરો.
2. નખને સરસ આકાર આપતી વખતે તે તૂટી ન જાય તે માટે નેઈલ ફલેર ઉચ્ચ કક્ષાનું હોવું જરૂરી છે.
3. નખ બહુ અણીવાળા હોય તો તેને કાપીને સરખા કરવા.
4. નખને વ્યવસ્થિત કરતાં પહેલાં તેને ડેટોલથી સારી રીતે સાફ કરવા જેથી નખમાં કોઈ પ્રકારનું ઇન્ફેકશન થવાનો કોઈ ભય ન રહે.
5. આજકાલ ફ્રેંચ મેનિક્યોર ઇન ફેશન છે જેમાં નખને ચોરસ રાખવામાં આવે છે.
6. તમારા હાથ લાંબા હોય કે ટૂંકા તો તે પ્રમાણે નખની લંબાઈ રાખવી જેથી હાથ સુંદર લાગે.
7. નખને પોલિશ કરતાં પહેલાં બેઝિક વ્હાઈટ કોટ કરવો પણ માત્રાનું ધ્યાન રાખવું. વધારે પડતું ન હોવંુ જોઈએ નહીંતર નેઇલ પોલિશના થપેડા લાગશે.
8. બેઝિક વ્હાઈટ કોટ કર્યા પછી સુકાયા બાદ ઘાટા રંગની પોલિશ કરવી.