સ્કવેર કટ - અધીર અમદાવાદી

= બહારનું ખાવાની ડૉક્ટરો ના પાડે છે, તો અંદરનું શું ખાવું?

• ડૉ. કવિ રાજન કે. હાથી, વડોદરા
• મલાઈ અને ટોપરું.
  = ડૉક્ટર ઓપરેશન દરમિયાન દર્દીને બેભાન કેમ કરે છે?
• સૂર્યદિપ ચાવડા, સુરત
• કોઈ ચશ્મદિદ ગવાહ ન રહે એટલે.
  = કુંવારા કેમ પરણવા તરસતા હશે?
• કાનજીભાઈ વેણ, ધરણીધર (વાવ-થરાદ)
• સાહસિકતા.
  = વાઘ કરતાં નાની હોવા છતાં બિલાડીને વાઘની માસી કેમ કહે છે?
• યોગેશભાઈ આર. જોશી, હાલોલ
• આપણે ત્યાં પડોશીને માસી કહેવાનો રિવાજ છે.
  = વિચારોની દીવાલ ચણવા શું શું જોઈએ?
• નરેશભાઈ પરમાર, ભરૂચ
• વહેમ અને વિચારો.
  = દિલ પર હંમેશા પથ્થર જ કેમ મુકાય?
• ઇમ્તિયાઝ કુરેશી, સુરત
• પથ્થરદિલ બનવા.
  = છત્રી કાળી કેમ હોય છે?
• રોહિત દરજી, 'કર્મ', હિમ્મતનગર
• છત્રી વગર પલળતા લોકોની નજર ના લાગે એટલે.
  = ઇન્સ્ટાગ્રામ કેટલા ગ્રામનું છે?
• શિવમ વી. યાજ્ઞિાક, રાજકોટ
• ઇન્સ્ટાગ્રામ સાથે અને વગર મોબાઈલના વજનના તફાવત જેટલું.
  = એક તરફ કરોડોની લોન ચૂકવાતી નથી, અને બેંકવાળા બોલપેન બાંધી રાખે
  છે, કેમ?
• ધવલકુમાર સોની, ગોધરા
• એમની પર્સનલ પેન કોઈ ઉધાર ના માંગે એટલે.
  = શું માણસોએ જંગલી જાનવરોથી બચવા જંગલમાં રહેવા જવું જોઈએ કે કેમ?
• મુકેશ ટી. ચંદારાણા, મીઠાપુર
• જવાય ને, મચ્છરદાની અને વીમો લઈને.
  = કોઈનો એક એવો સવાલ જે તમને બિલકુલ ના ગમ્યો હોય તો એ શું હોઈ શકે?
• નિકુંજ પૂનમચંદ વાણિયા, કુણધેર
• ઘેરથી ફોન આવે ્ને પૂછેઃ 'ક્યાં છો?'
  = જમવામાં જંગલો અને કૂટવામાં ભગલો, તો બોલવામાં?
• યશપાલસિંહ ટી વાઘેલા, થરા
• બંગલો.
  = કવિઓ અને પ્રોગ્રામ સંચાલકો વાતવાતમાં તાળીઓ કેમ પડાવે છે?
• જ્યોતિષ પાઠક, વડોદરા.
• ઓડિટોરિયમમાં મચ્છરને કારણે.
  = દુનિયામાં સૌથી વધુ ભયાનક જગ્યા કઈ છે?
• હિમાંશુ આઈ. દોશી, કરજણ
• ટ્રેનનો 'લેડિઝ' ડબ્બો.
  = મીઠા લીમડાને મીઠો લીમડો કહે છે, પણ કડવા લીમડાને કડવો લીમડો કેમ
  નથી કહેતા?
• તરુણ ભટ્ટ, અમદાવાદ
• એને ખોટું ના લાગે ને.
  = તમે લગ્નની સીડી વર્ષમાં કેટલી વાર જોવો છો?
• શશિકાંત દેસલે, સનિયા કનદે સુરત
• માથે વાળ જોવાની ઈચ્છા થાય ત્યારે.
  = ખમીર ઓસરતું જણાય તો શું કરાય?
• નયનભાઈ પટેલ, ભરૂચ
• ઝવેરચંદ મેઘાણીને વંચાય.
  = પ્રશ્ન બહુ અઘરો હોય તો તમે શું કરો છો?
• જયંત સોની, પેટલાદ
• લેગ સ્ટંપની બહાર જતાં બૉલ પર સ્કવેર કટ ના વાગે.
  = છૂટાછેડા બાદ કોણ સુખી થાય છે, પતિ કે પત્ની?
• હંસાબહેન ભરુચા, વિરાર
• આમિરના કિસ્સામાં બેઉ. એવું લાગે છે.
  = પકડાયેલા દારૂનો નાશ કરવાને બદલે બીજા રાજ્યમાં વેચાણ કરી કમાણી ન થઈ શકે?
• હરેશ લાલવાણી, અમદાવાદ
• પકડાયેલ દારૂ ઓરિજિનલ છે એ પરીક્ષણ કોણ કરશે?

= ડોનાલ્ડ ટ્રમ્પ પોલિટીશિયન છે કે વેપારી?

• ભદ્રેશ પટેલ, અમદાવાદ
  = ચક્રમનો ઓપ્શન નથી?