'ભગવાન રામ જ્યારે ભાઈ લક્ષ્મણના ન થયા તો...' ચંપત રાયનો VIDEO વાઈરલ, પોલીસમાં FIR

Ram Mandir Donation Row: અયોધ્યા રામ મંદિર દાન ચોરીના મામલામાં ટ્રસ્ટના પૂર્વ મહાસચિવ ચંપત રાય પર કેસ નોંધવા માટે પોલીસને વધુ એક ફરિયાદ આપવામાં આવી છે. ચંપત રાયના એક વાઈરલ વીડિયોનો હવાલો આપતા રામજન્મભૂમિ પોલીસ સ્ટેશનમાં રામજાનકી મંદિરના મહંત સંત દાસ ઉર્ફે રાજેશ સિંહ માનવે ધાર્મિક લાગણીઓને ઠેસ પહોંચાડવા બદલ અને જમીન ખરીદ-વેચાણ મામલામાં કેસ નોંધવા માટે ફરિયાદ આપી છે. તેમણે પોલીસ સ્ટેશનની સામે સૂત્રોચ્ચાર કરીને પ્રદર્શન પણ કર્યું છે. આ પહેલા આમ આદમી પાર્ટીના સાંસદ સંજય સિંહ અને ધર્મસેના પ્રમુખ સંતોષ દુબેએ FIR માટે પોલીસને ફરિયાદ આપી હતી.

ભગવાન રામ પોતાના ભાઈ લક્ષ્મણના ન થયા તો આપણા શું થશે

એક સમાચાર ચેનલ પર ઈન્ટરવ્યુનો હવાલો આપતા સંત દાસે આરોપ લગાવ્યો છે કે, 'ચંપત રાય એક વીડિયો ક્લિપમાં એમ કહેતા સંભળાઈ રહ્યા છે કે અમને રામરાજ્ય નથી જોઈતું, ભગવાન રામ પોતાના ભાઈ લક્ષ્મણના ન થયા તો આપણા શું થશે.' તેમણે ચંપત રાયને રામદ્રોહી અને રામ રાજ્યથી નફરત કરનારા ગણાવ્યા. તેમણે કહ્યું કે, 'ઘણા લોકોના મકાન તોડી પાડવામાં આવ્યા અને એક રૂપિયો પણ વળતર આપવામાં ન આવ્યું. ચંપત રાયે વક્ફ અને સોસાયટીની જમીન ખરીદી છે. કૌભાંડની ગંભીરતા અને નિષ્પક્ષતાથી તપાસ થવી જોઈએ.'

ઈન્ટરવ્યુમાં શું કહી રહ્યા છે ચંપત રાય

ઈન્ટરવ્યુનો એક વીડિયો વાઈરલ થયો છે. વીડિયોમાં ચંપત રાય એવું કહેતા સંભળાઈ રહ્યા છે કે, રામરાજ્ય ખૂબ મુશ્કેલ છે, રામરાજ્ય લાવવાથી હું પોતે જ ડરું છું. રામે પોતાના ભાઈને પણ ન છોડ્યા એટલે રામરાજ્યની હું કલ્પના નથી કરતો, જે કરતા હોય તે કરે. પરંતુ અયોધ્યામાં લાખો લોકો આવશે તેવી અમે કલ્પના કરી રહ્યા છીએ. તેઓ રોડ, હવાઈ જહાજ અને ટ્રેનથી આવશે, તેથી રસ્તાઓ કેટલા પહોળા હશે, રેલ્વે ટ્રેક કેટલા મોટા હશે, પ્લેટફોર્મ કેટલા લાંબા હશે, રોકાવા માટેની જગ્યાઓ કેવી હશે, સફાઈમાં નંબર વન અયોધ્યા હોય, તેની જવાબદારી સરકારોએ સંભાળવી પડશે. વાતચીતના આધારે લાગી રહ્યું છે કે આ વીડિયો ત્રણથી ચાર વર્ષ જૂનો છે.

ઘણા ટ્રસ્ટીઓ પર કેસ નોંધાવાની તલવાર લટકી

સુપ્રીમ કોર્ટ તરફથી SITને અત્યાર સુધીની તપાસનો સ્ટેટસ રિપોર્ટ દાખલ કરવા અને માળખાની પૂરી વિગતો આપવાના નિર્દેશ બાદ તપાસ પ્રક્રિયા વધુ આગળ વધવાની શક્યતાઓ વધી ગઈ છે. આ સાથે જ ફાઈનલ રિપોર્ટમાં પૂછપરછમાં સામેલ થઈ ચૂકેલા ટ્રસ્ટીઓ પર પણ કેસ નોંધાવાની તલવાર લટકી રહી છે.

SITની રચના સાથે શાસનનો નિર્દેશ હતો કે, પહેલા સાત દિવસમાં પ્રારંભિક અને 15 દિવસમાં ફાઈનલ રિપોર્ટ રજૂ કરવામાં આવશે. ત્યારબાદ તપાસ પ્રક્રિયાની સમયમર્યાદા વધુ લંબાવી દેવામાં આવી. જેમ-જેમ તપાસ આગળ વધી રહી છે, તેમ-તેમ પરત દર પરત રામ મંદિર પરિસરની અંદર વ્યવસ્થામાં વ્યાપક સ્તરે ખામીઓ દેખાવા લાગી છે. આ દરમિયાન વિપક્ષે જમીન કૌભાંડના જીનને બહાર કાઢી નાખ્યો છે. જોતજોતામાં આ પણ એક મુદ્દો બની ગયો.

અધિકારીઓએ આરોપ લગાવનારાઓ પાસેથી સત્યતાની પુષ્ટિ માટે દસ્તાવેજો પણ માગ્યા હતા, જે આમ આદમી પાર્ટીના સાંસદ સંજય સિંહ અને હિન્દુવાદી સંગઠનના પ્રમુખ સંતોષ દુબેએ સોંપ્યા છે. આ વચ્ચે જ સુપ્રીમ કોર્ટના નિર્દેશે તપાસને વધુ વિસ્તાર આપી દીધો છે. સૂત્રોએ જણાવ્યું કે, પ્રારંભિક રિપોર્ટ શરૂઆતી તપાસના આધારે બનાવવામાં આવ્યો હતો પરંતુ ત્યારબાદ તપાસને વિસ્તાર મળી ગયો છે.

દાનની ચોરી સાથે હવે રિપોર્ટમાં એ પણ સામે આવી જશે કે શ્રી રામ જન્મભૂમિ તીર્થ ક્ષેત્ર ટ્રસ્ટે અત્યાર સુધી જમીનની ખરીદી વ્યવસ્થિત રીતે કરી છે કે તેમાં પણ ગેરરીતિ છે. સૂત્રોએ જણાવ્યું કે, ટ્રસ્ટ દ્વારા ખરીદવામાં આવેલી કેટલીક જમીનોને યોગ્ય કહી શકાય નહીં. તો બીજી તરફ ચઢાવા કેસમાં જવાબદારીનું વહન યોગ્ય રીતે ન કરવાના તથ્યો સામે આવી ચૂક્યા છે.