H-1B વિઝા સંકટઃ નોકરીઓ જતાં અમેરિકામાં લોન લઈને ઘર ખરીદનારા ભારતીયોની હાલત કફોડી

H1B visa crisis US Property Owners Hit: અમેરિકામાં વર્ષોથી સ્થાયી થયેલા ભારતીયો માટે હવે એક નવી અને કડવી વાસ્તવિકતા સામે આવી રહી છે. અમેરિકામાં ઘર અને ગાડી હોવા છતાં, મોર્ગેજની જવાબદારી સાથે અનેક પરિવારોને ભારત પરત ફરવું પડી રહ્યું છે. ખાસ કરીને ટેક્સાસના ડલાસ-ફોર્ટવર્થ (Dallas-Fort Worth) જેવા વિસ્તારોમાં H-1B વિઝા અને નોકરીઓની અનિશ્ચિતતાને કારણે અનેક ભારતીય પરિવારોનું આર્થિક ગણિત ખોરવાઈ ગયું છે.

રિયલ એસ્ટેટ માર્કેટમાં મોટો કડાકો: ભારતીય ખરીદદારો ઘટ્યા

અમેરિકાના ડલાસ અને આસપાસના ઉત્તર ટેક્સાસના શહેરોમાં ભારતીય આઇટી (IT) પ્રોફેશનલોની મોટી કોલોની છે, જે સ્થાનિક રિયલ એસ્ટેટ માર્કેટની માંગનો મુખ્ય આધાર હતા.

• ખરીદીમાં ઘટાડો: એક સ્થાનિક બિલ્ડરના જણાવ્યા અનુસાર, પહેલાં તેમના લક્ઝરી ઘરોના વેચાણમાં દક્ષિણ એશિયાઈ (મુખ્યત્વે ભારતીય) ખરીદદારોનો હિસ્સો 70% સુધી હતો, જે હવે ઘટીને 30%થી પણ નીચે આવી ગયો છે.
• કોવિડ સમયનું રોકાણ: કોવિડ દરમિયાન ઘરો સસ્તા હોવાથી અનેક ભારતીયોએ મોટી રકમની મોર્ગેજ લોન લઈને ઘર ખરીદ્યા હતા. પરંતુ હવે નોકરીઓ છૂટી જતાં આ ભારે મોર્ગેજના હપ્તા ભરવા અશક્ય બની ગયા છે.

ઘર વેચવું બન્યું મુશ્કેલ: બમણો આર્થિક માર

નોકરી ગયા પછી ઘર વેચીને સુરક્ષિત રીતે પરત ફરવું પણ આ પરિવારો માટે પડકારજનક બની ગયું છે. જેમ કે…

• સમય અને ખર્ચ: ઘર વેચવામાં મહિનાઓનો સમય લાગે છે અને તે દરમિયાન મોર્ગેજ ચાલુ રાખવું પડે છે.
• બજાર કિંમતમાં ઘટાડો: પ્રોપર્ટીની બજાર કિંમત ઘટવાથી અને લોન ચૂકવવાની બાકી હોવાથી ઘર વેચવા જતાં મોટો આર્થિક ફટકો પડે છે.
• મજબૂરીનો નિર્ણય: આ સ્થિતિમાં ઘર વેચ્યા વગર કે લોનની જવાબદારી છતાં પરિવારો ઘર મૂકીને ભારત આવવાનો નિર્ણય લઈ રહ્યા છે.

કડક વિઝા નિયમો અને 60-દિવસના ગ્રેસ પિરિયડ પર તલવાર

વાત માત્ર ટેક્સાસ કે H-1B પૂરતી મર્યાદિત નથી, પરંતુ L-1 જેવા એમ્પ્લોયર-લિંક્ડ (Employer-linked) વિઝા ધરાવતા લોકો પર પણ અસર પડી છે.

• DHSની દરખાસ્ત: US Department of Homeland Security દ્વારા H-1B અને L-1 વિઝા ધારકો માટે નોકરી છૂટ્યા પછી મળતા 60 દિવસના ગ્રેસ પીરિયડ (Discretionary Grace Period)ને રદ કરવાની દરખાસ્ત મૂકાઈ છે.
• વધતી અનિશ્ચિતતા: ભલે આ હજુ માત્ર દરખાસ્ત હોય, પરંતુ આના કારણે અમેરિકામાં કાયદેસર સ્ટેટસ અને નોકરીની સુરક્ષા પર મોટા પ્રશ્નાર્થચિહ્નો ઊભા થયા છે.

ગુજરાતના પરિવારો પર અસર અને EB-5 વિઝા તરફ ઝુકાવ

ગુજરાત માટે આ વિષય અત્યંત સંવેદનશીલ છે, કારણ કે અમદાવાદ, સુરત, વડોદરા અને રાજકોટ જેવા શહેરોના અનેક યુવાનો H-1B વિઝા પર અમેરિકામાં ટેક, એન્જિનિયરિંગ અને મેનેજમેન્ટ ક્ષેત્રે કાર્યરત છે. H-1B અને ગ્રીનકાર્ડની લાંબી રાહ તેમજ અનિશ્ચિતતાના કારણે હવે ગુજરાતમાંથી કાયમી વસવાટ માટે EB-5 (ઈન્વેસ્ટર વિઝા) જેવા વિકલ્પો અંગેની પૂછપરછમાં નોંધપાત્ર વધારો થયો છે.